ئالخماهۆیێ مسرێ و ئالخماهۆیێ قه‌ندیلێ

«هاریكارییا تركیێ، سیخوڕی، هه‌ڤرێیا تفاقا ئاكه‌پێ و مه‌هه‌پێ، پشتگرا فاشیزمێ»، ئه‌و جینایه‌تن كو رێخستنا په‌كه‌كێ هه‌رده‌م «پارتی» پێ سووچدار دكه‌ت‌، په‌كه‌كێ ئه‌ڤ یه‌ك ژ بۆ خوه‌ وه‌كه‌ ئاوازه‌كێ كرییه‌ و ل ژێر ڤێ ئاوازێ، ب ده‌هان ساله‌ سیخوڕی و خزمه‌تا رێخستنا خوه‌ یا ژ بۆ داگیركه‌رێن كوردستانێ د په‌چنیت‌، ب ئاوایه‌كی هه‌گه‌ر بوویه‌رك ل «بۆركینا فاسۆ» ژی روو بده‌ت، مامێ «جومعا» دێ وه‌سا ڤێ بوویه‌رێ شرۆڤه‌ كه‌ت كو پارتی ده‌ست تێدا‌ هه‌یه‌ و ب سیخۆڕییا پارتی ئه‌ڤ بوویه‌ر چێبوویه‌!

ئه‌ز دێ باز ده‌م و پشتره‌ بێژم پارتی بوو باز دای

هوون دێ وێ باوه‌ر كن یا ئه‌م د گوهێ هه‌وه‌ دا‌ بانگ دده‌ین!

ل گه‌ل ده‌ستپێكرنا هه‌ر هێرشه‌كا تركیێ ل سه‌ر باشوورێ كوردستانێ، مامێ جه‌میل باییك هه‌ڤسه‌رۆكێ كۆنسه‌یا برێڤه‌به‌ر یا كه‌جه‌كێ یێ ب كۆد ناڤێ ((جومعا)) ده‌ردكه‌ڤیت‌ و باس ل هنده‌ك بوویه‌رێن كو هێژان نه‌قه‌ومی دكه‌ت‌، خوه‌ وه‌كه‌‌ خێفزانكه‌كێ سه‌رده‌ما فیرعه‌ونییان و فیلۆسۆفه‌كێ ژیر و له‌هنگ د سیاسه‌تێ دا‌ نیشان دده‌ت،‌ هه‌ر وه‌ك وی خوا‌ندن ژ بۆ ره‌وشێ كرییه‌ و دزانیت‌ دێ چ قه‌ومیت‌، یا راست ئه‌و دزانیت دێ چ قه‌ومیت،‌ ژ به‌ر كو ئه‌و و رێخستنا خوه‌ به‌شه‌كێ پیلانێ نه‌.

جومعا وه‌ك‌ هه‌رده‌م وه‌سا ئاخفتنا خوه‌ ده‌ست پێ دكه‌ت‌: «پارتی هاریكارییا تركیێ دكه‌ت‌ ژ بۆ كو په‌كه‌كێ ژ ناڤ ببه‌ت»، مامێ جه‌میل دخوازیت‌ ب ڤێ گۆتنێ رۆژه‌ڤێ بگوهۆریت، دخوازیت‌ ره‌ڤینا رێخستنا خوه‌ و ب ده‌ستڤه‌به‌ردانا ده‌ڤه‌رێن ستراتیجی ژ بۆ تركیێ بكه‌ته‌ كراسه‌ك‌ ل به‌ر پارتی، دخوازیت‌ بێژیته‌ گه‌لێ كورد ئه‌ڤه‌ نه‌ئه‌مین تركیێ كێشی باشوور دكه‌ین، ئه‌ڤه‌ پارتی یه‌.

