دادگەھا مافێن مرۆڤان یا ئەورۆپایێ (DMME) راگھاند کو ل گۆر ئامارێن سالا ٢٠٢٠ێ ھەری زێدە ترکیا ئازادیا رادەربرینێ بنپێ کریە. ل گۆر ئامارێن DMME پشتی رووسیایێ ھەری زێدە، ژ ترکیێ ژ بۆ سکالا تۆمارکرنێ، سەرەدانا دادگەھا مافێن مرۆڤان یا ئەورۆپایێ ھاتیە کرن.
دادگەھا مافێن مرۆڤان یا ئەورۆپایێ، ئیرۆ ل ناڤەندا خوەیا ل ستراسبۆورگێ ئامارێن دەربارێ بنپێکرنێن ئازادیا دەربرین و رامانێ دا بەلاڤ کرن.
ل گۆر ئامارێن دادگەھا مافێن مرۆڤان یا ئەورۆپایێ، وەکو سالا پێشتر، ھەری زێدە ژ رووسیا، ترکیا، ئوکراینا و ئیتالیایێ سکالا ژ بەر بنپێکرنێن ئازادیا دەربرینێ ل وێ دادگەھێ ھاتینە تۆمارکرن.
ل گۆری راپۆرێ، د 2020ێ دا ژ رووسیایێ 13 ھەزار و 800 سەرەدان، ژ ترکیێ 11 ھەزار 150 سەرەدان، ژ ئوکراونا 10 ھەزار و 250 سەرەدان و ژ ئیتالیایێ ژی 3 ھەزار و 400 سەرلێدان بۆ دادگەھا مافێن مرۆڤان یا ئەورۆپایێ ھاتینە کرن و ئەو ژی دبیتە ژ سەدی 75 یا تەڤاھیا سەرەدانان ژ بۆ تۆمارکرنا سکالایا.
دەربارێ ترکیێ دا 97 سکالا ھاتنە ئەنجامدان، د 85 سکالایان دا ترکیا ب بنپێکرنا رێکەڤتنا مافێن مرۆڤان یا ئەورۆپایێ هاتیە تۆھمەتبارکرن و د 6 سکالایان دا ژی هیچ بنپێکرن نەھاتنە دیتن.
ھات زانین کو ترکیێ ھەری زێدە مادەیا 10ەمینا رێکەڤتنا مافێن مرۆڤان یا ئەورۆپایێ بنپێ کریە.
