• شەیهمۆس ئۆزەنگین

بەری دەمەکێ ھاکان فدان سەرۆکێ ئیستیخباراتا ترکیێ “میتێ” سەردانا شامێ کر. سەرۆکێ ئیستیخباراتا ترکییا، ل گەل ئیستیخباراتا سوورییا ل شامێ جڤییا. د ڤێ جڤینێ دا مژارا ھەری گرنگ ل ھەمبەر کوردان “ئاڤاکرنا پیلانەکا هەڤبەش” بوو. ھەر چەند ئەڤ پەیوەندی، وەک “رێکەفتنەکا ڤەشارتی”(!) بیت ژی، پشتی ڤێ ھەڤدیتنێ، ھەولێن کو سوورییا ل ھەمبەر کوردان دەستپێکری، بال کشاندە سەر ڤێ دان و ستەندنا د ناڤبەرا ئیستیخباراتا سوورییێ و ترکییا دا.

گەلۆ ترکییا ژ بۆنا رێگریکرن ژ کوردان، رۆلێ کۆنترۆلکرنا کوردان دا سوورییا؟

ئەز دێ ل گۆر ڤان بوویەرێن، کو ئەڤە چەند رۆژن ل حەلەبێ و حەسەکێ ل ھەمبەر کوردان دقەومن، دان و ستاندنێن د ناڤبەرا ترکییا و سوورییا دا شرۆڤە کەم.

ھێزێن رەژیما سوورییا ل حەلەبێ و تل رەفعەتێ دۆرپێچەک دانا سەر تاخێن کوردان، وەک شێخ مەقسود، ئەشرەفیە و ھەرێمێن نێزیکی تل رەفعەت. رێیێن لۆجیستیکێ گرتن و کوردێن روونشتڤانێن ڤان ھەرێمان، ب مەحکوومکرنا برسیبوونێ تەھدید کرن.

وەک کو ئەم دزانین: بالەفرگەھا قامشلۆ، تاخێ کو ئاڤاھییێن دەولەتێ لێ نە، ئەو رێیا کو ڤی تاخی و بالافرگەھێ ب ھەڤ ڤە گرێددەت، دەرییێ سنۆرێ ترکییا و سوورییا د بن کۆنترۆلا ئارتێشا سوورییێ (ھێزێن پاراستنا نەتەوی) دا نە. ل حەسەکێ ژی چارگۆشە ھەرێمەک کو ئاڤاھییێن دەولەتێ یێن پاراستن و ئەولەھییێ لێنە، د دەستێ ھێزێن پاراستنا نەتەوی یا دەولەتا سوورییێ دانە.

کوردان ژی ژ بۆنا کو داوییێ ب ڤێ دۆرپێچێ بینن، دۆرپێچەک دانا سەر وان ھەرێمێن کو د دەستێ ھێزێن رەژیمێ دانە. ل حەسەکێ خوەپێشاندان و ئالۆزی ژی دەکەتن و کەسەک ژ ھێزێن سوورییێ ژی ھاتە کوژتن. ڤێ رەوشێ ژی هەڤکێشەیەک ئانی سەر ھێزێن کوردان، کو د ناڤا ڤێ هەڤکێشەیێ دا ترکییێ، سوورییێ و رووسییا ژی ھەبوون. ئەڤە ژی جارەک دی ئاشکەرا بوو، کو ترکییا، رووسییا و سوورییا، پێکڤە ل سەر پیلانەکا هەڤبەش دخوازن هەڤکێشەیێن ل سوورییێ، ل گۆر رێگریکرن ژ کوردان بگوھرینن.

