ژ 23یێ گولانێ ڤە، پێشمەرگە و ئارتێشا ئیراقێ ل دەڤەرێن کوردستانی دەست ب دامەزراندنا ژوورێن ئۆپەراسیۆنێن ھەڤبەش کرنە. حەتا نھا، ل ھەرێمێن کەرکووک و مەخموورێ ژوورێن ئۆپەراسیۆنێ ھاتنە ئەکتیڤ کرن. ڤان رۆژان ل مووسل و خاناقینێ ژی دەست ب دانینا ژوورێن ھەڤبەش هاتیە کرن.
ئاڤاکرنا ژوورێن ئۆپەراسیۆنێن هەڤبەش ژ بۆ کوردان گاڤەکا گرنگا سیاسی یە. ئەڤ دەڤەرە ھەمی د سالا 2017ێ دا ژ لایێ حەشدا شەعبی و ئارتێشا ئیراقێ ڤە ھاتبوونە داگیرکرن. نھا ڤەگەرا پێشمەرگە وەک دەستکەفتەک دیپلۆماتیک دهێتە دیتن. لێ دەردۆرێن کو ژ ڤێ دەستکەفتیێ گەلەک عاجز ژی ھەنە. یەک ژ وان ژی پەکەکە یە. لێ بەلێ، پەکەکە نەشیابوو ل سەر ڤێ مژارێ ب رەنگەک ئاشکەرا نەرازیبوونا خوە دیار بکەت، ژبەر ڤێ چەندێ پەکەکە رێبازێن جوودا ژ بۆی نەرازیبوونا خوە د ڤی بابەتی دا بکار تینیت.
پەکەکە نەرازیبوونا خوە ل ھەمبەر ڤەگەرا پێشمەرگە بۆ دەڤەرێن کوردستانی د ANFێ دا و ب وەشانێن خوەیێن ئینگلیزی دا دیار دکەت، ژ بەر کو مەدیا پەکەکێ ژ ھەلوەستا گەل دترسیت لەورا ژی ل سەر مالپەرێن ترکی و کوردی بەلاڤ ناکەت. گەڵێ کوردستانێ راستیا دەرکەتنا پەشمەرگە ژ کەرکووک و ناڤچەیەن کوردستانی دزانیت، تایبەت ژی گەلێ باشورێ کوردستانێ باش دزانیت ئەڤە کۆمپلۆیا کێ بوو. ئەو ب ڤی رەنگی، د وارێ دیپلۆماسیێ دا، ڤان گۆتاران نیشانی کەسێن ئەورۆپی و بییانی ددەن و دخوازن ڤێ نڤیسێ وەکی ھەلوەستا گشتی یا گەلێ کورد، ب ئەورۆپییان بدەنە قەبوول کرن.
ھەری داوی، نڤیسەک ل سەر ناڤێ بەختیار چەلێ کو خوە وەکی ئەندامێ مەجلسا گەل یا مەخموورێ ددەتە ناساندن، د وەشانا ئینگلیزی یا ANFێ دا ھاتە وەشاندن. گۆتار تەنێ ب ئینگلزی ھاتییە وەشاندن. د گۆتارێ دا، ب زانابوون ھندەک ئاگاھییێن درەو ھاتنە پارڤە کرن و سڤکاتی ب پێشمەرگە ژی کریە.
د گۆتارێ دا ڤەگەریانا پێشمەرگە ژ بۆ دەڤەرا مەخموور وەکی پلانگەرییەک ژ بۆ رووخاندنا کەمپا مەخموورێ نیشان د دەت.
