ڤێ حەفتەیێ ل کەرکووکێ دو جڤین ھاتنە ئەنجامدان. ھەر چەندە کو ناڤەرۆک و لایەنێن ڤان جڤینان گەلەک ژ هەڤدو جودا دییار دکەن ژی، لێ بەلێ ئەو ل گۆری ئێک ستراتیژیێ کار دکەن. یەکەم جڤین رێخستنا ب ناڤێ تەڤگەرا ئازادی یا کو ل باشوورێ کوردستانێ نونەراتیا پەکەکێ دکەت ئەنجامدا. یا دی ژی رێخستنا حەشدا شەعبی یە. گەر ئەم ڤان ھەر دو جڤینان پیچەکێ شرۆڤە بکەین، ئەم دشێین نەخشەیێن ژ بۆ بھار-ھاڤینا بهێت، یێن ژ بۆ کەرکووکێ ھاتینە چێکرن شرۆڤە بکەین.

هۆلا رەوشەنبیری و هونەری یا ئێکەتیێ و بیرەوەرییا قاسم سولەیمانی

حەشدا شەعبی، بیرەوەرییا کوشتنا قاسم سولەیمانی و ئەبو مەھدی ئەلموهەندیس ل کەرکووکێ گێرا. ناڤەندا رەوشەنبیری و ھونەری یا کەرکووکێ ناڤەندەک گرێدایی ئێکەتیێ یە. ب راستی، پێدڤییە کو ئەو تنێ ژ بۆ بوویەرێن ھونەری و جڤینێن نە سیاسی بهێتە بکار ئانین. مەراسیما کو حەشدا شەعبی ژ بۆ قاسم سولەیمانی ل ناڤەندا رەوشەنبیری و هونەری یا ئێکەتیێ دا چێکری رامانا چ ددەت ؟

ئەمریکا نامەیەکا هوشداریێ ژ بۆ ئێکەتیێ فرێکر

د چالاکیا کو سەرۆکێ حەشدا شەعبی فالح فەیاز تێدا ئامادە بوو، ئالایێن ئەمەریکا و ئیسرائیلێ ھاتنە بن پێ کرن. درووشمێن دژی ئەمەریکا ھاتنە دان. بەرسڤا ویلایەتێن یەکبوویی ل سەر وی دیمەنی زوو هاتە دان، و ئەمریکا نامەیەکا هوشداریێ ژ بۆ ئێکەتیێ فرێکر و تێدا راگەهاند کو ئەو چالاکیەکا حەشدا شەعبی یا ب ڤی رەنگی د هۆلەکا ئێکەتیێ دا قەبوول ناکەن. تیما لاھۆر جەنگ پشتی وێ نامەیێ ئەو ناڤەندا کلتووری داخست. وەکی دی، ئێکەتیێ د راگەهاندنا خوە دا گرنگی ب ڤێ بوویەرێ نەدا و بەلاڤنەکر، هەر وەکو چ تشتەک چێنەبووی خوە خشیم دانا. ئێکەتیێ ھەول دا کو رێگریێ ل وان نەرازیبوونێن دێ ل دژی وێ هێنە دیارکرن بگریت، خواست پەیوەندیێن خوە یێن ل گەل قونسۆلخانەیا ئەمریکایێ دا بپارێزیت و د کەشەکێ ئارام دا بهێلیت.

مام جەلال تالەبانی دگۆت: “ئەم بوهستەک ژ ئاخا کەرکووکێ نادەینە دژمنان”

ژ لایەکێ دی ڤە،  بەرپسیارێ مەلبەندا کەرکووکێ یێ ئێکەتیێ داخویانیەک دا و ئیدیعا کر کو ئەو ب تەڤاھی ژ بوویەرێ ئاگەهدار نەبوون و گۆت: “ئەم وەکی ھەمی لایەنان ھاتینە داخوازکرن، لێ ئەز نزانم کێ ئەو ئاڤاھی ب کرێ دابوو حەشدا شەعبی” ب رەنگەکێ گشتی، پێویستە کەسێن کو دخوازن ناڤەندا رۆشەنبیری و هونەری بکار بینن پارە بدەن. رێکخەرێن چالاکییا حەشدا شەعبی حەقێ وێ ژی نەدا.  پشتی کو ھەر تشت خلاس بووی، مە زانی کو نوونەرێن ئێکەتیێ ژی بەشداری وێ ئاھەنگێ بوویە کو تێدا ئالایێن ئەمەریکا و ئیسرائیلێ ھاتنە بن پێ کرن. ژ بەر ڤێ یەکێ ئەم دزانین کو ھەڤکاری و ھەڤالبەندییا حەشدا شەعبی و لاھۆر جەنگی د بیرەوەرییا قاسم سولەیمانی یا د 11 چلە دا هاتیە گێران جارەکا دی ھاتە تۆمارکرن.

