تێکدانا خوەزایا ناڤچەیێن سینۆری یێن هەرێما کوردستانێ و بڕینا دارێن ڤان ناڤچەیان کو پەکەکێ پێش نها ب «هەرێمێن پاراستنا مەدیا» ددان ناساندن، ئەڤ دەما چەند رۆژانە بوویە مژارا هەری گەرم د سۆسیال مەدیایا باشوورێ کوردستانێ دا. دیمەنێن بارهه‌لگرێن بار کری ژ دارێن بڕی، دیمەنێن بارهه‌لگرێن تژی مرۆڤێن کورد ل سەر دەما رژێما بەعسا ژناڤچوویی ل بیرا مرۆڤ تینە، دەما ل ناڤچەیێن جودا یێن کوردستانا باشوور بەر ب بیابانێن «عەرعەر و نوگرەت سەلمان» ل باشوورێ ئیراقێ دبرن داکو وان ب ساخی بکن د قەبران دە، ئەڤ دیمەنە دلێ هەر کوردەکی دشەوتینە، هەر کوردەکی هنەکێ مەژیکێ وی هەبە وێ ب ڤان دیمەنا پڕ عاجز ببە. لێ گەلۆ چما ئەڤ یەک ب سەرێ باشوور هات؟! چما ترکیە نها وەکە بەشەک ژ ئاخا خوە ل ڤان ناڤچەیان دنێرە و چما «لەهەنگێن میتۆلۆژیک» یێن کو ب پارادیگمایا ئاپۆ تەڤ دگەرن نە خوەیانە؟! ژ خوە نە جارەکی ب هەزاران جاران گۆتیە ئەمێ باشوور ل ترکیێ بکن ڤیه‌تنام! ڤان «لەهەنگێن» ساختە نە تەنێ باشوور ژ دژمن رە نەکر ڤیەتنام، بەلکو وەختە باشوور ژی ل سەر سێنیەک ژ زێڕ دروستکری پێشکێشی دەولەتا ترک بکن و سۆزا سەرۆکێ وان د ئیمرالیێ دە ب دەولەتێ دای ئانکو «کارکرن ژ بۆی میساقا مللی» ب جی تینن.
جهێن كو دار لێ تێنه بڕین ئه‌ڤ 30 ساله د ده‌ستێ په‌كه‌كێ ده‌نه
پێش چەند رۆژان پشتی کو هن بەرپرسێن باشوورێ کوردستانێ باس ل بڕین و تالانکرنا دارێن ناڤچەیێن سینۆری یێن باشوورێ کوردستانێ کری و راگهاندی دەولەتا ترک خوەزایا باشوور تێک ددە و دارێن تەمه‌نا وان دگه‌هه 100 سالان ژی دبڕە و دشینە ترکیێ و ل بازاران دفرۆشە و پشترە یەک ژ پارلامانتەرێن باشوورێ کوردستانێ هنەک وێنەیێن ڤان دیمەنان د حەسابا خوە یا فەیسبۆکێ دە پارڤەکری، ژ نوو پارتییا کارکەرێن کوردستانێ باس ل ڤێ مژارێ کر، ژ نوو هەموو مەدیایا خوە ب تایبەتی سۆسیال مەدیایا خوە ل باشوورێ کوردستانێ ل دژی حکوومەت و پارلامان و پەدەکێ سەفەربەر کرن و ووسا دا خوەیا کرن کو ئەڤ یەک ب ئەرێکرنا حکوومەت و قەدەپێ تێ کرن و ب دەولەتا ترکیێ رە لهەڤ کرییە ڤان دارا ببڕن و ببن ترکیێ، لێ راستی تشتەک دنە، ئەڤ ناڤچە 30 سالن د بن دەستهلاتا حکوومەتا هەرێما کوردستانێ دە نەبوونە، 30 سالن پەکەکێ نەهشتییە یەک پێشمەرگە، یەک شێنی و یەک کەسی باشوور بکەڤە وان ناڤچەیان، پەکەکێ نە ب تەنێ ئەو ناڤچە داگیر کربوون، بەلکو ناڤێن وان ناڤچەیان ژی گوهەرین و ناڤێ وان ناڤچەیان ب ناڤچەیێن «پاراستنا مەدیا» و ناڤچەیێن ئازادکری دیار کرن! ت کوردەکی ژی ژ پەکەکێ رە نەگۆ، گەلۆ ئەڤ ناڤچه وە ژ کێ رزگار کرنە؟! ئەڤ ناڤچە بەشەکن ژ ئاخا باشوور و دڤێ ل ژێر دەستهلاتا حکوومەتێ دە بن و شێنیێن وان ناڤچەیان بکارن ل ور بشۆغلن و رەز و بیستانێن خوە شین بکن.
پەکەکێ نها هەموو گرسەیا خوە سەفەربەر کرییە و دخوازە ووسا نیشان بدە کو «ئەنفالا خوەزایا کوردستانێ» ژ لاوازیا حکوومەتا هەرێما کوردستانێ یە!
