جەنازەیێن 104 کوردێن ئێزدی یێن گوندێ کۆچۆ کو ژ لایێ داعشێ ڤە ھاتبوون کوشتن، بەرییا دو رۆژا ب مەراسیمەکێ ب ئاخێ هاتنە سپارتن. دەما کو مرۆڤ تەماشەی وان دیمەنان دکەت، خوینا مرۆڤی دجەمدیت. ھەر کەسێ کو دبێژیت “ئەز مرۆڤم” د وان دیمەنان دا ئێشا گەلێ ئێزدی د دلێ خوە دا هەست پێ دکەت. لێ کوردان ئەو ئێش دو جاران هەست پێکر. د وێ مەراسیمێ دا رەوشەکا نە ئاسایی ھەبوو.
ھەر کەسێ کو ئەو رێورەسما ل گوندێ کۆچۆ برێڤە چووی تەماشا کری دزانیت کو ھندەک تشت خەلەت ب رێڤە چوون. حەتا مرۆڤ دشێت بێژیت کو د وێ رێورەسمێ دا ب بێدەنگی، ھێدیکا، بێی کو خوین برژیت فەرمانا نوو یا هەژمارە 75ێ ھاتە ئەنجامدان. ئێزدیا وەسا هزر دکر کو ئەو ھاتینە رزگارکرن، لێ ئەو د ناڤا فەرمانەکا نوو دا ژییان. دانانا ئالایێ ئیراقێ ل سەر تابووتێن جانگۆرییا فەرمانا نوو دەستنیشان کر. د ڤێ فەرمانێ دا شوونا کوشتنێ تەعریب، شوونا سڤکاتیێ چیرۆکێن هەڤالینیێ ژ بۆ ئێزدییا دھاتنە ڤەھاندن.
“ھێزا کو ئەو ئالا ئینایە شنگالێ و گوندێ کۆچۆ جێمکێ داعشا کو ئەو کۆمکوژی کری، ئانکو حەشدا شەعبی بوو”
کۆمکوژیەک ھاتە ئەنجامدان، د ڤێ کۆمکوژیێ دا کوردێن ئێزدی ھاتنە کوشتن، ل سەرانسەرێ جیھانێ ھەمی کورد ژ بۆ کو ڤان کوردێن ئێزدی رزگار بکەن بوونە یەک. ب دەھان زارۆکێن کوردا ژ بۆ رزگارکرنا کچ و کورێن ئێزدییا جانێ خوە دا. ژ بۆ رزگارکرنا شنگالێ ئۆپەراسیۆنەک هاتە ئەنجامدان. شنگال هاتە رزگارکرن. حکوومەتا ھەرێما کوردستانێ ژ بۆ رزگارکرنا ژنێن کوردێن ئێزدی، نڤیسینگەهەک تایبەت ئاڤا کر. ئەو هندەک جاران ب ئۆپەراسیۆنا، هندەک جاران ژی ب فدیە-بەرتیل ب سەدان ژنان رزگار دکەت. پارلەمانێ کوردستانێ 3یێ تەباخێ وەکی “رۆژا جینۆسایدا کوردێن ئێزدی” ب فەرمی ناس کر. ھەموو کوردا کارەساتا کو ب سەرێ کوردێن ئێزدی ھاتی ب کارەساتەکا کو ب سەرێ وان بخوە هاتی دبینن. لێ مخابن جەنازەیێن 104 کەسێن کو ھاتینە کوشتن دئینن و ئالایێ ئیراقێ ل سەر دادنن. ئەو ئالا، ئالایێ وان عەرەبا بوو کو ئێزدی کۆمکوژ کری، مالێن وان نیشانی چەکدارێن داعشێ دای و مالێن ئێزدیان تالان کری، کەچێن ئێزدی ل بازارێن مووسل و سووریێ فرۆتی و … هتد، ھێزا کو ئەو ئالا ئینایە شنگالێ و گوندێ کۆچۆ جێمکێ داعشا کو ئەو کۆمکوژی کری، ئانکو حەشدا شەعبی بوو. گەلۆ بۆچی ب ڤی رەنگی چێبوو؟
هارپاک دهێتە بیرا وە؟
بۆچی؟ ژ بەر کو روحا هارپاگۆس “هارپاک” ل شنگالێ دگەریت. هارپاک دهێتە بیرا وە؟ خائینێ مەزنێ کو د دیرۆکا کوردان دا سەردەما بەربژێر ڤە چوونێ دایە دەستپێکرن. ئەو خائینێ مەزن ھاتە بیرا وە؟ بابێ دیرۆکێ، دیرۆکناسێ ناڤدار هیرۆدیت ڤێ خیانەتا کوردا ب گۆتنێن ئەفسانەیی نڤیساندیە.
