سپایێ پاسداران كۆلبه‌ره‌ك ل كرماشانێ كوشت

سپایێ پاسداران یێ ره‌ژیما ئیرانێ ل باژارۆکێ سەرپێلا زەھاویێ رۆژھلاتا کوردستانێ، گوللـه‌ به‌ردان کۆلبەرەکی کورد و كوشت.

رێخستنا هه‌نگاو یا مافێن مرۆڤان راگھاندیە، رۆژا 26ێ ڤێ مەھێ ل دەڤەرا تەنگ ھەما یا باژارۆکێ سەرپێلا زەھاو ل پارێزگەھا کرماشانێ، کۆمەک کۆلبەران راستی هێرشا پاسدارێن ئیرانێ ھاتن.

ل گۆری ئاگاھییان، د وێ هێرشێ دا کۆلبەرەکی کورد ب ناڤێ قوباد ره‌حمانی كو 28 سالی یه‌ و خەلکێ گوندێ رەمک یێ کرماشانێ یه‌، ھات کوشتن.

ل گۆری ئامارێن ھەنگاوێ، د ھەیاما مەھا بووری دا ھەری کێم 24 کۆلبەرێن کورد د هێرشا پاسدارێن ئیرانێ دا ھاتنە کوشتن و بریندار بوونە.