ل گۆری گۆتارێ، پێشمەرگە د 16ێ ئۆکتۆبەرا 2017ێ دا د ئەنجاما ئێرشێن داعش دا ژ مەخموورێ دەرکەت و میلیشیایێن حەشدا شەعبی ھاتنە شوونا وان. لێ بەلێ، پێشمەرگە ب چەکێن گران و ھێزێن بەژایی د دەرخستنا داعشێ دا رۆلەکێ ب باندۆر گێرا. دووڤ رق، دەما کو کەرکووک ب خییانەتا بالێ لاھۆر جەنگی ڤە رادەستی ئارتێشا ئیراق و حەشدا شەعبی ھاتییە کرن، ھێزێن ئیراقی ل ئەنییا مەخموورێ ب دژواری ئێریشی ھێزێن پێشمەرگە کرن. د 24ێ چریا پێشین یا 2017ێ دا، ھێزێن پێشمەرگە ئەڤ ئێرشێن حەشدا شەعبی شکاندن و 20 چەکدارێن وان گرتن و ب دەھان وەساییتێن وان ژی ژناڤ برن. د ڤان پەڤچوونان دا پێشمەرگە ژی شەھید بوون. لێبەلێ، پێشمەرگە نە ژ بەر پەڤچوونێن لەشکەری لێ ژ بەر سەدەمێن سیاسی ژ ھەرێما مەخموورێ دەرکەت و 4 کم دووری مەخموورێ ب جیھ بوون.
ھەر وەھا د ڤێ بهێتە زانین، دەما کو پێشمەرگەیان 1 کم دووری وارگەھا مەخموورێ شەر د گەل حەشدا شەعبی دا دکر، نێزیکێ 300 گەریلایێن پەکەکێ د دووریا 1 کم وەکو تەماشەڤانا ل شەری تەماشەدکر و دخواستن حەشدا شەعبی سەربکەڤیت. پشتی شەری پەکەکێ فەرماندارێن حەشدا شەعبی ل وارگەھێ مەخموورێ پێشوازی و مێڤان کرن. حەتا بەختیار چەلێ (پۆلات)، یێ کو دهێتە ئیدیعا کرن کو ئەڤ گۆتارە نڤیساندیە، بەشداری جڤینێن د گەل فەرماندارێن حەشدا شەعبی دا بووبوو و ھێژ پێشمەرگە ژ وێرێ نەڤەگەرییایی پەکەکێ د گەل وان دا پەیمانا ھەڤکارییێ ئیمزا دکر. نها ژی ئەڤ گۆتارە نە پۆلات ئانکو بەختیار چەلێ نیڤیساندییە بەلکو رێڤەبەریا پەکەکێ یا ل کامپا مەخموور چارچۆڤە گۆتییە و ئەڤ گۆتارە ھاتییە نیڤیساندن.
“پەکەکە پێشمەرگە ب هەڤکارا داعشێ ددەتە دیارکرن”
د گۆتارێ دا، بێژەیەک وەکو ” ژ لایێ پەدەکێ و ترکیا ڤە پشتەڤانیا دارایی ل داعشێ دهێتە کرن” دهێتە بکار ئانین. ئەڤ بێژەیە ب هشیاری ھاتییە ھەلبژارتن. ب ڤی رەنگی، ئارمانج ئەوە کو وێنەیەکێ پێشمەرگە، پەدەکێ و حکوومەتا باشوورێ کوردستانێ وەکو ھەڤالێن داعشێ نیشان بدەن. ل گۆری ڤێ تاوانبارکرنێ، دخوازن ببێژن حکوومەتا ھەرێما کوردستانێ؛ ھەم د گەل ترکیا و ھەم ژی د گەل داعشێ دا ھەڤپەیمانیەکا ستراتەژیک ھەیە. لێ بەلێ، د ماوێ دو سالان دا حەتا 2015ێ پێشمەرگە د شەری دا 1.300 شەھید دان. نڤیسکارێ ANFێ ژ بۆ کو ڤان ھەمی راستیان ڤەشێریت، ب ھەزاران پێشمەرگەیێن کو ژ بۆ خاکا نشتیمان جانێ خوە کریە قوربانی نابینیت و سڤکاتیێ پێ دکەت.
مژار نە نڤیسکار ب خوەیە، لێ مژار ئەڤەیە کو ئەڤ تاوانێن قرێژی ژ ئەنجاما سیاسەتا پەکەکێ نە. ژ بەر ڤێ یەکێ، پەکەکە ژ بەر سەدەمێن سیاسی و جڤاکی نکاریت ببێژیت و دهێت ب ناڤێن جودا و زمانێ جودا ددەتە گۆتن و نڤیساندن.
