پەکەکە د گوههرینا رۆژهڤێ و راستیێن دیرۆكی دا پێتر ژ هەر بیاڤەک دی قەهرەمانە، ئهڤ رێخستنە د خاپاندنا گهلێ کورد دا بێ ههمپایه، تشتا كو بالا مرۆڤ دكشینه ئهڤه، «گرۆپا ئهنقهرێ» هزر دکەت گهل ژ دهروێن وان باوهر دكهت، ئهو نزانن گهل ب چ رەنگا ل رویێن وان یێن قاییم دنێرین وهختا ل مهدیایێ دهردكهڤن و ئاوازا خوه یا قهدیم د ژهنن، گهر مرۆڤ ل دیرۆكا پهكهكێ ب زڤره و بوویهران دانیتە پال ههڤ، دێ چ خوهیا بیت، نه تشتهك، زاتهن کێشە ئهڤهیە، یهك دهستكەفتا پهكهكێ ژی ژ بۆ گهلێ كورد و دۆزا رهوا خوهیا نابیت، لێ بهلێ بهرهڤاژی ڤێ، دێ خزمهتهكا ههری هێژا دیار بیت كو رێخستنێ پێشكێشی داگیركهرێن كوردستانێ كرییه.
پاش 37 سالێن شهر ژ نوو پهكهكه دهێت و دبێژیتە گهلێ کورد: ئێدی ئهم دوژمنێ خوه ناس دكن!
قهی گهلێ كورد پێش دامەزراندنا پهكهكێ دوژمنێ خوه ناس نهدكر؟!
فەرماندارێ بریارگەھا ناڤەندییا ههپهگێ باھۆز ئەردال ل رۆژا 9/3/2021ێ بەشداری بەرنامەیا تایبەتا ستێرک تی ڤی بوو، وی د 45 دەقیقەیان دا، نرخاندن ژ بۆ جڤینا كهجهكێ، ئێریشا گارە، لهشكركێشییا تركیا، رۆژئاڤا كوردستانێ و دهولهتێن ههرێمی كر، ئهم دێ ل ڤر باس کەین كانێ ئهردال ب چ ئاوایی دهستكهفتیێن گهلێ كورد ژ بۆی رێخستنا خوه حهساب دكهت و ب چ ئاوایی ئهو بهحسا دهمۆكراتیك كرنا سووریێ و تركیێ دكهت و ب چ ئاویی نهرینا كهجهكێ ل همبهر باشوور و پێشمهرگههێن وێ دیار دكەت.
د مژارا جڤینا سالانه یا ههپهگێ دا، باهۆز ئهردال دبێژیت: «جڤینا مە ل سەر ئەزموونا شەرێ 37 سالان ئەڤ مژارە ھەموو نرخاندن، ئەم خوەدی ئەزموونەکا شەری یا مەزنین، ئەم ئارتێشا ل ھەمبەر خوە باش ناس دکەین، ئەم ھێزا خوە ژی باش ناس دکەین، د ڤی ملی دا ئەم باوەرن کو ئەنجامێن جڤینا مە دێ باندۆرەک ئەرێنی ل سەر پەرفۆرمانسا گەریلا یا سالا نوو بکەت».
ئەڤ ئاخافتنا ئەردال هەر ب وێ واتەیێ دهێت کو ب ئاوایەک نە راستەراست ببێژیت: «پهكهكی د 40 سالێن خوه دا، تو دهستكەفتییهك ژ بۆ گهلێ كورد دەستەبەر نەکریە، تهنێ د 37 سالێن رابووری دا، گهریلا بوونه خوهدی ئهزموونهكا مهزن یا شهری، ههم دبێژیت ئێدی ئهم گهشتینه وی ئاستی كو ئهم دوژمنێ خوه باش ناس دكهین». ژ بلی ڤێ یەکێ هیچ واتایەکا دی ژ بۆی نرخاندنا سڤک یا ئەردال نینە.
گەلۆ قەی سەردەما ئاخافتنێن بێ ئەنجام مایە؟ قەی ئەردال وە دزانیت ب باس کرن ل قەهرەمانیا گەریلایان دێ کاریت مالباتێن وان رازی بکەت، ئەو مالباتێن کور، کەچ، باڤ و هتد.. چوویی و تەڤلی پەکەکێ بووی ژ بۆی رزگارکرنا کوردستانێ، لێ نها پەکەکە وان ب کوشتن ددەت و نکاریت هیچ جیهەکێ ئازاد بکەت و خوینا وان ب هەروە دچیت؟ نە ب هیچ رەنگەکێ گەلێ کورد ئێدی ب ڤان ئاخافتنان نایێن خاپاندن، ئەو دخوازن ل جیهێ خوینا گەریلایان ئەنجامەک وەها دەرکەڤیتە پێش کو ل گۆری بهایێ خوینا کەچ و کورێن وان بیت، سەردەما خاپاندنێ و سەمینارێن بێ واتە و دوبارە ئێدی ب داوی هاتیە.