تشتا ژ هەموویان ئەجێبتر ئەڤە کو پەکەکە ژ بلی کو کارییە هن ناڤچەیێن باشوورێ کوردستانێ داگیر بکە و هن ناڤچەیێن دن ژی بدە دەست دەولەتا ترکیێ، ب مەدیایا خوە کارییە مەژیکێ هن کوردێن باشوور ژی داگیر بکە و وەکە ئەو دخوازە وان ئاراستە بکە! پەکەکە ب مەدیایا خوە نها دکارە هەر دەرەوەکێ ب راستی و هەر راستییەکێ ژی ب دەرەو ب گەلێ باشوور بدە نیشاندان، ژ بەخترەشییا کوردان ژی ئەو مەدیایا باشوور ژی کو نە د بن باندۆرا پەکەکێ دابوو نها کەتییە ژێر باندۆرا پەکەکێ و تشتا کو پەکەکە دخوازە رەواج دکە، ئەڤ یەک چ ب زانین بە چ ب نەزانین لێ راستییەکە پڕ تەحلە! پەکەکێ نها هەموو گرسەیا خوە سەفەربەر کرییە و دخوازە ووسا نیشان بدە کو «ئەنفالا خوەزایا کوردستانێ» ژ لاوازیا حکوومەتا هەرێما کوردستانێ یە! د دەمەکی دە کو ت جیەک ژ ڤان جیێن دار لێ تێن بڕین نە د بن دەستهلاتا حکوومەتا باشوور دە بوونە! یێن خوەدیێن ڤان ناڤچەیان باش فێم دکن و ئەڤ یەک ب چاڤێ سەرێ خوە دیتیە، ب تایبەتی یێن کو ل نێزی «هەرێمێن پاراستنا مەدیا» دژین ڤێ یەکێ باش دزانن، گەلۆ چما دەما شێنیێن گوندێن سینۆری ژ بۆی سەخبێرکرنا رەزێن خوە دچوون وان ناڤچەیان پەکەکێ ئاستەنگی ژ بۆی وان چێدکرن؟! چما دەما ل زڤستانێ گوندیان دخوەست داران ببڕن پەکەکێ رێ نەددا و دگۆ وێ خوەزایا کوردستانێ تێک بچە، ئەم رێ نادن هوون داران ببڕن! چما حکوومەتا هەرێمێ گازێ ب وە نادە و هود…. لێ ترکیە ئەڤ دەما سالەکی یە داران دبڕە و دبە باکورێ کوردستانێ و ترکیێ لێ دەنگێ پەکەکێ تنە بوو هەیا کو بەرپرسێن باشوور ئەڤ مژار باس کری. گەلۆ بەرا ڤێ یەکێ پەکەکه ل کو بوو؟ ژ خوە پەکەکێ دگۆ ئەم سەرفەراز بوونە و مە لەشکەرێ ترکێێ شکاندییە و مە نەهشتییە یەک مەتر پێشدە وەرە!
دەستڤەبەردانا ئاخا باشوورێ کوردستانێ و بڕینا دارێن وێ ب لەیستۆکێن پەکەکێ نایێن ڤەشارتن
دەستڤەبەردانا ئاخا باشوورێ کوردستانێ و بڕینا دارێن وێ ب لەیستۆکێن پەکەکێ نایێن ڤەشارتن، یێن کو هنەکێ مەژیکێ وان هەبە ژی ب لەیستۆکێن وێ یێن سیاسی وەکە شاندنا پارلمنته‌ره‌كێ هەدەپێ ژ بۆی ڤان ناڤچەیان و وێنە کشاندنا وی کو رێگریێ ل لەشکەرێن ترک دکە نایێ خاپاندن. پەکەکە رۆژ ناچە کو نەبێژە؛ “مە لەشکەرێ ترکیێ تێک شکاندییە، گەریلایێن ئازادییا کوردستانێ هەر دەر ژ دژمن رە کرییە جەهەنەم، ئەمێ باشوور ژ ترکیێ رە بکن ڤیەتنام!”، لێ بەرەڤاژی نە ب تەنێ پەکەکە نکارییە لەشکرێ ترکیێ تێک بشکینە بەلکو ئەڤ ناڤچە هەموو رادەستی ترکیێ کرنە و ل شوونا ل سەر سینۆر شەرێ ترکیێ بکە هاتییە و شەرێ خوە ئانیە د دەرگەهێن باژارێن باشوور دە.