پادیشاھێ ئیمپراتۆریەتا ماد ئاستیاگەس “ئاستیاک” د خوەنا خوە دا ب ئاڤا کو ژ کەچا وی مادانایێ دهێت، دخەندقیت. شرۆڤەکارێن خەونێ دبێژن کو دێ ژ کەچا تە مادانایێ کورەک پەیدا بیت و تە ل سەر تەختێ پادیشاهیێ ئینەتە خوارێ. ژ بۆ رێگریکرن ل ڤێ خەونێ، ئاستیاگەس کەچا خوە ددەتە کامبییەسەسێ فارس. کەچا وی کورەک دبیت. ئاستیاگەس دخوازیت ڤی زارۆکی ژی بکوژیت. ئەو دبێژیتە ھارپاگۆسێ “هارپاک” کو فەرماندارێ ئارتەشا ئیمپراتۆریەتا ماد بوو وی زارۆکی بکوژیت، لێ هارپاک زارۆکی ناکوژیت. هارپاک ژ لایێ ئاستییاگەس “ئاستیاک” ڤە دهێتە سزادان.
“سەرفەرماندارێ ئارتێشا مادا هارپاک دژی کۆرۆش شەری ناکەت”
ناڤێ وی زارۆکی کۆرۆشە و ئەو دخوازیت ئیمپارارتۆرییا ماد تێک ببەت. بوویەرا خییانەتێ ل ڤێرە دەست پێ دکەت. هارپاگۆس “هارپاک”، کو کارڤەدان نیشانی ئاستیاگەس دا، ل گەل هەخامەنییان پەیوەندییا چێدکەت. ئەو دبێژیتە کۆرۆش کو گەر ئەو ئێریشی ئیمپراتۆریەتا ماد بکەت، ئەو دێ هاریکاریا وی کەت، و ئەو کۆرۆش هان ددەت کو ئێریشی ئیمپراتۆریەتا ماد بکەت. ئەو دبێژیت کو دێ ئاستیاکی رادەستی وی کەت. شەر دەستپێ دکەت، سەرفەرماندارێ ئارتێشا مادا هارپاک دژی کۆرۆش شەری ناکەت. کۆرۆرش د شەری دا ب سەر دکەڤیت و ئیمپاراتۆرییا ماد ژناڤ دبەت. ئاستیاک دیل دگریت. دەما ئاستیاک د ناڤ لەشکەران دا دهێتە گرتن، ئەو بۆ لایێ هارپاک دزڤریت و دبێژیتێ: “ئەی روورەشێ خائین، تە خیانەت ل من کر، تە هێلا کو دەستھەلاتا مە ھلوەشیت. هەر هیچ نەبیت بلا تو چووبای جھێ من بلا مەلک ژ بۆ قەومێ مە مادا ئانکو کوردان مابا. بۆچی تە هێلا کو خولامێن مە فارس-کۆرۆش ل سەر مە ببنە دەستھەلاتدار”
ئەم ژی ژ پەکەکێ دپرسین، بۆچی وە ھەڤکاری ل گەل رێڤەبەریا ئیراقێ کر دا کو شنگال نەکەڤیتە بن دەستھەلاتدارییا حکوومەتا ھەرێما کوردستانێ؟
بۆچی وە ل گەل حەشدا شەعبی هەڤپەیمانی کر کو پێشمەرگە نەڤەگەرنە شنگالێ ؟
پەکەکە ما ھوون شانازیێ ب ئالایێ ئراقێ یێ کو ل سەر تابووتێن جانگۆرییێن ئێزدییا ھاتیە دانان دکەن و پێ سەربلند دبن ؟
پەکەکە سەدەما دانانا ئالایێ ئیراقێ ل سەر جەنازەیێن کوردێن ئێزدی یە
ئەی پەکەکە! ئەی خائین مادەم تە ب یاریێن خوە ڤە حیلە کرن و تە خواست شەنگالێ ژ کوردستانێ جودا بکەی بلا تە عەرەب نەئانیبان، تە شیعە و عیراقی نە ئانیبان. تە ئەڤ ریسوابوونە چێکر بلا تە ئالایێ ئیراقێ نە دانابا سەر تابوتێن کوردێن ئێزدی.