رەحمەتی مام جەلال تالەبانی دگۆت: “ئەم بوهستەک ژ ئاخا کەرکووکێ نادەینە دژمنان”، ئەڤ هۆلە ل سەر فەرمانا مام جەلال تالەبانی هاتبوو ئاڤاکرن، لێ ئیرۆ داگیرکەرێن کەرکووکێ د وێ هۆلێ دا کۆمبوون و شاهی ئەنجامدا.

جڤینا “تێکۆشینا ل دژی داگیرکەریێ”یا تەڤگەرا ئازادی

ئێکەتی ب ئاشکەرایی بەشەکە ژ مەشرووع کرنا حەشدا شەعبی. د ھەمان دەم دا بەشەک ژ ڤی کارێ کو ژ لایێ پەکەکێ ڤە ھاتیە کرن ژی ھەیە. جڤینا تەڤگەرا ئازادی ژی ل ڤێرە رۆلێ خوە دبینیت. جڤین، ب پێشەنگیا تەڤگەرا ئازادی، دو رۆژان بەردەوام بوو و رێخستنێن بەشداربووی ھەموو ئەو رێخستن بوون کو ل بن سەیوانا ئێکەتیێ دا نە. مژارا جڤینێ : “کوردستان د شەر و ئاشتیێ دا” بوو. لێ یا بالکێش ئەڤەیە کو ھەلوەستەک ھەیە چاڤکانیا شەر و ئاشتیێ ل کوردستانێ ڤەشێریت، ژ بەر کو ب تەنێ ترکیێ ب داگیرکەرا کوردستان و کەرکووکێ نیشان ددەن. دەولەتێن ئیران، ئیراق و سووریا وەکو هەڤپەیمان تێنە نیشاندان، نە وەکو داگیرکەر.

پشتی کو د سالا 2014ێ دا جەمیل بایک بوویە ھەڤسەرۆکێ پەکەکێ ھەڤکاریا خوە یا ستراتەژیک ل گەل ئیرانێ نوو کر، پەکەکێ ژی ب رێیا پرۆپاگندەیێن گرسەیی ، خرابکرنێن گرسەیی و مژوولکرنا، رۆژەڤ گوهارت. گاڤا کو ھوون ژ نێزیک ڤە بەرێ خوە بدەنێ، ھوون دێ ڤێ ناکۆکیێ و دورووتییا پەکەکێ ب زەلالی بینن. پەکەکە ل باکورێ کوردستانێ ب ئارمانجا تورکییابوونێ تەڤدگەریت و سییاستێ دکەت. ل ھەر سێ پارچێن دی دەولەتا ترک وەکو داگیرکەرێ سەرەکی ب ناڤ دکەت. ل باکور دەولەتا ترک وەکو کۆمارا دەمۆکراتیک دبینیت، ل باشوور ژی وێ دەولەتێ ب جوورەکێ دی بناڤ دکەت. د راستی دا کێشەیا کوردستانێ نە تەنێ ب دەولەتا ترک ڤە گرێدایە. ئیران، ئیراق و سووریا ژی ھەمان سییاسەتێ دژی کوردستانێ د مەشینن.

پەکەکە ژ سالا 2015ێ و هێڤە د خزمەتا سیاسەتێن ئیرانێ یێن ل باشوور دایە

پرسگرێکا کوردستانێ پرسگرێکەکا ناڤنەتەوەیی و ھەرێمی یە. یێن کو رێگریێ ل دۆزا کوردستانێ دکەن دەولەتێن ھەرێمی ئانکو ترکیا، ئیران، ئیراق و سووریا نە. کورتەیا سیاسەت و سەختەکرنێن پەکەکێ یێن نھا ل باشوورێ کوردستانێ ب رێڤە دبەت، ئەڤەیە: ” پەکەکە ژ بۆ ڤەشارتن و رەواتیدان ب هەژموونا ئیران و ھێزا چەکدارا شیعا یا ب ناڤێ حەشدا شەعبی ل سەر باشوورێ کوردستانێ کار دکەت”. پەکەکە ژ سالا 2015ێ و هێڤە د خزمەتا سیاسەتێن ئیرانێ یێن ل باشوور دایە و د خوازیت تێگەھەک وەها بدەتە ئاڤا کرن.

