رێخستنا په‌كه‌كێ كو ده‌وله‌تا تركیێ كێشی باشوورێ كوردستانێ دكه، 3 گوندێن دن یێن ده‌ڤه‌را به‌رواری بالا كرن ناڤچه‌یێن شه‌ر و ژ شێنییان ڤالا مان.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا دووشه‌می 25/5/2021ان، هه‌ر یێك ژ گوندێن دێشێشێ، ئه‌دنێ و سه‌ره‌روو یێن گرێدای ناڤچه‌یا كانی ماسێ ل ده‌ڤه‌را به‌رواری بالا ب یێك جار هاتن ڤالا كرن.
ده‌ست نیشان كر، ل دوو رووژێن رابووری ئێریشێن ده‌وله‌تا تركیێ ل سه‌ر رێخستنا په‌كه‌كێ دژوار بوونه و ژ به‌ر ڤێ سه‌ده‌مێ په‌كه‌كه ده‌رباسی ناڤا گوندان بوویه و ئه‌ڤ یێك بوو سه‌ده‌م كو ئه‌ڤ گوند وه‌رن چۆل كرن.
رێخستنا په‌كه‌كێ هه‌ر كو دچه پێتر خوه نێزی گوند و باژارۆكان دكه، ژ بۆ كو به‌هانه‌یه‌كێ بده ده‌ستێ تركیێ كو ئه‌و ناڤچه وه‌رن بۆمبه‌باران كرن و ببن قادا شه‌ر و ژ شێنییان ڤالا ببن، ژ ئێریشێن خزیرانا سالا رابووری ده‌هان گوندێن سینۆرێ پارێزگه‌هییا دهۆكێ بوونه قوربانی ڤێ پیلانا قرێژ یا په‌كه‌كێ و نها بوونه ناڤچه‌یێن عه‌سكه‌ر و عه‌سكه‌رێ ترك تێده جی گرتییه.
