ل جۆلەمێرگێ دو وەلاتی ب بەهانەیا قاچاخچیتیێ ھاتنە بریندارکرن

ل ناڤچەیا روبارۆکا جۆلەمێرگێ ل دەڤەرا چەمەکوورکێ یا سەر ب گوندێ ماوانێ ڤە، دو وەلاتی ب بەهانەیا قاچاخچیتیێ ھاتنە بریندارکرن.

سەرۆکێ سەندیکایا پارێزەرێن دیاربەکرێ نیهاد ئەرەن ل سەر حەسابا خوەیا تویتەرێ دیار کر: “ل ناڤچەیا روبارۆکا جۆلەمێرگێ ل دەڤەرا چەمەکوورکێ یا سەر ب گوندێ ماوانێ ڤە، وەلاتیێن ب ناڤێ جەلال ئەکنجی (17) سالی و شەھاپ شەندول (21) سالی ژ ئالیێ ھێزێن ئەولەھیێ ڤە ب بەهانەیا کو قاچاخچی نە و بێیی کو بێنە ھشیاریکرن ھاتنە بریندارکرن.”

نیهاد ئەرەن ھەروھا دا زانین، ل سەر سینۆرێ باکور و رۆژئاڤایێ کوردستانێ د دو سالێن داوی دا سێیەمین جارە مافێ مرۆڤی دهێتە بنپێکرن و گۆت: “وەکو د ڤێ میناکێ دا دهێتە دیتن، کو پرانی زارۆک دبنە قوربانیێن بوویەران، دەما کو دۆر دهێتە سەر کوردان، ت گرینگیا مافێن مرۆڤان نامینیت. ئەم دێ بوویەرێ شۆپینین و رایا گشتی ئاگەھدار کەین.”

ل گۆر ھاتیە راگهاندن ھەر دو بریندار بۆ نەخوەشخانەیەکا ھەرێما کوردستانێ ھاتنە ڤەگوھاستن. شەندولێ کو برینا وی سڤک بوو ژ نەخوەشخانێ دەرکەتیە لێ جەلال ئەکینجی یێ 17 سالی کو ژ زکێ خوە بریندار بوو، دەرمانکرنا وێ بەردەوامە.

ڤیدیۆیا کو دەما بوویەرێ ھاتیە گرتن، ل مەدیایا جڤاکی ھاتیە بەلاڤ کرن. د دیمەنان دا دهێتە خویاکرن کو ھەر دو وەلاتیێن بریندار ل ئەردی نە و داکو بچنە نەخوەشخانەیێ هاریکاریێ ژ لەشکەران دخوازن. لێ تێ دیتن کو لەشکەر ل سەر وان سەکینینە و چ هاریکاریا بریندارا ناکەن. خزمێن کەسێن بریندار دبێژنە لەشکەران رێکێ بدەن ئەم ب ترۆمبێلێن خوە ببەینە نەخوەشخانەیێ.

https://twitter.com/av_nahiteren/status/1395139537425285120?ref_src=twsrc%5Etfw%7Ctwcamp%5Etweetembed%7Ctwterm%5E1395139537425285120%7Ctwgr%5E%7Ctwcon%5Es1_&ref_url=http%3A%2F%2Fwww.peyamakurd.org%2Fkurmanci%2FKurdistan%2Fli-colemerge-du-welati-bi-hinceta-qacaxcitiye-hatin-birindarkirin