هه‌موه‌ختا ده‌ستپێكرنا ئۆپه‌راسیۆنا په‌نجا باز 2 كو رۆژا چارشه‌مبێی 10/2/2021ێ سوپایێ تركیێ ل چیایێ گاره‌ ده‌ستپێكر، رێخستنا په‌كه‌كێ جاره‌كا‌ دی چاپه‌مه‌نییا خوه‌ ب ئاوایه‌كی بێ ئه‌خلاق ل دژی پارتی و حكوومه‌تا باشوورێ كوردستانێ سێرڤس كر، ئارمانجا په‌كه‌كێ وه‌ك‌ هه‌رده‌م به‌ره‌ڤاژی كرنا راستیێ یه‌، ئه‌و دخوازیت ژ گه‌لێ باشوور را‌ ببێژیت‌، ئه‌ڤه‌ جاره‌كا‌ دی‌ ترك هاتن، ئه‌مێ دێ هنده‌ك ده‌ڤه‌رێن دی یێن باشوور بۆ وان كه‌ینه‌ دیاری، لێ به‌لێ ئه‌م دێ پشتره‌ بێژین پارتی دێ ڤێ دیاریێ ده‌ته‌ تركیێ، به‌لێ!! هوون دێ وێ باوه‌ر كه‌ن یا ئه‌م دبێژین و د گوهێ هه‌وه‌ دا‌ بانگ دده‌ین!.

شه‌ر نێزیك بوویه‌، ترك دێ ب هاریكارییا پارتی ڤی شه‌ری ده‌ته‌ مه‌شاندن

جه‌میل باییك د هه‌ڤدیتنه‌كێ دا د گه‌ل پێگه‌ها «مه‌دیا نیۆز» و «فرات نیوز»ێ رۆژا چارشه‌مبێی 10 سباتێ، ل گه‌ل ده‌ستپێكرنا هێرشا گارهی‌ به‌لاڤ كرییه‌، چه‌ندین جاران هێرشێ پارتی كر و وه‌ك‌ هه‌ر جار ئه‌و ب هاریكارییا تركیێ و خیانه‌تێ سووچدار كرییه‌ و دبێژیت‌: «دبیت ل ده‌مه‌كێ نێزیك تركیه‌ شه‌ره‌كێ مه‌زن ل باشوور ل دژی په‌كه‌كێ ب هاریكارییا پارتی، بده‌ته‌ مه‌شاندن».

مامێ جومعا د ڤێ هه‌ڤدیتنێ دا،‌ نرخاندن ژ بۆ رۆژه‌ڤێ و هێرشێن تركیێ ل سه‌ر باشوور كرییه‌، «بسم الله» یا خوه‌ ژی وه‌سا كر: «پارتی هاریكارا تركیێ» یه‌.

ئه‌م دێ ل ڤێر ب میناك، ب داتا و زانیاریێ ڤان دره‌وێن ب شاخ یێن مامێ جومعا ئاشكرا بكه‌ین و وی ده‌می هوون بریارێ بده‌ن، كانێ په‌كه‌كه‌ هاریكارا تركیێ یه،‌ یان پارتی!

ژ بۆ كو ئه‌م زه‌لالییه‌كێ بێخینه‌ به‌رچاڤان، پێویسته‌ ئه‌م 30 سالان بۆ پاش ڤه‌گه‌رین، ئانكو ژ سالا 1990 هه‌تا 2020ێ، بزانین په‌كه‌كێ د ڤان 30 سالان دا‌ چ كر؟، ل كو ده‌رێ بوو و نها چ دكه‌ت‌ و ل كو ده‌رێ یه؟‌، چه‌ند ناڤچه‌یێن ستراتیجی ژ بۆ تركیێ هێلاینه‌؟‌.

