زمان دهربرینا مەژیکی یە، واتە مروڤ ب چ رەنگی هزربكهت دێ زمان وەسا وێ هزرێ بهرچاڤ کەت، لێ بەلێ، ب مەرجەکێ کو زمان راستی بێژ بیت بەرامبەری هزرا مروڤی.
ئیرۆ مە پیچەکێ چاپەمەنیا ترکیا و پەکەکێ شۆپاند، مە ب هووری نووچەیێن هەر دو ئالیان دەربارا ئۆپەراسیۆنا ل سەر باشوورێ کوردستانێ ب گشتی و ب تایبەتی زنارا کێستە کو ئەڤ دەما سێ رۆژانە دهێتە مەشاندن شۆپاندن.
شهر دناڤبهرا دو لایەنان دا یە، ئهو لایەن ژى لەشکرێ ترکیا و هیزێن پارستنا گهل “هەپەگە” نە، جهێ شهر ل دهێتە کرن نه ولاتێ ترکیا یە و نه باكورێ كوردستانێ یه، بهلكو جههكه کو ب كوردهوارى دبێژنێ باشورێ كوردستانێ و ب یاسایی دبێژنێ ههرێما كوردستانا ئیراقێ.
د چاپەمەنیا ههردو لایەنان دا، ب درستى و راستى لسهر چهوانیا ڤى شهرى و ئهنجامێن وێ نووچە ناهێنە دروست کرن، ههردو لایەن خوە ب سەرکەفتی نیشان ددەن، ب راستی داخویانیێن وان جهێ پێكهنینێ نه، داخویانیێن وان ب ئاوایەکێ جیهێ کەنی نە کو هەپەگێ نڤیساندیە، “مه د ناڤا تونێلان دا ل زنارا چیایێ كێسته سەیەک كوشتیە و دەست ب سەر كامێرا چاڤدێریێ دا گرتیە”. یا ئەم دخوازین بێژن ئەڤەیە كا چاوا ههردو لایەن ناڤێ جهێ شهرى بهرچاڤدكەن، د چاپەمەنیا ترکیا دا دبێژن ل باكورێ عیراقێ و ئەڤ ب ناڤ کرنە تشتەکێ نورماله ژبەرکو ترکیا دەولەتەک داگیرکار و دوژمنا کوردا یە، هەر وسا هەر کەس باش فێم دكهت بۆچی د چاپەمەنیا ترکیا دا وەسا باشوورێ کوردستانێ دهێتە ب ناڤ کرن. لێ بەلێ، یا سەرنجراکێش داخویانیێن پارتیا كاركهرێن كوردستانێ و هێزا پارستنا گهلن كو نه ژ دوور و نه ژ نێزیک ناڤێ دروست یێ جهێ شهری نابێژن ، گهر ب كوردهوارى هزر بکەن پێدڤیە بێژن باشورێ كوردستانێ، گهر ب قانوونی هزر بكەن پێدڤیە بێژن ههرێما كوردستانا عیراقێ – پارێزگهها دهوكێ – قەزا ئامێدیی، لێ ئهو دبێژن هەرێمێن میدیا و مهتینا.
ل ڤێرە پرسیار ئهڤەیە، گهر تو هێزهكا كوردى بى، بۆچی ب كوردەواری ناڤێ جهێ شهری بەیان ناکەی؟
گهر ته باوهرى ب ستاتۆیا قانوونی یا ههرێما كوردستانێ هەبیت، بۆچی تو وان جهان ب ناڤێ قانوونی یێ هەرێما کوردستانا-ئیراقێ ب ناڤ ناکەی ؟