پەکەکە سەدەما دانانا ئالایێ ئیراقێ ل سەر جەنازەیێن کوردێن ئێزدی یە. ھەر ئەو پەکەکە یە، یا کو نە دخواست ئالایێ کوردستانێ ل شەنگالێ بلند ببیت. وان ئالایێ ئیراقێ ل شەنگال بلندکر. پەکەکێ ئەو کۆمکوژییا مەزنا گیانی یا کو ب سەرێ گەلێ ئێزدی ھاتی بەس نەدیت، پەکەکێ خواست وان ژ ئاخا کوردستانێ و رەمزێن کوردان ژی دوور بێخیت و ھەر وەھا پەکەکێ سۆز دایە ئیراقێ، ئیرانێ و حەشدا شەعبی کو ئەو دێ پێشمەرگە ژ ئاخا شەنگالێ دوورئێخن.
“رێگریکرن ل پەکەکێ، رێگریکرن ل روحا خییانەتێ یە”
تشتێ کو ل شنگالێ دقەومیت نە تشتەکێ نۆرمالە. نە نۆرمالە کو د رێورەسمێن ل کۆچۆ ھاتیە ئەنجامدان دا ئالایێ ئیراقێ لسەر تابووتێن جانگۆرییێن ئێزدییان بیت. دانانا ئالایێ نازییا ل سەر تابووتێن قوربانێن ھۆلۆکۆستێ یێن جوهیان “سەهیۆنیان” یێن کو ژ لایێ نازییان ڤە ھاتبوونە کوشتن چ بیت، هەر ب وی رەنگی دانانا ئالایێ ئیراقێ ل سەر تابووتێن ئێزدییان ژی ئەوە. ل شەنگالێ کۆمەک ژ ئێزدییێن کو ل دەردۆرا پەکەکێ کۆمبوویی ب تەنێ ژ بۆ بەرژەوەندییا پارتییا خوە وان ئێزدییا دکەتە ئیراقی. ژ ئاخا کوردستانێ تێنە ڤەقەتاندن و بەرێ وان ددەنە بیابانێ عەرەبا. ئەڤ چەندە خییانەتا ھەری مەزنە کو پەکەکە ل هەموو کوردان ب گشتی و کوردێن ئێزدی ب تایبەتی دکەت. پەکەکە بێ قیمەتەکا سییاسی یە. ئەڤ چەندە پشتی چەند سالا دێ ئێزدییا بەر ب ژناڤچوونا ئۆلی، قەومی و نەژادی ڤە بەت.
بەرپرسێ ڤێ رەوشێ نە گەلێ ئێزدی یە. لێ فەرزە کو ھەموو گەلێ کورد لبەر ڤێ رەوشا شنگالێ خوە ب بەرپرسیار ببنن. ژ بەر کو پەکەکە ل شنگالێ بوویە هارپاک. ل گەل دژمنێن کوردا بوویە یەک و کوردان بەر ب تەعریبێ ڤە دکێشیت. حەتا کو چارەسەریەک ژ بۆ ڤێ سییاسەتا پەکەکێ یا کو ئەرکێ هارپاک دگێریت نەھێتە دیتن، ئەڤ رەوشە دێ کوور بیت و ئێزدییا بەر ب ژناڤچوونێ ڤە بەت. د ڤێ دەرازینکا دیرۆکی دا پەکەکە وەکو هارپاک خییانەتێ ل سەر کوردان فەرز دکەت. پەکەکە بوویە دارێ د دەستێ داگیرکەران دا. رێگریکرن ل پەکەکێ، رێگریکرن ل روحا خییانەتێ یە.