ژ باكور به‌ر ب كووراهییا باشوور

ژ سالا 90ێ په‌كه‌كێ 80% یا ناڤچه‌یێن خوه‌ بێ شه‌ر ژ بۆ تركیێ هێلاینه‌

پاش ئۆپه‌راسیۆنا «په‌نجا پلنگ» یا سالا رابووری، سوپایێ تركیێ پتری 18 نوقته‌یێن خوه‌ ل باشوور ب جی كرن، قه‌ره‌قوول چێكرن، تركیه‌ ژ بۆ خوه‌ رێیه‌ك چێكر، ئه‌ڤ رێ ژ «قله‌بانێ ده‌ست پێ دكه‌ت هه‌تا دگه‌هیته‌ حه‌فته‌نینێ»، په‌كه‌كێ هاریكارییا وێ كر، چونكه‌ قله‌بان و حه‌فته‌نین به‌ردان و جه‌نگاوه‌رێن ڤان ده‌ڤه‌ران خوه‌یا نه‌كرن، لێ به‌لێ رێڤه‌به‌رێن په‌كه‌كێ بێ شه‌رمیانه‌ د مه‌دیایێ دا‌ د گۆت: «مه‌ ل حه‌فته‌نینێ دنیا ل پێش چاڤێن تركیێ تاری كرییه‌»!!، ئه‌و وه‌سا د فكرن كو گه‌ل ده‌به‌نگه‌، حه‌قیقه‌تێ نزانیت‌ و فێم ناكه‌ت‌ چ قه‌ومی یه‌!.

د هێرشا 2019ێ یا ب ناڤێ «په‌نجا شێر 3» دا‌، په‌كه‌كێ ل سنۆرێ «شرنه‌خ و قله‌بانێ» ده‌ڤه‌رێن ستراتیجی یێن وه‌ك:

  • ‌دەریێ داوەتییا.

  • مێرگەشیشێ.

  • گویزێ.

د ناڤبه‌را چه‌ند رۆژان دا‌، ژ بۆ عه‌سكه‌رێ تركیێ هێلان و وه‌سا رێك ژ بۆ داگیركه‌رییا حه‌فته‌نینێ خوه‌ش كر.

پشتره‌ د ئۆپه‌راسیۆنا «په‌نجا پلنگ» دا،‌ په‌كه‌كه‌ ل سه‌ر ره‌ڤینێ ژ ده‌ڤه‌رێن خوه‌ به‌رده‌وام بوو و ترك كێشی لۆتکەیا خانتۆری و بەردەوامییا وێ یا باشوور كرن و ل ڤان ناڤچه‌یان:

  • گرێ کۆخێ مچوولی.

  • گرێ رەش.

  • گرێ دوپشکی.

  • گەزنکێ.

  • کۆخێ مەلە یەحیا.

  • شەش دارا و شەقۆلە.

  • شەهید بێریڤان، ئانکو بلنداهیێن گەلیێ پزاغا ژ دۆلا کەشانێ هەیا دەشتا تاقا، پەرەخ.

سوپایێ تركیێ ل ڤان هه‌موو ناڤچه‌یان جی گرت و نوقته‌ و قه‌ره‌قوول ئاڤا كرن.

پاش راده‌ستكرنا ڤان ناڤچه‌یان په‌كه‌كه‌ ب كۆده‌رێ دا‌ چوو؟

ئه‌رێ باشه‌ په‌كه‌كه‌ ب كوده‌رێ دا‌ چوو وه‌ختا كو ئه‌ڤ ده‌ر ژ بۆ تركیێ ڤالا كرین؟، به‌رسڤ پر هێسانه‌، ئه‌و هاتنه‌ د كووراهییا خاكا باشوور دا‌ و ژ خزیرانا سالا رابووری ئه‌و به‌رده‌وام یێ باز دده‌ن هه‌تا كو ترك كێشی دۆربه‌را ده‌ركارێ و باتووفێ كرین.

گه‌ر مرۆڤ بپرسیت ما قه‌ی په‌كه‌كێ چ شه‌ره‌ك ل ڤان ناڤچه‌یان نه‌كر؟ به‌لێ شه‌ر كر ل هه‌ر ده‌ره‌كێ هنده‌ك شه‌رێن بچووك بچووك یێن مینا له‌یستۆكێن زارۆكان كرن كو ئارمانج ژێ ئیستفزازا تركیێ بوو، ژ بۆ كو سوپایێ ترك بهێته‌ وان ناڤچه‌یان، په‌كه‌كه‌ د ڤان شه‌رێن بچووك دا‌ هه‌ر جارێ هنده‌ك ژ گه‌ریلایان فه‌دا دكه‌ت‌، جاران ژی ب ده‌ستێ خوه‌ قه‌تل كرینه‌ ژ بۆ كو پشتره‌ بهێت و ژ گه‌ل را‌ ببێژیت‌ مه‌ شه‌ر ل سه‌ر ڤێ ئاخێ كر و مه‌ شه‌هید داینه‌.