رێگریکرن ل بڕینا دارێن کوردستانێ نە کارێ پارلامانتارەک هەدەپێ یە، ئەڤ کارێ وان کەسانە کو رۆژ هەیا ئێڤارێ باس ل لەهەنگی و سەرفەرازیێ دکن، لێ ئەو ب خوە د شکەفتێن تاری دە رحەت رازاینە و جوانێن کورد بەر ب مرنێ پال ددن، رێگریکرن ل بڕینا دارێن باشوور کارێ جەمیل باییک، موراد قارایلان، مستەفا قاراسوو، دوران کالکان، بەسێ هۆزات و رێڤەبەرێن دن یێن پەکەکێ یە کو ژ بلی ئاخافتنێن ژ خوە مەزنتر، ژ بلی دروستکرنا فه‌وزایێ و پالدانا جوانێن کورد ژ بۆی مرنێ ت کارەک دی نزانن و د شکەفتێن ئاسێ یێن کوردستانێ دە بحەشتەک ژ خوە رە چێکرنە.
ت «پارتیەک کوردی» وەکە پەکەکێ نکارە ب پەیڤان بلەیزە و کوردان بخاپینە، د دەمەکی دە کو ل هەر جیهێ شکەستییە، هەر جی تەسلیمی ترکیێ کرییە و پاشدەڤەکشیایە، لێ د مەدیایا خوە دە کارییە خوە ب سەرفەراز بدە نیشاندان و کارییە ڤێ یەکێ ژی ب کوردان ب گشتی و ئالیگرێن خوە یێن ژ باشوور بدە قەبوول کرن!
چما په‌كه‌كێ مایین ل ژێر قامیۆنێن باركرنا داران نه چاندن، وه‌كه چاوا ل سه‌ر رێیا پێشمه‌رگه‌هان د چاندین؟
دڤێ هەر کوردەک ڤان پرسان ژ خوە بکە و ب ویژدان بەرسڤا خوە بدە! گەلۆ پەکەکە یا کو دکارە ل سەر رێیا د نێڤبەرا شێلادزێ و دهۆکێ دە مایینان ل سەر رێیا لەشکەرێن ترکیێ دانە، پەکەکە یا کو دکارە ل ناڤچەیێن سینۆری مایینان ل بەر ولاتی و هێزێن لەشکری یێن ترکیێ دانە، چما ژ بۆی جاراک ب تەنێ ژی نکاری مایینەکێ ل سەر رێیا قامیۆنێن بارکری ژ دارێن کوردستانێ دانە؟! گەلۆ پەکەکە یا کو دکارە ل باشوور ب سەربەستی ئێریشی لەشکەرێن ترکیێ بکە، ب سەربەستی هەر ولاتییەکێ باشوور بگرە و برەڤینە چیا، قەی نکارە ئاژۆڤانێن ڤان قامیۆنان ژی بگرە و وان برەڤینە؟ چیە داکو کەس جورئەت نەکە ڤی کاری بکە؟! پەکەکە یا کو ل باکور هەموو کارساز بازرگانێن کورد خەساندنە و تەهدیدێن کوشتنێ ل وان کرنە گەر باجێ نەدن پارتیێ، قەی نکارە ئاژۆڤان و خوەدیێن ڤێ شیرکەتێن كو دارێن باشوور دبڕن ژی تەهدید بکە داکو ڤی کاری نەکن؟! ب راستی چما پەکەکە دکارە هەر کوردەکی بەلنگاز تەهدید بکە و ئاستەنگییان ژ هەر کارساز و بازرگانەک کورد رە دروست بکە لێ نکارە ئاستەنگییان ژ ڤێ شیرکەتا ترکیێ رە دروست بکە؟! ب كورتاسی یێ کو هنەکێ مەژیکێ وی هەبە ئەو ب خوە دکارە ب هێسانی بەرسڤا خوە بدە.
گه‌نه‌رال مورات ژ كه‌ره‌ما خوه ژ بۆ مه جاره‌كه دن ب ئینفۆگرافیكێ زه‌لال بكه، چما گێریلایێن ئازادییا كوردستانێ رێ ل به‌ر تالان كرنا خوه‌زایا باشوور ناگرن
ل داویێ ئەم بانگ ل «گەنەرال موراد کارایلان» دکین ژ کەرەما خوە بلا کەرەم بکە و چەوا بەرا نها ب ئینفۆگرافیکێ ل سەر نەخشەیێ شیرۆڤەیا شەر دکر و ئەو جیهە نیشان ددان کو ب گۆتنا وی «گەریلایێن ئازادییا کوردستانێ» ل وڕ شەر دکن و رێ ل لەشکەرێ ترک دگرن، بلا ووسا ژی ب ئینفۆگرافیکێ و ل سەر نەخشەیێ ژ گەلێ کورد رە زەلال بکە ئەڤ دار ل کیژان ناڤچەیێ تێن بڕین و چما هەیا نها پەکەکێ ت ئێریشەک نەکرییە سەر شیرکەتا بڕینا داران و چما ئەوقاس ب هێسانی خوەزایا کوردستانێ تێ تالانکرن و ئەنفالکرن.
ئەم ل بەندا بەرسڤا «گەنەرال» موراد کاریلان دمینن.