باژێرێن حەلەبچە، پێنجوین، و قەلادزێ ل سلێمانیێ ئەو دەڤەرن کو رۆژانە ئیتیلاعاتا ئیرانێ دەستهەلاتداریێ لێ دکەت. ئەڤ ژی راستیەکە دهێتە زانین کو، چاوا ئیرانێ ل ھندەک دەڤەران وەکی قەلاچوولان یەکینەیەکا ھێزا تایبەتی یا گرنگ ب ناڤێ ھێزا یەنەکە ب جیهـ کریە. بۆچی پەکەکە قەت ڤێ یەکێ ناکەتە رۆژەڤ؟

گاڤا پەکەکە و داگیرکەر دبنە ھەڤالێن ئێک، ئەو نابێژنە کۆلۆنیالیستان داگیرکەر، ئەو دبێژن پاشا، ئاغا

بابەتێ کەرکووکێ، کو ژ سالا 2017ێ ڤە ژ لایێ حەشدا شەعبی و ئارتێشا ئیراقێ ڤە هاتیە داگیرکرن، ناهێتە نیقاش کرن. بۆچی داگیرکرنا ئیراقێ، داگیرکرنا حەشدا شەعبی، دەستدانانە سەر ئەردێن گوندیێن کەرکووکێ ژ لایێ عەرەبان، عەرەبکرن و ترکومانکرنا کەرکووکێ، قەت ناهێتە باسکرن و نابیتە مژارا رۆژەڤێ ژ لایێ پەکەکێ. هەرچەند کو پرسگرێکا ھەری مەزنا کەرکووکێ ئیرۆ ئەڤەیە کو دەولەتا ئیراقێ دیمۆگرافییا کەرکووکێ دگوهریت و گوندێن کوردان ڤالا دکەت و ددەتە عەرەبان، لێ بەلێ رێخستنێن سەر ب پەکەکێ ئانکو تەڤگەرا ئازادی و پەکەکە ب خوە ژی ڤێ راستییێ ڤەدشێرن. ل خەلکێ کەرکووکێ بنێرن، ئەو دبێژن دژمن دوورە، لێ دژمن ل کەرکووکێ یە. گاڤا پەکەکە و داگیرکەر دبنە ھەڤالێن ئێک، ئەو نابێژنە کۆلۆنیالیستان داگیرکەر، ئەو دبێژن پاشا، ئاغا.

ئامادەکاریا ھلبژارتنێن پێشوەختێن ئیراقێ

حەشدا شەعبی و تەڤگەرا ئازادی ل سەر کەرکووکێ خوەدان یەک هەلویستن. ئەو ئامادەکاریا ھلبژارتنێن پێشوەختێن ئیراقێ د 6ێ خزیرانا 2021ێ دکەن. ل ھەرێمێن کو ب ناڤچەیێن کوردستانێ یێن دەرڤەی سنۆرێ هەرێما کوردستانێ دهێنە ناسین، کورد حەتا نها ب لیستەیێن هەڤبەش تێدا بەشداری هەلبژارتنان بوونە، ل مووسل، کەرکووک، دیالا و هتد… سەدەما ڤێ یەکێ ئەوە کو پارێزڤانیێ ل دەنگێن کوردان و هەژمارا کورسیێن کوردان ل پەرلەمانێ ئیراقێ دا بکەن. لێ بەلێ، ووسا دییارە کو ھندەک پارتیێن کوردستانێ دخوازن ب سەرکێشییا ئیرانێ ب لیستەیەکا ھەڤبەش نەھێلن کورد ب لیستەیەکا هەڤبەش بەشداری هەلبژارتنان ببن. گەلۆ واتەیا وێ چیە؟ واتەیا وێ ئەڤەیە کو کورد ھەری کێم 12-14 کورسیان ل پەرلەمانێ ئیراقێ دێ ژ دەست دەن.

باسکێ لاھۆر جەنگی د ناڤا ئێکەتیێ دا، حەشدا شەعبی و پەکەکە د بن سەیوانا ئیرانێ دا کار دکەن.

ئاگاھی ھەیە کو تەڤگەرا ئازادی پلان دانایە کو د ڤان ھلبژارتنان دا ل دەرڤەیی لیستەیا کوردستانی لیستەیەک ب ناڤێ “تەڤگەرا دەمۆکراسیا گەل” یان ناڤەک وەکی ڤی ناڤی ئاڤا بکەت. ئەو دێ ھەمان پرۆژە ل کفری، شەنگال و مووسلێ جێبەجێ کەت. ب ڤی رەنگی، دێ دەنگێن کوردان هێنە پارچە کرن. دبیت کو د ھاڤینێ دا ناڤێ تەڤگەرا ئازادی و کەرکووکێ پێکڤە گەلەک ببهیزین. ئەم دێ ناڤێن حەشدا شەعبی و پەکەکێ ژی پێکڤە ببھیزین.

ب کورتی، مرۆڤ دکاریت بێژیت کو ئەڤ ھەر دو جڤینە خوەدان رۆژەڤەکا ڤەشارتی نە. ھەر چەند دبیت کو ھەر دو جڤین وەکی باسک و رەنگێن ژ ھەڤ جوودا خویا بکەن ژی، لێ ئەو خوەدان سیاسەتە و مژارەکا هەڤبەشن. راستییەکا ھەری زەلال ئەوە کو ھەر کەس دزانیت، باسکێ لاھۆر جەنگی د ناڤا ئێکەتیێ دا، حەشدا شەعبی و پەکەکە د بن سەیوانا ئیرانێ دا کار دکەن.