ئیبراھیم برۆ ل سەر ب چەتە ناڤکرنا پێشمەرگەیێن رۆژئاڤا بەرسڤا ئالدار خەلیل دا و گۆت ئەو، “دخوازیت دانووستاندنان ب داوی بینیت.”
ئەندامێ کۆمیتەیا پێوەندیێن دەرڤە یا ئەنجوومەنا نشتمانی یا کورد ل سووریێ (ئەنەکەسێ) ئیبراھیم برۆ دەربارێ داخویانیا ئالدار خەلیل یا ل سەر پێشمەرگەیێن رۆژئاڤا ژ بۆ رووداوێ راگھاند، ئالدار خەلیل گەلەک جاران ب خرابی بەحسا ئەنەکەسێ کریە لێ ڤێ جارە ب زەلالی بەرسڤا وان خالان دا کو دێ د قۆناغا داهاتی یا دانووستاندنان دا هێنە گۆتووبێژکرن و ب زەلالی رێ ل بەر گرت.
ئیبراھیم برۆ ھەروھا گۆت، ئالدار خەلیل دخوازیت دانووستاندنێن ئەنەکەسێ و پەیەنەکێ ب داوی بینیت و دیار کر، فەرماندارێ گشتییێ ھێزێن سووریا دەمۆکراتیک مەزلووم کۆبانی ژی ژ ڤێ یەکێ بەرپرسیارە، ژ بەر کو وەھا نیشان ددا کو سەبارەت دانووستاندنان ئەو خوەدی بریارە.
برۆ دیار کر، داخویانیا ئالدار خەلیل ھەلوەستا ئالیێ دویەم ل ھەمبەر قۆناغا داهاتی یا دانووستاندنێن کوردی-کوردی ل رۆژئاڤایێ کوردستانێ نیشان ددەت و گۆت: “ئەم نابێژن ئەڤ نێرینا تەڤاھیا پەیەنەکێ یە، لێ پەیەدە سەرپەرەشتیا وان دانووستاندنان دکەت، گەلەک سەرکردەیێن وان ل سەر ڤێ مەسەلەیێ ئەڤ گۆتنە گۆتینە و ب تەمامی دانە خویاکرن کو نەکارن رێکەفتنەکێ ل گەل ئەنەکەسێ و پێشمەرگەیێن رۆژئاڤا بکەن.”
“دەما گاڤێن باش تێنە ئاڤێتن کارێن جودا تێنە کرن”
برۆ دا خویاکرن، د دەما داویێ دا گەلەک کارێن وەکو گرتن، شەوتاندنا ئۆفیسان و کارێن دی یێن کو ل سەر ئەردێ تێنە کرن، نە ل گۆری وان سۆزان بوون کو مەزلووم عەبدی دابوون و ل گۆر ئەمریکایێ ژی ناچیتە سەری.
ئیبراھیم برۆ ھەروەھا بەحسا وێ یەکێ ژی کر کو ھەر جارا گاڤەک دهێتە ئاڤێتن، ل سەر ئەردێ کارێن جودا تێن کرن و ل سەر پرسا “گەلۆ مەزلووم کۆبانی دکاریت ب فشارخستنا سەر پەیەنەکێ بەردەوامیێ بدەتە دیالۆگێ؟” گۆت، “ئەز دبێژم؛ ژ دەستێ کەک مەزلووم دەرکەتیە.”
“ئامەریکا بخوازیت دانووستاندن دێ بەردەوام بن”.
برۆ تەکەز ژی دکەت، کو دڤێت پەیەنەکە و ھەسەدە دەربارێ گۆتنێن ئالدار خەلیل دە ھەلوەستا خوە ب زەلالی ئاشکەرا بکەن و گۆت، “تشتێن ل سەر ئەردی تێنە کرن ل دژی بەرژەوەندیێن ملەتێ کوردن.” ل سەر پێشەرۆژا دانووستاندنێن کوردی ژی برۆ ئاماژە ب وێ دکەت کو ئەگەر ئەمریکا بخوازیت، دانووستاندن دێ بەردەوام بن لێ گۆت ژی، “بێگومان بەرژوەندیێن ملەتی د سەر ھەر تشتی دا نە ئەگەر خەلکەک بخوازن ملەتێ مە بکەنە د بازاران دا و بفرۆشن و ھەر رۆژێ ل جھەکی بن، زەحمەتە بەردەوام بن. ئەنەکەسێ چ جاران خوە دایە ئالی. ئەگەر د بەرژوەندیا گەلێ مە دا بیت ئەم ل گەل دانووستاندنانین. ئەم وەکو ئەنەکەسە کاری خوە بەردەوام دکەین.”
“پێشمەرگێن رۆژ خەبات ژ بۆ ملەتێ کورد کریە”
دەربارێ کاریگەریا ئیدارەیا نوویا ئەمریکایێ ل سەر دانووستاندنێن کوردی و رەوشا رۆژئاڤایێ کوردستانێ، “ئیرۆ نە رەوشا 2014ێ یە کو داعش ھەبوو، نھا سیاسەتەکا دی ل دەڤەرێ دهێتە مەشاندن، نێرینا ئەمریکایێ ل سەر تشتەکێ دی یە.”
د داویا گۆتنێن خوە دا ئیبراھیم برۆ ل سەر داخویانیا ئالدار خەلیل کو گۆتبوو “پێشمەرگێن رۆژ چەتە نە” گۆت، “ملەتێ مە بەرسڤ دا، پارچەیێن دی یێن کوردستانێ ژی چ جارا ڤی تشتی قەبوول ناکەن. پێشمەرگێن رۆژ خەبات ژ بۆ ملەتێ کورد کریە. مافەکی مەیێ رەوایە کو پێشمەرگێن رۆژ ڤەگەرن ئیرۆ بیت یان رۆژەکا دی بیت.