 ب كورتی ئەو دەڤەرێن ژ سالا 1990ێ هەتا نها كو د دەستێ پەکەکێ دا بوون، 80٪ نها د دەستێ سوپایێ ترکیێ دا نە، له‌وما پێدڤییه‌ گه‌لێ كورد ژ په‌كه‌كێ بپرسیت بۆچی وان ئه‌ڤ ده‌ڤه‌ر بێ شه‌ر چوول كرن و بۆچی وان ل به‌ر خوه‌ نه‌دا؟.

پارتیێن باشوور چ ده‌مه‌كێ په‌كه‌كه‌ نه‌كرییه‌ هه‌ده‌ف كو ژ باشوور ده‌ربێخن، وان ته‌نێ خوا‌ستییه‌ په‌كه‌كه‌ قادا خه‌باتا خوه‌ ببه‌ته‌‌ باكور و ل وێرێ گه‌لێ كورد سه‌رده‌ست بكه‌ت‌

سنۆرێ باشوور و باکورێ وه‌لات، ژ سالا 1986ێ ل ژێر کۆنترۆلا پەکەکێ یە، چ جاره‌كێ پارتی و ئێكه‌تیێ ئارمانج نەکرییە پەکەکێ دەربێخنه‌ دەرڤەی ڤان سنۆران، ب ته‌نێ وان خوا‌ستییە پەکەکە بەرێ خوە بدەته‌ باکور، شەرێ خوە ل وێرێ بمەشینت و تەداخولی کار، خەبات و ئیدارەیا باشوورێ کوردستانێ نەکەت.

جه‌میل باییك هه‌ر ل ناڤبه‌را چه‌ند رۆژان ل مه‌دیایێ ده‌ردكه‌ڤیت‌ و پارتی ب هاریكارییا داگیركه‌رییا ترك سووچدار دكه‌ت‌، باشه‌ مامێ جه‌میل ما پارتی ناڤچه‌یێن ستراتیجی یێن حه‌فته‌نینێ وه‌ك‌:

  • دەریێ داوەتییا.

  • مێرگەشیشێ.

  • خامتوور.

  • شەرانش.

  • شەشدارا.

دانه‌ ده‌ستێ تركیێ؟، ما پارتی بوو بێ شه‌ر ژ وان ناڤچه‌یان ره‌ڤی؟، ما قه‌ی ئه‌ڤ نه‌ 30 سالن په‌كه‌كه‌ د وان ناڤچه‌یان دا‌ بوو؟، بۆچی ته‌ شه‌ر نه‌كر و ئه‌ڤ ده‌ر نه‌ پاراستن؟، ما قه‌ی ل وی ئاستی هوون دفكرن كو گه‌ل ڤێ حه‌قیقه‌تێ نابینیت‌، به‌لێ گه‌ل باش دزانیت‌ كی ده‌به‌نگه‌ و كی هاریكارێ تفاقا ئاكه‌پێ و مه‌هه‌پێ یه‌!.

