ل سنۆرێ کانی ماسێ و سیریێ-شێلادزێ ل باشوورێ کوردستانێ، بالەفرێن ترکیا ب رێیا هەوایی پەیامەک ب زمانێ ترکی و کوردی ژ بۆ گەریلایێن پەکەکێ شاند.
چاڤکانیێن پێگەها دارکا مازی ل باشوورێ کوردستانێ ئاشکەرا کر، ئیرۆ رۆژا پێنجشەمبی 20/5/2021ێ، هندەک کاغەز کو ب زمانێ کورمانجی و ترکی ل سەر هاتیە نڤیساندن ل سنۆرێ کانی ماسێ و سیریێ-شێلادزێ ل باشوورێ کوردستانێ هاتنە دیتن کو ووسا دیار دبیت کو ژ لایێ بالەفرێن ترکیا ڤە هاتبنە ئاڤێتن داکو گەریلایێن پەکەکێ وان رووپەلان ببینن و پەیاما ترکیا بزانن.
د ڤان بەلاڤۆکان دا ترکیا داخوازێ ژ گەریلایێن پەکەکێ دکەت کو خوە هشیار بکەن و ل ژیانا خوە و فەرماندارێن خوە بنێرن کو ب چ ئاوا ئەو خوەش و باش دژین و گەریلا ژی د زەحمەتیان دا دژین، ترکیا داخوازێ ژ گەریلایان دکەت کو تەسلیم ببن و خوە بسپێرن دادگەهێ، داکو بکارن ب خوەشی د گەل مالباتێن خوە دا بژین.
ناڤەرۆکا بەلاڤۆکا ترکیا ب ڤی رەنگی یە:
* ما ئێدی دەم نەهاتیە ببێژنە یێن کو ب سالانە تە دخاپینن و دەستەکێ وان د هنگڤینی دا و دەستەکێ وان د رونی دا “راوەستە/بسەکنە”؟
* نەبنە یاریێن خایینێن کو ل ژیانا وە نافکرن.
* نە قەدەرا هەوە یە کو هوون د شکەفتان دا د بن شەرت و مەرجێن نەمرۆڤانە یێن کو ل سەر هەوە هاتینە فەرزکرن دا بژین.
* تو هێژان د بهارا ژیانا خوە دا یی، تە هێژان تشتەک ژ دەست نەدایە.
* یێن کو گەهشتنە مالباتێن خوە نها ب دلشادی ژیانا خوە بەردەوام دکەن، وان نموونە وەربگرە.
* د ژیانا وە یا ژ ڤێرە هێرڤە د گەل مالبات و خۆشتڤیێن هەوە دا ژیانەکا درێژ د دەست هەوە دا یە.
* جهێ ترسا مرنێ، تونەبوونێ و بەلنگازیێ ژیانەکا ب ئارام و ئەولەدار هەلبژێرن.
* ئیسرارێ د خەلەتیێ دا نەکەن! بەری کو ژ بۆ هەوە ببیتە درەنگ وەرن تەسلیمی دادگەهێ ببن! دەولەتا مە هەرگاڤ دلنازک و دلۆڤانە.
