دادگەھا ناڤدەولەتی دۆزا ئیرانێ یا ل دژی ئەمریکایێ قەبوول کر 

دادگەھا ناڤدەولەتی دۆزا ئیرانێ یا ل دژی ئەمریکایێ قەبوول کر 

دادگەھا دادێ یا ناڤدەولەتی کو دادگەھا بلندا نەتەوێن یەکبوویی یە، رۆژا چارشەمێ رازیبوونا خوە نیشان دا کو گوھداریا سکالایا ئیرانێ یا ل دژی جەزایێن ئەمریکا یێن ژ بەر بەرنامەیا ئاتۆمی یا وی وەلاتی بکەت.

ئەمریکایێ دلگرانیا خوە ل ھەمبەر بریارێ نیشان دا و دبێژیت، نە د تایبەتمەندیا وێ دادگەھێ دایە کو وێ دۆزێ ببینت.

سەرۆکێ دادگەھا دادێ یا ناڤدەولەتی، عەبدولقاوی ئەحمەد یووسف راگھاندیە، دادوەرێن دادگەھێ ئیعتیرازا پارێزەرێن ئەمریکی رەد کرنە. نھا وێ دادگەھێ بریار دایە گوھداریا سکالایا ئیرانێ بکەت، لێ دبیت کو چەند سال پێویست بن ھەیا کو بریارا داوی ل سەر دۆزە بهێتە دان.

ئیرانێ پێشوازی ل ڤێ بریارا دادگەھا دادێ یا ناڤدەولەتی یا ل لاھایێ کر و وەزارەتا دەرڤەیا ئیرانێ ئەڤ بریار وەکو “سەرکەفتن” ب ناڤ کر.

وەزارەتا دەرڤەیا ئەمریکایێ ل ھەمبەر ڤێ بریارێ کارڤەدان نیشان دا و راگھاند، کو ئەو ژ ڤێ بریارێ “بێھێڤی” بوونە. بەردەڤکا وەزارەتا دەرڤەیا ئەمریکایێ دیار کر: “د قۆناغا داهاتی یا ڤێ دۆسیەیێ دە ئەم دێ ڤێ یەکێ شرۆڤە کین کو چما ئیدیعایا ئیرانێ بێ مفایە.”

پێشتر واشنگتۆنێ گۆتبوو، دادگەھا ناڤدەولەتی یا ل لاھایێ مافێ وێ یەکێ نینە و نە د تایبەتمەندیا وێ دایە، لەوما دڤێت دەست ژ دێتنا وێ دۆزە بەردەت.

واشنگتۆنێ ھەروھا گۆتبوو، جەزایێن ل سەر ئیرانێ پێویستن، ژ بەر کو ئیران “مەترسیەکا جددی”یە بۆ سەر ئەولەھیا جیھانێ.

سالا 2018ێ ئیدارەیا دۆنالد ترامپ پشتی کو ژ رێکەفتنا ئەتۆمی یا ل گەل ئیرانێ ڤەکێشا، جەزایێن ل سەر ئیرانێ ڤەگەراندن.

تەھرانێ وی دەمی ل دژی وێ پێنگاڤا واشنگتۆنێ، ل دادگەھا دادێ یا ناڤدەولەتی گلی تۆمار کر. تەھران د گلینامەیا خوە دا دبێژیت، سزایێن سەپاندی پەیماننامەیا ھەڤرێتیێ یا سالا 1955ێ د ناڤبەرا ئیران و ئەمریکا دا بنپێ دکەن. ئەو پەیماننامە تایبەتە ب رێکخستنا پەیوەندیێن ئابۆرییێن ناڤبەرا ھەردو وەلاتان.

بریارا دادگەھا ناڤدەولەتی یا نەتەوێن یەکبوویی د دەمەکێ دایە، کو سەرۆکێ ئەمریکایێ جۆ بایدن دخوازیت ب دیپلۆماسیێ ئیرانێ رازی بکەت، بەرنامەیا خوە یا ئاتۆمی سینۆردار بکەت.

پوستێن ھەمان بەش