رۆژهه‌لاتا كوردستانێ

باییك: ئارمانج ژ غه‌یری رۆژھه‌لات داگیرکرنا ھەموو کوردستانێ یە

د به‌شه‌كێ گۆتنێن خوه‌ دا جه‌میل باییك دبێژیت‌: «ژ غه‌یری رۆژهه‌لاتا كوردستانێ، ئارمانج داگیركرنا هه‌رسێ پارچه‌یێن كوردستانێ یه‌»، جه‌میل باییك وه‌سا ئاخفتنا خوه‌ به‌رده‌وام دكه‌ت و دبێژیت:‌ «ئه‌ڤ هاریكارییا په‌ده‌كێ دێ بیته‌ ئه‌گه‌را داگیركرنا هه‌موو كوردستانێ، لێ ژبلی رۆژهه‌لات»، جه‌میل باییك ل ڤێرێ ب ده‌ڤێ خوه‌ ئیعتیرافێ دكه‌ت‌ كو وان په‌یوه‌ندیێن ستراتیجی د گه‌ل رژێما ئیرانێ دا هه‌نه‌ و په‌كه‌كه‌ ب ده‌ستوورا ئیرانێ ل خه‌تا سنۆرێ باشوور و رۆژهه‌لات ب جی بووینه‌، هه‌موه‌خت ژبیر نه‌كر كو باره‌گه‌هێن پژاكێ و سپایێ پاسداران ل ئۆرمیێ، ل كێله‌كا هه‌ڤن.

رۆژئاڤا، شنگال و میحوه‌رێ مقاوه‌مێ

باییك دبێژیت‌: ئه‌مێ عه‌ینی كراسی ل به‌ر شنگالێ ژی بكه‌ین

ل ده‌ربارا رۆژئاڤایێ كوردستانێ ژی جه‌میل باییك دبێژیت:‌ «داگیركه‌رییا ل سه‌ر عه‌فرینێ، سه‌رێ كانیێ و گرێ سپی و رۆژئاڤا، دێ ل شنگال مه‌خموور، مووسل و كه‌ركووكێ ژی به‌رده‌وام بیت»!‌، یا راست مامێ جومعا د ڤێ نوقتێ دا‌ حه‌قیقه‌تێ دبێژیت‌ و ئیعتیرافێ دكه‌ت‌ كو ده‌ستوه‌ردانا په‌كه‌كێ یا د رۆژئاڤایێ كوردستانێ دا، ئه‌گه‌رێ سه‌ره‌كی‌ یێ ژ ده‌ستچوونا عه‌فرینێ، سه‌رێ كانیێ و گرێ سپی بوو، هێژان ل بیرا گه‌له‌ به‌ری داگیركه‌رییا سه‌ر رۆژئاڤا پێك بهێت، جه‌میل باییك و موراد قارایلان چ دگۆت، مانه‌ دگۆت: «گه‌ر شه‌ره‌فا ئاردۆگان هه‌به‌ ئه‌و دێ هێرشا عه‌فرینێ بكه‌ت»؟!، ما نه‌دگۆت هه‌گه‌ر هێرش كر ئه‌م دێ سته‌نبۆل و ئه‌نقه‌رێ بشه‌وتینین؟!، پشتره‌ چ قه‌ومی؟، عه‌فرین چوو، سه‌رێ كانیێ و گرێ سپی ژی، لێ نه‌ سته‌نبۆل شه‌وتی و نه‌ژی ئه‌نقه‌ره.

ڤێ ئاخفتنا جه‌میل باییك پێدڤی ب چ شرۆڤه‌یان نینه‌، ئه‌و ب زه‌لالی دبێژیت‌: «كانێ ب چ ئاوایی مه‌ عه‌فرین، سه‌رێ كانیێ و گرێ سپی  د چه‌ند رۆژان دا بۆ تركیێ هێلان، ئه‌م دێ عه‌ینی كراسی ل به‌ر شنگالێ ژی بكه‌ین».

