وەزیرێ دەرڤەیێ ئوکراینایێ دمیترۆ کولەبا راگھاند کو د دەمەکێ کێم دا رووسیا دێ ھەژمارا لەشکەرێن خوە سەر سنۆرێ ئوکراینایێ گەهینیتە بێھتر ژ 120 ھەزار لەشکەرا، ھەروھا بانگ ل وەلاتێن ئەورۆپایێ کر سزایێن ئابۆری یێن توند سەر مۆسکۆیێ بسەپینن.
ئوکراینا، ئامەریکا و ناتۆ دلگرانن دەربارێ بەلاڤکرنا لەشکەرێن رووسی ل نێزیکی سنۆرێ ئوکراینا و ل نیڤ گزیرتا قرمێ کو د 2014ێ رووسیا دەست دانابوو سەر.
بەرپرسێن ئەورۆپی دبێژن کو ھەژمارا ھێزێن رووسی نھا ل نیڤ گزیرتا قرمێ بێھترە ژ دەما کو رووسیا دەست دانای سەر وێ نیڤ گزیرتێ.
ژ لایێ خوە ڤە رووسیا راگھاند ئەو دێ بۆ دەما 3 حەفتیان راھێنانێن لەشکەری ل وێ دەرێ کەن دا کو ئامادەباشیا ھێزێن خوە تێست بکەن بۆ بەرسڤدانا گەفێن ناتۆیێ.
دەمەکە ل رۆژھلاتێ ئوکراینایێ ل ھەرێما دۆنباس ئالۆزی دناڤبەرا ھێزێن ئوکراینا و جووداخوازێن سەر ب رووسیایێ دەرکەتیە و رووسیا ھێزێن خوە ل سەر سنۆرێ ئوکراینایێ بەلاڤ کرنە بۆ پشتگریکرنا ئالیگرێن خوە ل دژی ھێزێن ئوکراینایێ.
