ب ڤیدیۆ – 14عه‌سكه‌ر و 11 گه‌ریلا، كێ ئاگر ل سه‌ر سه‌رێ كێ باراند؟
ئارته‌شا تركیێ دیمه‌نێن جودا یێن ئارمانج گرتنا نوقته‌یێن په‌كه‌كێ ل باشوورێ كوردستانێ به‌لاڤ كرن و راگهاند، د 11 چه‌كدارێن په‌كه‌كێ كه‌تنه به‌ر ڤێ ئێریشێ، په‌كه‌كه ژی دبێژه مه 14 عه‌سكه‌ر جه‌زا كرنه.
پاش كو رێخستنا په‌كه‌كێ دوهـ نووچه‌یا جه‌زا كرنا 14 عه‌سكه‌رێن ترك به‌لاڤ كری، ئارته‌شا تركیێ ئیرۆ رۆژا پێنجشه‌می 27/5/2021ان دیمه‌نێن ئارمانج گرتنا نوقته‌یێن په‌كه‌كێ به‌لاڤ كرن و راگهاند كو د ڤێ ئێریشا به‌ژاهی ده، 11 چه‌كدارێن په‌كه‌كێ هاتنه كوشتن.
هه‌ر یێك ژ ده‌وله‌تا تركیێ و رێخستنا په‌كه‌كێ هه‌ر ل ناڤبه‌را چه‌ند رۆژان ئامارا زرارێن جانی یێن هه‌ڤ به‌لاڤ دكه‌ن، لێ به‌لێ هه‌ردوو ئالی راست نابێژن، ترك دبێژه رۆكه‌تێن مه هه‌موو ئارمانجێ دگرن و ب چه‌كدارێن په‌كه‌كێ دكه‌ڤن، په‌كه‌كه ژی دبێژه مه ئاگر ل سه‌ر سه‌رێ عه‌سكه‌رێ ترك باراندییه!.
ل رۆژێن رابووری وه‌زاره‌تا پاراستنا نه‌ته‌وی یا تركیێ و هه‌په‌گێ باسكێ له‌شكری یێ رێخستنا په‌كه‌كێ هه‌ژمارێن دووری راستیێ یێن كوشتیێن هه‌ڤ راگهاندن، لێ به‌لێ ئه‌ڤ ژی دچه د خانا جه‌نگا مه‌دیایی ده و ئه‌ڤ ئامار ژ هێلا تو سازیێن سه‌ر‌بخوه نایێن پشت راست كرن.
لێ به‌لێ تشتا كو هه‌ر كه‌س دكاره بزانه و ب چاڤێ خوه ببینه، مه‌دیایا په‌كه‌كێ یه، هه‌گه‌ر مرۆڤ ئاژانسا ئانفێ بشۆپینه و ل به‌شا ئارشیفێ نووچه‌یان مێزه بكه، وێ ببینه هه‌ر ل ناڤبه‌را دوو یان سێ رۆژان داخویانیه‌كا هه‌په‌گێ هه‌یه، ئه‌ڤ داخویانی یێن بیرئانینا گه‌ریلایانه یێن كو د شه‌ر دا جان دانه، هه‌ر كێم د مه‌هه‌كێ ده پێتره 10 داخویانییان هه‌نه، هه‌ر داخویانییه‌ك وێنه‌یێن 3 هه‌یا 8 گه‌ریلایێن شه‌هید تێده هاتنه رێز كرن.