په‌كه‌كێ رێكێ ل سیاسه‌تا قڕكرنێ دگریت؟

جه‌میل باییك، د به‌شه‌كا ئاخفتنێن خوه‌ دا‌ دبێژیت‌: «ژ به‌ر كو رێخستنا په‌كه‌كێ رێكێ ل سیاسه‌تا قركرنا كوردان دگریت، ئه‌و دهێته‌ هه‌ده‌ف كرن»، گه‌لۆ پرسا ل ڤێرێ دهێته‌ كرن ئه‌ڤه‌یه‌‌، ما قه‌ی سیاسه‌تا رێگرتنێ ل ئینكارا گه‌ل، راده‌ستكرنا یێك ب یێك یا باژارێن كوردستانێ یه‌ ب داگیركه‌ران؟ یان ژی ئه‌ڤ سیاسه‌ت زمان درێژییا‌ ل سه‌ر مه‌دیایێ و ره‌ڤینا ل سه‌ر ئه‌ردی یه‌؟ ما قه‌ی ل عه‌فرینێ و سه‌رێ كانیێ ژی په‌ده‌كه‌ ل ور بوو كو ئالیكاریێ ژ تركیێ بكه‌؟ به‌لێ مامێ جه‌میل هه‌وه‌ راست گۆت، هوون دێ شنگالێ ژی د چه‌ند ده‌مژمێران دا ده‌نه‌ تركیێ و پشتره‌ زمانێ خوه‌ ل مه‌دیایێ ب قاسێ وه‌ریسه‌كی درێژ كه‌ن و بێژن: «پارتی هاریكارییا تركیێ كر»، هه‌گه‌ر هوون راست دبێژن و دخوازن شنگال ب ده‌ردێ عه‌فرینێ نه‌چیت، ژ شنگالێ ده‌ركه‌ڤن و چ به‌هانه‌یه‌كێ نه‌ده‌نه‌ ده‌ستێ تركیێ كو ڤێ هێرشێ پێك بینیت.

مه‌ژیكێ جومعا و مه‌ژیكێ ئالخماهۆ

هه‌گه‌ر پارتی زوله‌یخایێ گه‌نج ژی بكه‌ت، مامێ جومعا هه‌ر باوه‌ر ناكه‌ت!

ل داویێ ژی ئه‌م دێ ژ جه‌میل باییك را‌ بێژین، هوون ب ڤێ سیاسه‌تا خوه‌ یا رێخوه‌شكرنێ ژ بۆ داگیركرنا كوردستانێ چ شاشییان ناكه‌ن! هوون یێ ستراتیجییا گه‌نی یا ئاپۆی یا ب ناڤێ «براتییا گه‌لان» جێ به‌ جێ دكه‌ن؟ ئه‌و ستراتیجییا كو هه‌ر تشته‌كێ گه‌لێ كورد تێدا‌ بێ واته‌ دبیت، پارتییه‌كا‌ وه‌ك «پارتی» ژی كو ب درێژاهییا 30 سالێن رابووری هه‌موو هه‌وله‌ك دایه‌ ژ بۆ كو په‌كه‌كێ ڤه‌گه‌رینیت‌ سه‌ر خه‌تا نه‌ته‌وه‌یی، هوون ب سیخوڕی و هاریكارییا داگیركه‌ریێ شرۆڤه‌ دكه‌ن، مامێ جه‌میل ژ كه‌ره‌ما خوه‌ نه‌خشێ كوردستانێ دانه‌ به‌رچاڤێن خوه‌ و خه‌ته‌كێ بكێشه‌، وی ده‌می دێ زانی «گرۆپا ئه‌نقه‌رێ» چه‌ند ژ خاكا كوردستانێ فه‌دای ئاپۆی و سیاسه‌تا ده‌مۆكراتیك كرنا تركیێ كرییه‌، وی ده‌می دێ زانی شه‌رێ به‌رییا 30 سالان ل كیژان ناڤچه‌یان بوو و بۆچی هه‌وه‌ نها شه‌ر نێزیكی گوند و باژارۆكێن باشوور كر؟ مه‌ژیكێ هه‌وه‌ ئه‌و قاس ژ نه‌ته‌وه‌ و كوردبوونێ هشكبوویه‌، وه‌ك مه‌ژیكێ «ئالخماهۆ» لێ هاتییه‌ وه‌ختا كو «یووزارسیڤێ» پێغه‌مبه‌ر «زوله‌یخا» گه‌نج كری هه‌ر باوه‌ر پێ نه‌كر، له‌وما هه‌گه‌ر پارتی «مامێ جه‌میل» ژی گه‌نج بكه‌ت‌ و بینیته‌ به‌رییا 30 سالان، ئه‌و هه‌ر باوه‌ر ناكه‌ت كانێ كی ل سه‌ر خه‌تا نه‌ته‌وه‌یی و كوردبوونێ یه‌ و كی كه‌تییه‌ د خزمه‌تا داگیركه‌ریێ دا‌.

پوستێن ھەمان بەش