هاریکارێ وەزیرێ دەرڤەیێ ئەمەریکا بۆ کارووبارێن رۆژھلاتا ناڤین جۆی ھۆد د بیرئانینا حەلەبجەیێ دا کو ل واشنگتۆنێ ب ئاوایەکێ ڤیدیۆ-کۆنفەرانس برێڤە چوو، راگھاند؛ ئەمەریکا دێ پابەند بیت ب پاراستنا ھەرێما کوردستانێ، ژ بۆ ڤێ مەبەستێ ژی ھەبوونەکق مە یا سەربازی و سیاسی ل ھەرێمێ ھەیە و مە چەندین ملیۆن دۆلار ژ بۆ پێکڤەژیانێ ل ئیراقێ خەرج کرینە.
جۆی ھۆد دیار کر: “ئەو بوویەرا تال مە ھان ددەت کو ئەم چ جاران رێ نەدین دوبارەبوونا وان، ب تایبەتی رێ لبەرگرتنا بەشار ئەسەد و ل ھەر دەرێ کو ئەم گومان بکین، رێ نادین دوبارەبوونێ و ئەم رێ نادین ئیرانێ ژی دەستێ خوە بگھینە چەکا ئەتۆمی.”
ھۆد تەکەز کر: “نابیت ئەم ئێش و ژانێن گەلێ کوردستانێ ژبیر بکین، ب تایبەتی ل ئیراقێ. ھەروھا ئەز بیرا بینم دەما پاپایێ ڤاتیکانێ ل ھەرێما کوردستانێ ل بەرامبەر ھەزاران کەسا مەراسیما ئۆلی برێڤە دبر، نابیت ئەڤە بهێتە ژبیرکرن کو ھەرێما کوردستانێ بحەشتا پێکڤەژیان و براتیێ یە ل ئیراقێ، ھەروھا ڤەکرنا بەشەکا دیرۆکییە ژ بۆ گەلێ کوردستانێ و نابیت ئەم ڤان دەستکەفتان ژبیر بکەین و دڤێت ئەم وان بپارێزن، ئەم وەکو ئەمەریکایێ پابەندین ب پاراستنا ڤان نرخان.”
د بەشەکا دی یا ئاخافتنا خوە دا جۆی ھۆد دیار کر: “حکوومەتا ئەمەریکایێ ب چەندین جوورەیان دێ بەردەوام بیت د پشتەڤانیکرنا ھەرێما کوردستانێ دا، ھەبوونا مە یا سەربازی ل هەموو ھەرێمێ ھەیە، ھەبوونەکا مەیا سیاسی یا مەزن ژی ل ئیراق و ھەرێما کوردستانێ ھەیە و مە ژ بۆ ڤێ مەبەستێ چەندین ملیۆن دۆلار خەرج کرنە. مە ھەر دەم ھەول دایە کو ئەم ڤێ پێکڤەژیانێ بپارێزن، کو ئەڤ جوورەیەک ژ پاراستنا ھەرێما کوردستانێ یە.