ژ خوه كورد د ئهزهل دا جهنگاوهر و قەهرەمانن، قهی بهرییا پهكهكێ گهلێ كورد دوژمنێ خوه ناس نهدكر كو ئهردال ژ نوو ڤه و پاش 43 سالان دهێت و دبێژیت: ئەڤە ئهمین، مه دهستكەفتییهكێ مهزن ژ بۆ گهل ئانی، ئێدی ئهم دوژمنێ خوه باش ناس دكەین!. گەر ئینسان پیچەک ب عاقل بیت، پیچەک شعوور هەبیت و هند روو قاییم نەبیت نە 43 سالا بەلکو 43 چرکە بەسن کو دوژمنێ خوە ناس بکەت، دوژمنێن کوردا پێش پەکەکێ هەبوونە پاش پەکەکێ ژی دێ هەبن و هەر کوردەک ب ئەخلاق و نیشتمانپەروەر وەکو چەوا خوە و دایکا خوە ناس دکەت، وسا ژی دوژمنێن خوە ناس دکەت، پێدڤی ب چ ئەردال و مەردالا نینە دوژمنان ب وان بدەتە ناساندن.
گهر نه ژبەر پهكهكێ بیت، هیچ تشتهك ل رۆژئاڤا و باشوور نامینیت!
د مهسهلهیا باشوورێ كوردستانێ دا، باهۆز ئهردال دبێژیت: «ترك نه ژبۆی مه ب تهنێ تێن، پهدهكه دبێژیت ب سهدهما پهكهكێ گوندی نكارن رحهت بچنە سهر گوندێن خوه».
ئهردال ڤێ مژارێ ووسا ب روو قایمی باس دكهت، ههر وهكو وان هیچ تشتهك ل باشوور نهكرییه، ههر وهكو وان 650 گوندێن باشوور داگیر نهكرینه، ههر وهكو وان هیچ گوندیەکێ ڤان گوندان ب ناحهق نەکوشتینە، گهلێ باشوور باش دزانیت ئهو ژ بهر چ نكارن رحهت بچنە سهر گوندێن خوه، باش دزانیت كینه كو بوویه سهدهم رۆژ بۆ رۆژێ شهر پێتر نێزیکی گوند و باژارۆكێن وان ببیت، باش دزانیت كو پهكهكه بوویه پرا دهرباسبوونا تركیێ ژ بۆ ناڤچهیێن وان، گەر نە ب ڤی رەنگی بیت، چما ژ باشوور دەرناکەڤیت؟! گەر کوردستانێ ب یەک پارچە دبینیت و سنۆرێن دەست چێکری یێن کوردستانێ ناس ناکەت، چما ناچیتە رۆژهلات و ل وڕ ئێریشی ترکیا ناکەت؟!! ژ خوە گەر کارەکی ب وی ئاوا بکەت دبیت ببیتە سەدەمەک ژ بۆی ب شەر چوونا دو دوژمنێن کوردان کو ئەو ژی ئیران و ترکیا نە، لێ هەم ئەم هەم پەکەکە باش دزانین چما ووسا ناکەت، ژبەرکو نە ئیران و نە ترکیا رێکێ پێ نادن، ئەو دخوازن پەکەکە ل باشوورێ وەلات بیت، داکو بکارن هەر رۆژ باشوور بۆمبەباران بکەن و رێ نەدەن کورد د ڤێ پارچەیا ئازاد دا رحەت رازێن، ئەو دخوازن ب بەهانەیا پەکەکێ بێنە باشوور و ستاتۆیا باشوور ژناڤ ببەن، بەلێ راستی ئەڤەیە و هەر کەس باش دزانیت.