ھێزێن کوردان ل رۆئاڤایێ کوردستانێ، ئاخا کوردان 80% وەندا کرییە و ئەڤ ئاخا کوردان کەتییە دەستێ ترکییا و ھێزێن توندرەو، کو ل گەل ترکییا رکار دکەن. ترکییێا، ل عەفرین، جەرابلووس، گرێ سپی، سەرێ کانییێ و گەلەک دەڤەرێن دی، دیمۆگرافییا ھەرێمێ بجارەکێ گوھارتییە. دەولەتا ترکییا، ژ ترکییێ و کامپێن سوورییێ مالباتێن ئەندامێن داعش، یێن ھێزێن توندرەو سئینیت و ل سەر مال و ملکێ کوردان بجیھ دکەت. ب ڤان میتۆدان یاریا ب دیمۆگرافییا ھەرێمێ دکەت. کوردێن ڤان ھەرێمان ژی ل کامپێن دەردۆری دێرەزۆر و حەسەکێ، پر پەریشان، بێ ئاڤ، بێ نان، بێ کەھرەبا و بێ دەرمان دژین! ل ھەمبەر ڤان کارەساتێن خەراب، کو ب ھەلوەستەک دوژمنانە ل ھەمبەر کوردان دمەشن، ئەمریکا، ھێزێن ھەڤپەیمانان، نەتەوەیێن یەکبوویی و یەکیتییا ئەورۆپایێ و ناتۆ بێدەنگن! ترکییا ژ ڤێ بێدەنگییێ ھێزێ وەردگریت و بەربەرییەتا خوە برێڤە دبەت.

ترکییێ، پشتی داگرکرنا ئاخا رۆئاڤایێ کوردستانێ، نھا ژی ل گەل رەژیما سوورییێ د ھەولدانان دایە، کو رێگریێ ل کوردان بکەت. ل سەر ڤان ئارمانجان، ترکییا، ل گەل رووسییا و سوورییا د ھەولدانان دایە، کو پیلانەکا هەڤبەش، نوو دەربێخنە ھۆلێ، کو بجارەکێ کوردان تێک ببە.ت

ھەر ھەولدانەک، کو ل سەر سەرانسەرێ ئاخا رۆئاڤایێ کوردستانێ مەشییایە، بێتر جیھ ل کوردان تەنگ کرییە و بوویە سەبەب، کو کورد خاکا خوە ب جیهـ بهێلن و وەندا بکەن.

لێ هێژان ژی ل ڤی پارچا ئاخا کوردستانێ، رەوشەنبیر، سییاسەتمەدار و ئاقلمەندێن کوردان، نەگھشتینە وی ئاستی کو، ژ بەر کارەسات و سییاسەتا پەکەکێ، ل ڤی بەشێ کوردستانێ، کوردان  80%ئاخا خوە ژ دەست دایە. ئەڤ ژ دەست دانە ھەر بەردەوامە.

پەکەکە ل ڤی بەشێ کوردستانێ، بەرپرسییارێ ڤان ژ دەست دانێن کوردانە و ئاستەنگەک مەزنە ل پێشییا دان و ستاندنێن ناڤ مالا کوردی دا.

ئارمانجا ئێریشێن کو ل سەر ناڤێ “جوانێن شۆرەشگەر” تێنە سەر ئۆفیس و خەباتێن ھێزێن نەتەوییێن کورد، ھلوەشاندنا خەباتێن ئەگەرا ئاڤاکرنا یەکتییەکا ناڤ مالا کوردایە.

ژ لایەکێ دوژمنێن کورد و کوردستانێ یاریا ب هەڤکێشەیێن ھەرێمێ دکەن و د ناڤ پیلانەکا هەڤبەش دا، ئێریشان تینن سەر کوردان و دیمۆگرافییا کوردستانێ بجارەکێ دگوھرن، ژ لایەکێ دی ژی پەکەکە ژ بۆنا کو خەباتێن یەکتییا ناڤ مالا کورد ھلوەشینیت، یان ژی بەرتەنگ بکەت، د ھەولدانان دایە. ھەتا کو پەکەکە ژ ڤێ ھەرێمێ دەرنەکەڤیت ژی، مەرجێن دەستکەفتەکا کوردی، کو ل سەر وێ ئاخێ بێتە ئاڤاکرن نینە. ژ بەر کو، پەکەکە ب سییاسەتا خوە دوژمنێ دەستکەفتێن نەتەوی یێن کوردانە و ئەڤ ھەلوەستا پەکەکێ ژی؛ رێکێ بۆ ژدەستدانا کوردان ڤەدکەت، نە کو رێگریێ ل ئێریشێن تێنە سەر کوردان دگریت.

8/2/2021