كرستیانێن گوندەکێ باشوورێ کوردستانێ ژبەر شەرێ په‌كه‌كێ و ترکیێ ئاوارە بوون
كرستیانێن گوندێ چەلکێ یێ ل سنۆرێ باژارۆکێ کانی ماسی، ب ئه‌گه‌را شەر و ئالۆزیێن د ناڤبەرا په‌كه‌كێ و سوپایێ ترکیێ دا، ئاوارە بوون و نکارن ڤەگەرن گوندێ خوە.
ئاكنجیێن گوندێ چەلکێ یێ كرستیانان ل سنۆرێ کانی ماسی، نێزیکی مەھەکێ یە ژ بەر شەرێ په‌كه‌كێ و ترکیێ گوندێ خوە ڤالا کرنە، پرانییا وان ل کۆمەلگەھا بێرسڤێ یا ل سنۆرێ ناڤچه‌یا دەرکارێ یێ سەر ب قه‌زا زاخۆ ئاكنجی بوونە، وەک ئەو ب خوە دبێژن، ژیانەکا زەحمەت دژین.
ژنەکا خەلکێ گوندێ چەلکێ، کو نھا ئاوارە بوویە، ژ K24ێ را دایە زانین، ئەو ژ بەر خەم و ترسا ئاوارەبوونێ نەخوەش کەتییە و داخواز دکەت کو په‌كه‌كه و ترکیە بچن سەر ئاخا خوە شەرێ خوە بکه‌ن و دبێژیت: «کورێن مە ژی پێشمەرگە نە و شەر کرنە، لێ نەچوونە ناڤ ئاخا ترکیێ، بەرەڤانیا ئاخا خوە کرنە، په‌كه‌كه ھاتییە سەر چیایێن سنۆرێ مە و ترکیه ژی تۆپباران دکەت، د ناڤبه‌را وان زیان ب مه دكه‌ڤیت».
وەلاتییەکی دن یێ ئاكنجیێ گوندێ چەلکێ ئەشکەرە دکەت؛ رەز و باخێن وان ھەموو ھشک بوونە، وان ژبەر شەرێ په‌كه‌كێ و ترکیێ دەست ژ رەز و باخێن خوە بەردانە و نکارن بچن ئاڤ بده‌ن، ھەروه‌ھا دیار دکەت، بەشەکی ژ پووش و پاوانێن دەڤەرا وان ھاتنە سۆتن.
رێڤەبەرێ ناحیا دەرکارێ ئەدیب جه‌عفه‌ر ژی دەستنیشان کرییە، دەما خەلکێ گوندێ چەلکێ ئاوارەیی دەڤەرا مە بووین، د رەوشەکا خەراب دا بوون، مە ل گۆر شیانێن خوە ئالیکارییا وان کر.