رێزگرتن ل جهم پهكهكێ چی یه؟
باهۆز ئهردال دبێژیت: «رێڤەبەرییا مەیا كهجهكێ ب ئاوایەک ئاشکەرا گۆت کو ئەم رێزێ ل رێڤەبەری و پێشمەرگەیێن باشوور دگرین و ئەم ناس دکەین، د ڤی ملی دا ھەلوەستا مە دیارە، پێویستە رێڤەبەرییا باشوور ژی دەرکەڤیت و ببێژیت ئەم رێزێ ل تەکۆشینا پهكهكێ و گەلێ باکور دگرین، ئەم رێزێ ل رێڤەبەرییا خوەسەر و گەلێ رۆژئاڤایێ کوردستانێ دگرین، ئەڤ یەک ئەرکەک کوردستانی و نەتەوی یە ل سەر رێڤەبەرییا باشوورێ کوردستانێ.«
پرسا ل ڤر دهێتە كرن، ئهڤهیە: گهلۆ ئهڤە چ رێزه پهكهكه ل رێڤهبهرییا باشوور و پێشمهرگههان دگریت؟ قهی ئێریشا سهر پێشمهرگهی ل ئامێدیێ، چهمانكێ و سحێلا و شەهیدکرنا وان رێزگرتنه؟ قهی تهرۆر كرنا بهرپرسێن ئهولههیێ یێن باشوور د ناڤا زارۆكێن وان دا دبیته رێزگرتن؟ قهی مرۆڤ دكاریت ناڤێ رێزگرتنێ ل تهقاندنا بۆرییا پهترۆلا كوردستانێ بكهت ئهوا كو پهكهكێ ب تهرزێ تهرۆرا داعشێ تهقاندی؟ گەلۆ ئاڤاکرنا هندەک هەرێمێن ساختە ل بن هندەک ناڤێن ساختە د ناڤا باشوورێ کوردستانێ دا و رێنەدان ب حکوومەتا باشوور تێکەڤە وان هەرێمان ما قەی رێزگرتنە؟! پەکەکێ ب دەهان هەرێمێن جودا ل باشوور دروست کرینە و ب بەهانەیا ناڤچەیا عەسکەری نە رێ ددەت گەلێ سڤیل تێکەڤە وان ناڤچەیان نە ژی رێ ددەت حکوومەتا باشوور تێکەڤە ور، ژ خوە ل بیرا مە نەچوویە دەما ل ئامێدیێ پەکەکێ گوللـە بەردای پەرەشۆتڤانەکێ ئامێدیێ، و گۆت ئەڤ ناڤچە، ناڤچەیەک عەسکەریە نابیت کەس تێکەڤە ڤر، نە ل ئاسیمان نە ل ئەردێ!
یا راست رێڤهبهرییا باشوورێ كوردستانێ تو جاران پهكهكه نهكرییه ههدهف كو وان ژ باشوور دهرخیت، بهلكو ههرتم ژێ خوهستییه تهداخولی كار و خهباتێن وێ نهكهت و مهیدانا شهرێ خوه ببهت باكور كو جهێ ئهساس یێ پهكهكێ یه. هیچ کەس، ئالی و هێزەکا دی وەکو حکوومەتا باشوورێ کوردستانێ رێزێ ل پەکەکێ ناگریت.
نه ژ پهكهكه بیت كهس باشوور ناس ناكەت!
ئالایا سووریێ ژ بۆ مه نه پرسگرێكه؟ ئهم دخوازین سووریێ دهمۆكراتیك بكەین؟
باهۆز ئهردال د بهشهكێ دی یێ گۆتنێن خوه دا پر ب روو قایمی دبێژیت: «نه ژ پهكهكه بیت، تشتهك ل رۆژئاڤا و باشوور نهدبوو»!
ل ڤر پێویسته گهلێ رۆژئاڤا ڤێ پرسێ ژ ئهردال و گرۆپا ئهنقهرێ بكهت: قهی رادهست كرنا عهفرینێ، سهرێ كانیێ و گرێ سپی هوون ب دهستكهتی دزانن؟ ههروها پێویسته گهلێ باشوور ژی ڤێ پرسێ ژ وان رووقایمان بكهت: قهی ئاپۆ باشوور رزگار كرییه كو هوون تێن و دبێژن گهر پهكهكه نهبا تشتهك ل باشوور نهدبوو؟! ئەو ب چ ئاوا باسی خەباتا کوردێن باشوور و پێشمەرگەیێن کوردستانێ ناکەت، هەر وەک پێشمەرگە پالێ پیشی بیت، و چ جاران خەبات نەکربیت، هەموو دەستکەفتێن باشوور، هەبوونا باشوور ژی ب سایا پەکەکێ دبینیت! نە ئەردال بەگ نە، ب سایا پێشمەرگە نەبیت نها تو ژی نەدکاری رحەت رازێی، پێشمەرگە پارێزڤانێ کوردستانێ یە، هەیا کو پێشمەرگە هەبیت کوردستان پاراستیە، تو نکاری خوە بپارێزی چەوا دێ کوردستانێ بپارێزی؟!
