هەر کو دچیت ئێریشێن دەولەتا ترکیێ ل باشوورێ کوردستانێ ل دژی لڤ و تەڤگەرێن چەکدارێن پەکەکێ پێتر دبن و پێتر خاکا باشوور دهێتە داگیرکرن و پێتر مەترسی دکەڤیتە سەر ژیانا خەلکێ باشوور.
د ڤێ دەربارێ دا، ئیرۆ ژی دەولەتا ترکیا ئێریشی سەر چەکدارێن پەکەکێ ل باشوورێ کوردستانێ کر و هەژمارەک رۆکەت ل ترۆمبێل و خالێن وان یێن نێزی گوندێ هرۆرێ خستن کو ب ڤێ سەدەمێ مەترسی کەتە سەر پاسا قۆتابیان.
چاڤکانیێن پێگەها دارکا مازی ل باشوورێ کوردستانێ ئاشکەرا کر، ئیرۆ رۆژا شەمبی 22/5/2021ێ، دەمژمێر 2یی پاش نیڤرۆژێ، دەولەتا ترکیا 7 رۆکەت ئاراستەی چەکدارێن پەکەکێ ل نێزی گوندێ هرۆرێ یێ دەڤەرا بەرواری بالا کرنە کو یەک ژ وان رۆکەتان ل نێزیکی پاسا قۆتابیان کەتیە، یا جیهێ دلخوەشیێ ئەڤە بوو کو زرار ب چ قۆتابیان نەکەت.
ئەڤ یەک د دەمەکی دا یە کو دوهـی رۆژا ئەینی ژی، دەولەتا ترکیا نێزی گوندێ دشێش و بادوکێ وڤهرۆرێ بۆردۆمان کرن و زرارەک مەزن ب ئاقارێ ڤان گوندان گهاند.
