بەرپرسەکی پەدەکێ ل شنگالێ دبێژیت، چەکدارێن پەکەکێ ژ تەرۆریستێن داعشێ زێدەتر گەنج و زارۆکێن ئێزیدی رەڤاندنە و دایک و بابێن وان ژی تشتەکێ ژ رەوشا زارۆکێن خوە نزانن.
بەرپرسێ لقا 17یا پەدەکێ ل شنگالێ، قادر قاچاخ راگهاند، چەکدارێن پەکەکێ ژ تەرۆریستێن داعشێ زێدەتر گەنج و زارۆکێن ئێزیدی رەڤاندنە و دایبابێن وان ژی چ تشتەکێ ژ رەوشا وان نزانن. ژ بەر کو نزانن پەکەکێ ئەو برنە کیڤە.
قادر قاچاخ ھەر وھا گۆت، پەکەکە زلمێ ل خەلکێ شنگالێ دکەت و زەڤی و ئەردێن وان داگیردکەت، ناھێلیت خەلک بچن ناڤ ئەرد و زەڤیێن خوە. ل ناڤ زەڤیێن وان دا تونێلا دکۆلن و ناھێلن سازیێن مرۆڤی هاریکاریێ بگەھینن خەلکێ شنگالێ. ناهێتە زانین چەند کەس ژ لایێ پەکەکێ ڤە ھاتنە رەڤاندن.
وی بەرپرسێ پەدەکێ دا زانین ژی، ژ بلی ھندێ کو پەکەکە ناھێلیت سازیێن مرۆڤی هاریکاریێ بگەھیننە خەلکی، ناھێلن خزمەتگوزاریێن گشتی ژی ل وێ دەرێ بێنە کرن. رۆژ ب رۆژ کۆمێن جودایێن حەشدا شەعبی دەرباسی شنگالێ دبن، ئەڤە ژی رەوشێ ئالۆزتر دکەت.
ب گۆتنا قادر قاچاخ، ئەو کەسێن کو ڤەگەریانە شنگالێ ژ بەر نەبوونا ئارامی و ئەولەھی و خزمەتگوزاریان پووشمان بوونە و دیسا کۆچبەر بوونە.