ئهردال ههروهها گۆتنێن خوه ل دهربارا رۆژئاڤا ووسا دهوام دكهت: «ئالایا سووریێ ژ بۆ مه نه پرسگرێكه؟ ئهم دخوازن سووریێ دهمۆكراتیك بكەین»
ل ڤر ئەردال وەکو سەرۆکێ خو دپەیڤیت، ئاپۆ ژی دەما هاتیە گرتن گۆت ئهم دخوازین تركیێ دهمۆكراتیك بكەین! مهبهستا پهكهكێ ژ دهمۆكراتیك كرنا تركیێ و سووریێ كۆله كرن و ئاسمیلهكرنا گهلێ كورده د ناڤا جڤاكێن ترك و عهرهب دا، ههگهر نا هوون ب چ ئاوا تێن و دبێژن ئالایێ سووریێ ژ بۆ مە نه پرسگرێكه! ما عهینی ئالا نینه كو ب دههان ساله جوانێن كورد ل ژێر تێن قهتل كرن و گهلێ كورد ل ژێر دهێنە بێ رومهت كرن؟ ئەڤ ژ ئالیەکێ ژ ئالیەکێ دی فەرە ئەم بپرسین گەلۆ چما پەکەکێ پرسگرێک ب ئالا کوردستانێ رە هەیە؟! چما رێ نادەن ل رۆژئاڤا بهێتە بلندکرن؟! ئاخافتنا ئەردال یەک تشتی ب زەلالی ئیسپات دکەت ئەوژی ئەڤەیە کو پەکەکێ ژ بلی ئالایێ کوردستانێ، هیچ پرسگرێکەک ل گەل ئالایەکێ دی نینە، ب تەنێ ئالایێ کوردستانێ یە کو پەکەکە قەبوول ناکەت.
سهركهتنا پێشمهرگههان ل كۆبانیێ ژ بۆ خوه حهساب دكه
ل دهربارا شهرێ داعشێ و كۆبانیێ ئهردال د بهشهكا ڤێ ههڤدیتنا خوه یا ل گەل ستێرك تی ڤی یێ دا گۆت: «ههگهر نه ژ پهكهكێ با دا چ ل كۆبانیێ چێ بیت؟! ههروها ووسا باس دكهت كو پهكهكێ كۆبانیێ سهردهست كرییه و دبێژیت: رێخستنێ فهداكاریێن مهزن ل ور دان».
باهۆز ل ڤێره دهێت و وهكه باهۆزێ ب ناڤ بهرپرێن دیرۆكێ دکەڤیت و ههر تشتی سهر و بن دكەت، رهڤیان و شكهستنا پهكهكێ دكهتە سهركەفتن، لێ یا راست ههر كهس دزانیت كۆبانیێ ب هاریکارییا كیژان هێزا نشتیمانپهروهر هاتە رزگار كرن، ههر كهس دزانیت بهریا پێشمهرگههێن باشوورێ وهلات بگەهنە كۆبانیێ، تەرۆریستێن داعشێ 80% یا كۆبانیێ داگیر كربوو، ههر كهس دزانیت پێشمهرگههێن باشوور دەما گهیشتی قادا شهر ل كۆبانیێ ب چ ئاوایی د ناڤبهرا چهند رۆژان دا ههڤسهنگییا هێزێ گوههراند و نههشت كۆبانیێ بكهڤیت.
هەر وەک چەوا دەنگێ دەهۆلێ ژ دوور خوەشە، دەنگێ پەکەکێ و بەرپرسێن وێ ژی ژ دوور خوەشە، ژ بۆی گەلێ باشوور و باکور کو ل نێزیک گوهداری دەنگێ پەکەکێ دبن، قەت دەنگەک خوەش نینە، ئەو باش فام دکەن ئەڤ دەنگە چەند نەخوەشە و چەوا ب ئاوازا ترکچیتیێ ژ دەڤێ رایەدارێن پەکەکێ دەردکەڤیت. گەرەکە پەکەکە ئەو قاس بێ ئەخلاق نەبیت کو کوردان ب نەزان و کۆلەیێن خوە بحەسێبینیت، کورد هشیارن و باش دزانن پەکەکە نها بوویە دارێ د دەستێ دوژمنێن کوردستانێ دا.
هەر هندە!
