فەرماندارێ هێزێن پێشمەرگە ل شنگالێ راگهاند، پەکەکە حەتا نها د ناڤا شنگالێ دا مایە و نە ب تەنێ کێم نەبوونە بەلکو هەژمارا چەکدارێن وان زێدەتر بوویە، حکوومەتا ئیراقێ ژی سەدەمەکە ژ بۆی دەرنەکەتنا پەکەکێ ژ شنگالێ، ژبەرکو ژ ئالیەکێ مووچە ب وان ددەت و ژ ئالیەک دی ژ وان دخوازیت ژ شنگالێ دەرکەڤن.
قاسم شەشۆ راگهاند، حەتا نها رەوشا شەنگالێ ب خرابی مایە و خرابتر ژی بوویە، ژ بەر خرابیا رەوشێ ژی خەلک نکاریت ڤەگەریت، ژبەرکو پەکەکە نە ئامادەیە ژ بەر بەرژەوەندیێن خوە یێن حزبی شنگالێ ب جهـ بهێلیت، سەرەرای ڤێ یەکێ حکوومەتا ئیراقێ ژی نەیا جدی یە د دەرکرنا وان دا و مووچە ب چەکدارێن وان یێن ل شنگالێ ددەت.
شەشۆ راگهاند، حکوومەتا ئیراقێ ژ ئالیەکی داخوازا دەرکەتنا چەکدارێن پەکەکێ ژ شنگالێ دکەت و ژ ئالیەک دی مووچە ب وان ددەت، ئەو راست نابێژن، ژبەرکو گەر بخوازن پەکەکە ژ شنگالێ دەرکەڤیت ب هێسانی دکارن وان ژ شنگالێ دەربکەن، بێ گومان پەکەکە ژی ب گەفا نەبیت نادەرکەڤیت، حکوومەتا ئیراقێ ب تەنێ ب گۆتن داخوازا دەکەتنا وان دکەت.
هەر وەها ئەڤ فەرماندارێ پێشمەرگە دبێژیت، حەتا نها بەغدا هەیڤانە مووچەیێ زێدەتر ژ 1000 چەکدارێن پەکەکێ کو دبیتە نیڤ مەلیۆن دینار ددەت، ئەڤە د دەمەکی دا یە کو پرانیا وان چەکدارێن مووچە ژ بەغدا دستینن نە خەلکێ شنگالێ نە.
