پارتیا ئازادیا کوردستانێ (پاک)ێ ب بۆنەیا سالڤەگەرا سێدارەدانا 5 ئەندامێن وەلاتپەروەرێن کورد ژ لایێ دەولەتا ترکیا د سالا 1925ێ، ب پەیامەکێ ببیرئانی.
داخویانیا پاکێ وەھایە:
دەولەتا ترکییا پشتی تەڤگەرا نەتەوەیی یا کوردا کو د شوباتا 1925ێ دا دەستپێ ببوو مەحکەمەیا شارک ئیستیقلالێ دامەزراند.
سەرۆکێ ڤێ تەڤگەرا نەتەوەیی شێخ سەعید رۆژا 1ێ نیسانا 1925ێ ب کەمینەکێ ژ لایێ دەولەتا ترکیا ڤە دیل ھاتە گرتن.
پشتی کو شێخ سەعید دیل ھاتیە گرتن، دەولەتا ترکیا دەست ب سێدارەدانا رێبەر و کادرێن کوردان کر.
وەک خەلەکەیەک ژ ڤان دارڤە کرنان ژی، مەحکەمەیا شارک ئیستیقلالێ یا دەولەتا ترکیا د رۆژا 25/5/1925ێ دا ل ئامەدێ 5 سییاسەتمەدار و رەوشەنبیرێن وەلاتپەروەرێن کورد سێدارە دان.
سەیید عەبدولقادرێ سەرۆکێ جەمعیەتا کورد تەعالی، سەیید محەمەدێ کورێ سەیید عەبدولقادر، کەمال فەڤزی بەگێ رۆژنامەڤان، سەعدی عەبدوللاهێ پالۆیی، حەجی ئەحدی بەگ محەمەد تەوفیق (باڤێ تووژۆ)ێ پارێزەر ب بریارا مەحکەمەیا شارک ئیستیقلالێ کو مەحکەمەیا شەرێ ل دژی کوردان بوو و هیچ پەیوەندیەک ب یاسایێ ڤە نەبوو ھاتنە دارڤە کرن.
ئەم د 96ەمین سالڤەگەرا دارڤە کرنا وان دا، 5 وەلاتپەروەرێن کورد و ھەموو شەھیدێن کوردستانێ ب گرامی ببیر تینن.
23/5/2021
ئۆفیسا چاپەمەنی و راگەھاندنا پاکێ
