لاهور گه‌فا راده‌ستكرنا پێشمه‌رگێ كۆمه‌لێ ب ئیرانێ دكه‌ت
لاهور شێخ جه‌نگی یێ هه‌ڤسه‌رۆكێ یه‌كێتییا نشتیمانییا كوردستانێ، گه‌فا راده‌ستكرنا پێشمه‌رگه‌یێ رۆژهلات ب رژێما ئیرانێ دكه‌ت و هێزهكا چه‌كدار شاندییه سه‌ر باره‌گه‌ها كۆمه‌لا شۆره‌شگه‌ر و گه‌ف لێ كرنه.
ل گۆری ئاگاهیێن ده‌ستێ مه، دوهی رۆژا شه‌مبی 17/4/2021ێ، هێزهكا چه‌كدار ب فه‌رمانا لاهورێ جه‌نگی، ب سه‌ر باره‌گه‌ها كۆمه‌لا شۆره‌شگه‌ر یا زه‌حمه‌تكێشێن كوردستانا ئیرانێ دا گرتییه و گه‌ف لێ كرنه كو هه‌گه‌ر كۆمه‌له زه‌لالكرنه‌كێ ل ده‌ربارا پێشمه‌رگه‌یێ كو ل سلێمانیێ به‌رزه بوویی نه‌ده‌ت، ل وی ده‌می دێ ئه‌ندامێن باره‌گه‌ها كۆمه‌لێ راده‌ستی ئیرانێ كه‌ن.
ل رۆژا سێشه‌مبییا رابووری 13/4/2021ێ، سمكۆ به‌نفشی، پێشمه‌رگه‌یێ كۆمه‌لا شۆره‌شگه‌ر یا زه‌حمه‌تكێشێن كوردستانا ئیرانێ، ده‌رباسی سلێمانیێ بوو، ژ وێ رۆژێ ڤه ئه‌و به‌رزه‌یه و ئاگاهی ل ده‌ربارا چاره‌نڤیسا وی نینن، كۆمه‌لا شۆره‌شگه‌ر راگه‌هاند، ئه‌و ل به‌ندا رێڤه‌به‌رییا ئاساییشا سلێمانیێ نه ژ بۆ كو زه‌لالكرنه‌كێ ل ده‌ربارا سمكۆ بده‌ن.
گه‌لێ رۆژهلات ترس هه‌یه لاهورێ جه‌نگی سمكۆ به‌نفشی وه‌ك مسته‌فا سه‌لیمی راده‌ستی ئیرانێ بكه‌ت
پاش ئیفشا بوونا نووچه‌یا به‌رزه بوونا سمكۆ به‌نفشی، كارڤه‌دانێن هه‌ری دژوار ل رۆژهلاتا كوردستانێ چێبوونه، گه‌لێ رۆژهلات ترسا وێ یه‌كێ هه‌یه كو سمكۆ ژ هێلا لاهور جه‌نگی ڤه هاتبیته بن چاڤ كرن، هه‌م ده‌م راده‌ست كرنا وی ب رژێما ئیرانێ ب كاره‌كی دوور نابینن وه‌ك چاوا ل سالا رابووری مسته‌فا سه‌لیمی راده‌ست كری.
سكر‌تاریه‌تا كۆمه‌لێ داخویانی ل ده‌ربارا چاره‌نڤیسا سمكۆ دا و راگه‌هاند، ئه‌م هاتنه هایدار كرن كو سمكۆ به‌نفشی ژ هێلا هێزێن ئه‌وله‌هیێ ڤه ب جینایه‌تا سیخۆریێ هاتییه بن چاڤ كرن و ئه‌شكه‌ره كر ئه‌و ل به‌ندا لێكۆلینانه و بێی كو بده‌نه دیار كرن كانێ ڤی كه‌سی سیخۆری ژ بۆ چ ئالییه‌كی كرییه.
گۆمانا گه‌لێ رۆژهلاتا كوردستانێ راستییه‌كه، ژ به‌ر كو سروه ناسری ئه‌نداما كۆمیتا ناڤه‌ندی یا كۆمه‌لێ ئه‌شكه‌ره كر كو سمكۆ به‌نفشی ژ هێلا چه‌كدارێن لاهور ڤه هاتییه بن چاڤ كرن و جینایه‌تا سیخۆرتیێ ژ بۆ هاتییه چێكرن.
چاڤكانیێن مه ل باشوورێ كوردستانێ ئه‌شكه‌ره كرنه، هێزا كو ب سه‌ر باره‌گه‌ها كۆمه‌لا شۆره‌شگه‌ر دا گرتی، گه‌ف ل ئه‌ندام و كادرێن كۆمه‌لێ كرینه كو هه‌گه‌ر ئه‌و زه‌لال كرنه‌كێ ل ده‌ربارا ڤێ مژارێ نه‌دن و دێ وان راده‌ستی ئیرانێ كه‌ن.
هێژای گۆتنێ یه، ل سالا رابووی مسته‌فا سه‌لیمی زیندانیێ كورد پاش كو ژ زیندانێ ره‌ڤیایی و په‌نا بۆ سلێمانیێ بری، ژ هێلا لاهور ڤه دهێته بن چاڤ كرن و راده‌ست كرن ب ئیرانێ، ئیرانێ هه‌ر راست ئه‌و سێداره دا.
ل هه‌مان سالێ عه‌لی قایار هه‌ڤسه‌رۆكێ هه‌ده‌پێ یێ باژارێ سێرتێ كو ژ بۆ كارێن بازرگانی هاتبوو سلێمانیێ ژ وێ ده‌مێ ڤه به‌رزه‌یه و چاره‌نڤیسا وی نه‌دیاره.
