وەزارەتا بەرەڤانییا ئه‌مه‌ریكایێ راگه‌هاند، لێکۆلین ل سەر هێرشا ھەولێرێ دەستپێ کرینە و مافێ وانه بەرەڤانیێ ژ خوە بکەن و گۆت: به‌رسڤدانا هێرشا سه‌ر هه‌ولێرێ دێ د ده‌ما خوه دا بیت.
بەردەڤکێ وەزارەتا بەرەڤانییا ئه‌مه‌ریكایێ جۆنێ کێربی د جڤینا رۆژنامەڤانییا حه‌فتییانه دا به‌حسا دوو مژارێن گرنگ كر، یه‌ك ژێ هێرشا سه‌ر هه‌ولێرا پایته‌ختا باشوورێ كوردستانێ و یا دوویه‌مین په‌یوه‌ندیێن دگه‌ل هه‌سه‌دێ.
جۆن كێربی راگه‌ھاند کو لێکۆلین ل دەربارێ هێرشا مووشەکی یا ل سەر ھەولێرێ دەستپێکرییه و ئه‌مه‌ریكا ژی ئامادەیە رۆلا هاریكا د لێکۆلینێ دا بگێریت ئەگەر ژێ بهێته خواستن.
گۆت ژی: یا باشتر ئەوە چاڤەرێ بکه‌ین و بزانین ئەنجامێن لێکۆلینان دێ چاوا بن و نھا پرۆسەیا وەرگرتنا زانیارییان دەربارێ وێ یەکێ دەستپێ کرییە.
بەردەڤکێ پەنتاگۆنێ تەکەز کر کو مافێ ھێز و فەرماندارێن ئه‌مه‌ریكایێ یه بەرەڤانیێ ژ خوە بکه‌ن و گۆت: ئه‌و دێ ده‌م و جهێ به‌رسڤا هێرشا سه‌ر هه‌ولێرێ ده‌ست نیشان كه‌ن، لێ به‌لێ ب شێوه‌رمه‌ندی و هه‌ڤبه‌شی ل گه‌ل هه‌ڤپه‌یمانێن وان یێن ئیراقێ.
کێربی ھەروه‌ھا ئانی زمان كو ل ئیراق و سووریێ ئۆپەراسیۆنێن ئه‌مه‌ریكایێ ھێژ به‌رده‌وامن و ئەو ل سەر شه‌رێ دژی داعشێ ھەڤکارییا وان ل گەل ھێزێن سووریا دەمۆکراتیک بەردەوامە.
