در. جوان مستەفا گۆت، 17 ھەزار و 500 دەرزیێن “ئاسترازینکا”یێن ل دژی ڤیروسا کۆرۆنایێ (کۆڤد-19) کو ژ لایێ WHO ھاتنە شاندن، گھشتن رۆژئاڤایێ کوردستانێ.
پشتی خەباتێن زێدەیێن ژ لایێ دەستەیا تەندورستیێ یا رێڤەبەریا خوەسەرا رۆژئاڤایێ کوردستانێ ڤە ژ بۆ بدەستخستنا دەرمانێن ل دژی ڤیروسا کۆرۆانیێ، 17 ھەزار و 500 دەرزی ژ لایێ رێخستنا تەندورستیا جیھانێ (WHO) ڤە ھاتنە شاندن. ئەڤە جارا یەکەمینە کو WHO مادەیێن تەندورستی ب ئاوایەکی یەکسەر ددەتە رێڤەبەریا خوەسەر.
ھەڤسەرۆکێ دەستەیا تەندورستیا رێڤەبەریا خوەسەر در. جوان مستەفا ژ بۆی مەدیایا نێزیکی رۆژئاڤایێ کوردستاتانێ دیار کر کو پەیوەندیا وان د گەل رێخستنا تەندورستیا جیھانێ دا بەردەوامە و گۆت، ئەرکا رێخستنێ یە کو خزمەتێن تەندورستیێ بدەتە گەلێن جیھانێ، ب تایبەت پشتی کو ڤیروسا کۆرۆنایێ دەرکەت.
جوان مستەفا دەستنیشان کر کو یا گرنگ ئەوە دەستپێکێ دا دڤێت دەرزی ژ بۆی فەرمانبەرێن تەندورستیێ بیت، رێژەیا ھاتیە شاندن تێرا دکەت کو فەرمانبەرێن تەندورستیێ بهێنە ڤاکسیندان و وھا بەردەوام کر: “ژ بەرکو فەرمانبەرێن تەندورستیێ خەتا پاراستنا یەکەمین ل ھەمبەر ڤیروسا کۆرۆنایێ یە.”
بەریا چەند رۆژان ل باژارێ حەسەکێ فەرمانبەرێن تەندورستیێ ھاتینە ڤاکسیندان. دهێتە تەخمینکرن کو د ناڤا رۆژێن پێش دا ھەموو فەرمانبەرێن تەندورستێ یێن ل باکور و رۆژھلاتێ سووریێ بهێنە ڤاکسیندان.
جوان موستەفا دیار کر کو دەرزیێن “ئاسترازینکا”یێن بریتانی ژ WHO وەرگرتنە، ئەڤ دەرزیە ل ئەورۆپایێ ھاتیە جەرباندن و ئەنجامێن باش دانە.
