رێخستنا په‌كه‌كێ كو ژ ده‌ما نه‌مانا ته‌رۆرا داعشێ بوویه ئاسته‌نگ ل به‌ر ڤه‌گه‌رینا په‌نابه‌رێن شنگالێ، دخوازیت ب گۆتنا «بژی سه‌رۆك ئاپۆ» و «بێ سه‌رۆك ژیان نابه»، ژیانێ ڤه‌گه‌رینیته شنگالێ.
چاڤكانیێن پێگه‌ها داركا مازی ل باشوورێ كوردستانێ ئا‌شكه‌را كر، نێزیکی 600 مالباتێن ئاواره و په‌نابه‌رێن ئێزدی پاش په‌یمانا ئۆكتۆبه‌را سالا رابووری یا شنگالێ ڤه‌گه‌رینه جهـ و وارێن خوه، ئاواره‌یان به‌حسا ره‌وشا شنگالێ و ئاوایێ ژیانا ل وێ ده‌رێ ل گه‌ل په‌كه‌كێ كرنه.
چاڤكانیێن مه ل باشوورێ كوردستانێ ئاگاهی ژ هنده‌ك ئاواره‌یێن ڤه‌گه‌ریایی ستاندنە، وان باس ل لڤ و ته‌ڤگه‌رێن هێزێن گرێدای په‌كه‌كێ و حه‌شدا شه‌عبی كرن، كانێ ب چ ئاوایی دخوازن شنگالێ ئاڤه‌دان بكه‌ن.
یه‌ك ژ ئاواره‌یێن ئێزدی ژ بۆی پێگه‌ها مه گۆت: «رێخستنێن په‌كه‌كێ وێنه و سلۆگانێن خوه ل هه‌ر ده‌را شنگالێ دانینه، دخوازیت ب گۆتنا «بژی سه‌رۆك ئاپۆ» شنگالێ ئاڤه‌دان بكه‌ت و ژیانێ لێ خۆرت بكه‌ت، ئاواره‌یێن ئێزدی ژ ناچاری ڤه‌دگه‌رن، په‌كه‌كه ئاسته‌نگییان ژ بۆ ڤه‌گه‌رینا وان چێدكه‌ت.
رێڤه‌به‌رییا شنگالێ ل پێنجشه‌مبا رابووری 15/4/2021ێ ئا‌شكه‌را كر، پاش په‌یمانا شنگالێ ئه‌وا ل ئۆكتۆبه‌را سالا رابووری د ناڤبەرا حكوومه‌تا باشوورێ كوردستانێ و حكوومه‌تا ئیراقێ دا هاتییه ئیمزا كرن، نێزیکی 600 مالباتێن ئێزدی ڤه‌گه‌رینه وارێ خوه، لێ به‌لێ پێترییا وان جاره‌كا دی ب سه‌ده‌ما په‌كه‌كێ و حه‌شدا شه‌عبی ئاواره بوون و ڤه‌گه‌رینە ژیانا دل ب ئێش یا كامپان ل سینۆرێ پارێزگه‌ها دهۆكێ.
ئاواره‌یێن ئێزدی ژ نووڤه مه‌به‌ستا رێخستنا په‌كه‌كێ ژ گۆتنا «بێ سه‌رۆك ژیان نابه» فێم دکەن، ژ نووڤه زانین كو په‌كه‌كه ل ژێر ڤێ گۆتنێ دخوازه ژیانێ ل به‌ر گه‌لێ كورد ره‌ش و تاری بكه‌ت، ژ نوو فێم كرنە كو هه‌ر ئه‌ڤ گۆتنە سه‌ده‌ما سه‌ره‌كی‌یه كو شنگال هه‌تا رۆژا مه یا ئیرۆ وێران، كاڤل و بێ ژیان مایه.
شنگالی دبێژن ب سلۆگان و وێنە و درۆشمە ئاڤێتنان شنگال ئاڤەدان نابیت و ژیان ناڤەگەریتە شنگالێ، گەر پەکەکە بخوازیت ژیان ڤەگەریتە شنگالێ و دیسا گەلێ ئێزدی وەکو ئینسانان ل شنگالێ بژین پێویستە شنگالێ ژ چەکداران ڤالا بکەت، کەچ و خۆرتێن وان ب زۆرێ چەکدار نەکەت، رێ بدەت رێڤەبەریەک سڤیل شنگالێ ب رێڤە ببەت و شنگال ژ ئالا پەکەکێ و گرووپێن سەر ب وێ ڤە و وێنەیێن ئۆجەلان و پانکارتێن کو ل هەر دەری تێنە دیتن و ئاخافتنێن بێ واتە ل سەر نڤیساندنە بهێتە پاکژ کرن، ئەو دبێژن هەیا کو ملیسێن حەشدا شەعبی و حەشدا کوردی “پەکەکە” ل شنگالێ بن ژیان ل شنگالێ دێ پر ب زەحمەت بیت.
یەک دی ژ ئێزدیێن شەنگالێ دبێژیت، پەکەکە وەکو حزبا بەعسا سەدام حوسێن تەڤ دگەریت، وەکە چەوا حزبا بەعس گەل ناچار دکر ب دەنگەک بلند ببێژن ” بالروح بالدم نفدیک یا صدام” پەکەکە ژی هەر ب وی ئاوا گەل ناچار دکەت کو ببێژیت “ب جان ب خوین ئەم ب تەرە نە ئەی سەرۆک”، لێ ب راستی نە کەسەک ب جان و خوین ب ئۆجەلان را یە نە ژی کەسەک دخوازیت خوە فیدا بکەت، گەل ئێزدی دخوازیت دیسا ژیانەکا ب رومەت و نۆرمال دەرباس بکەت، دخوازیت ژیان وەکە بەرێ ڤەگەریت و شەنگال ژ چەکداران و رەوشا میلیتاری دەرباس ببیت، ئەم هیچ تشتەکێ ناخوازین، ب تەنێ ئەم دخوازین وەکە هەر ئینسانەک دی ژیانەک نۆرمال دەرباس بکین.
ل گۆر په‌یمانا شنگالێ پێویستە په‌كه‌كه و حه‌شدا شه‌عبی شنگالێ چۆل بكەن. هه‌م ده‌م ئەڤ رێکەفتنە گارانتییا ئاڤه‌دان كرنا شنگالێ و ڤه‌گه‌رینا ئاواره‌یێن ئێزدی دكەت، لێ به‌لێ رێخستنا په‌كه‌كێ و حه‌شدا شه‌عبی كو پشتگرییا خوه ژ ئیرانێ دستینن، ره‌د دكەن شنگالێ چۆل بكه‌ن.