پەکەکە ژ نھا و پێ ڤە، ب ئیحتیمالەک مەزن ب پێنووسێن ڤەشارتی دێ ڤێ خەلەکا پرۆپاگاندەیا رەشکرنێ، برێڤە بەت. “گەل پێشمەرگە ناخوازیت، د ناڤبەرا داعش و پێشمەرگە دا ھەڤکاریەک ھەیە. پەشمەرگە د گەل مرۆڤان دا خەراب سەرەدەریێ دکەت، ھاتنا پێشمەرگە بۆ مەیدانێ کۆمپلۆیەکا ناڤنەتەوەیی یە، ئەڤ پشتگریا ھێزێن ناڤنەتەوەی یە ژ بۆ تەسفیەکرنا پەکەکێ”، و ھتد. دێ پرۆپاگاندایەک ب ڤی رەنگی هێتە کرن.
یێن کو ژ ڤەگەرا پێشمەرگە ژ بۆ دەڤەرێ گەلەک نەرحەتن حەشدا شەعبی و پەکەکەیە
ژ بەر کو ئارمانجا سیاسەتا پەکەکێ یا کو عەڤدلا ئۆجەلان د سالا 2012ێ دا بەحسا وێ دکر، جیھ بوونا ڤێ خەتا درێژا ژ شنگال حەتا خانەقینە، کو پێشمەرگەیان ژ ڤێرە دەرخینن و ل ڤێرە بجیھ ببن. پەکەکە ل ڤێرە وەکی شریکێ پلانگەریا ھیلالا شیعێن ئیرانێ ئەرکدار دبیت. د بەردێلا کو پێشمەرگە دەست ژ ھەرێمێ بەردا، ئەو ل شنگالێ بجیھ بوون و ئێزدی کرنە پارچەیەک ژ حەشدا شەعبی. ئەو گروپێن چەکدار ل وارگەھا مەخموور بجیھ کرن و بنگەهسازیا داکەتنا سەر خەتا کەرکووکێ ئاڤا کرن. وەکی دی، د خەتا گەرمیان و خانەقین دا، ھێزەک ب ناڤێ خوە پاراستنا جەوھەری ئاڤا کرن کو پێشدا ئەڤ ھێزە ژی وەکو ھێزا حەشدا شەعبی هاتە ناسین و ئەرکدار کرن. د ڤان دەڤەرێن کوردستانی دا پەکەکە و حەشدا شەعبی ب یەک فەرماندێ بزاڤێ دکەن. ئانکو ھەر دو ھێز ب ھەمی رەنگا ھەڤبەش و شریکن. ب گۆتنەکا دی، پرۆژەیا کەمەرا ناڤین یا پەکەکێ نە ب ئارمانجا وێ یەکێ یە کو ئاخێ ژ ئیراقێ بستنن، بەلکو ئارمانجا وان ئەوە ئاخێ ژ پێشمەرگە و ھەرێما کوردستانێ ڤەقەتینن و پێشمەرگە ل وان جیهان راکەن و ل شوونا پێشمەرگە ل سەر ناڤێ ئیراقێ ئەو ب خوە ل دەڤەرێن کوردستانی بجیھ بوونە.
ژ بۆ ڤێ سەدەمێ، یێن کو ژ ڤەگەرا پێشمەرگە ژ بۆ دەڤەرێ گەلەک نەرحەتن حەشدا شەعبی و پەکەکەیە. بێ گومان، ھەڤکارێ دی یێ ڤی بالی، گرۆپا لاھۆر جەنگی یە. ئەڤ ھەر سێ شریکێن نە یاسایی، ریسکا ئیستیفزازێ ل ڤێ ھەرێمێ دورست دکەن. ژ بەر کو ھەبوونا پەکەکێ ل ڤان دەڤەران ب خێرا حەشدا شەعبی یە. گاڤا کو پێشمەرگە ب فەرمی دەرباسی دەڤەرێ بوون ئەڤ پەیوەندی و شریکاتیا حەشدا شەعبی و پەکەکێ دێ کەڤیتە بن مەترسییێ دا. گرنگە کو گەلەک ب ھشیاری ئەڤ پرۆژە بهێتە جێبەجێ کرن.
پشتی وێ تاریخێ، ھێزێن سیاسی یێن یەنەکێ ل ھەمان دەڤەران دەست ب خەباتێ کرن، و پەدەکێ راگھاند کو ئەو ل ڤان دەڤەران ئۆفیسێن سیاسی ڤەناکەن حەتا کو پێشمەرگە ڤەدگەریت.
