ژ ئێكی ڤێ مه‌هێ ڤه، ب ئه‌گه‌را لڤ و ته‌ڤگه‌رێن چه‌كدارێن په‌كه‌كێ ل ناڤا گوند و دۆربه‌را باژارۆكان، ده‌وله‌تا تركیێ 3 جاران گوندێن باشوورێ وه‌لات بۆردۆمان كرنه، زیانا هێرشان ته‌نێ ب خه‌لكێ گوندان كه‌تنه، په‌كه‌كه ب ئه‌نقه‌ست خوه نێزی گوندان دكه‌ت، دخوازیت بهێنه چۆل كرن و ببن مه‌یدانا شه‌ر، ئه‌و ووسا خوه نێزی گوندان دكه‌ت هه‌ر وه‌كه ئاردۆگان و سوپایێ تركیێ ل وێ ده‌رێ نه، یان ژی هه‌ر وه‌ك وێ ئه‌نقه‌ره و ستانبۆل ئێخستینه دۆرپێچێ.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، د هێرشا ئێڤارا دوهـی رۆژا ئینی دا كو باله‌فرێن جه‌نگێ یێن تركیێ ل سنۆرێ ناڤچه‌یا شێلادزێ كربوو، حه‌ره‌كه‌تا چه‌كدارێن په‌كه‌كێ ب رۆكێته‌كێ هاتییه هه‌ده‌ف كرن.
هێرش ل ده‌مژمێر 5:45 به‌ربانگێ چێبوویه، وه‌ختێ كو باله‌فران ئاقارێ گوندێ سیدان ل ده‌ڤه‌را نێروه و رێكان بۆردۆمان كری، ئه‌ڤ گوندێ كو ل سالا رابووری ده‌رده‌سه‌ریێن هه‌ری مه‌زن ژ ده‌ستێ په‌كه‌كێ ژیان كرین.
ب ئه‌گه‌را هێرشێن سه‌ر په‌كه‌كێ، پتری 6 وه‌لاتیێن گوندێ سیدان ل سالا رابووری شه‌هید كه‌تن، 4 ژێ ژ یه‌ك مالباتێ نه.
هێرشا هه‌ری مه‌زن یا ڤێ حه‌فتیێ ل خواكوركی و قه‌ندیلێ پێكهاتبوو و باله‌فران ل ڤان هه‌ردوو ناڤچه‌یان 10 چه‌كدارێن په‌كه‌كێ قه‌تل كرن، لێ به‌لێ د ڤێ هێرشێ دا زیانا مه‌زن ب گوندێ شێنێ یێ گرێدای قه‌زا پشده‌ر سه‌ر ب پارێزگه‌ها سلێمانیێ كه‌ت، رۆكێتێن باله‌فران چه‌ندین خانی ل ڤی گوندی خه‌راب كرن.
پارتییا كاركه‌رێن كوردستانێ، چه‌ند پاشتره حه‌ره‌كه‌تا چه‌كدارێن خوه دئێخیته ناڤا گوند و نێزیكی باژارۆكان، په‌كه‌كه ڤێ یه‌كێ ب ئه‌نقه‌ست دكه‌ت ژ بۆ كو گوندێن باشوور ببن مه‌یدانا شه‌ر و ژ خه‌لكی بهێنه ڤالا كرن، ب ئه‌گه‌را ڤێ تا‌كتیكا ب ئارمانج یا په‌كه‌كێ، ژ خزیرانا سالا رابووری ڤه، سوپایێ تركیێ پتری 30 نوقته‌یێن خوه ل باشوورێ وه‌لات زێده كرینه و پتری 50 گوندان هاتینه چۆل كرن، په‌كه‌كه ژی ڤێ ئێكێ ژ بۆ خوه ب به‌رخوه‌دان و ده‌ستكه‌فتی حه‌ساب دكه‌ت، هه‌ر وه‌ك وێ ئه‌ڤ گوند ژ داگیركه‌ران رزگار كرین!، لێ یا راست ئه‌ڤه لۆژیكێ براتییا گه‌لانه ئانكو خاكا خوه وه‌كه دیاری بده برایێ خوه یێ ترك!!.
ووسا دیاره ل به‌ر په‌كه‌كێ به‌رزه بوویه، ژبه‌ركو ڤێ رێخستنێ گۆتبوو هه‌گه‌ر ئاردۆگان ئێریشا سه‌ر عه‌فرینێ پێك بینه، ئه‌مێ شه‌ر ببن ناڤا ئه‌نقه‌رێ و ستانبۆلێ، لێ به‌لێ وێ شه‌ر نێزی باژارۆكێن باشوورێ كوردستانێ كر، د فكره شێلادزێ ستانبۆل و ئه‌نقه‌ره‌یه!.
