کوردستانێ و ئیراقێ بانگ ل ترکیێ کرن: بڕینا داران راوەستینن، ئه‌ڤ دژمناتییه‌

وەزارەتێن چاندنێ یێن ھەرێما کوردستانێ و ئیراقێ، ب داخویانیەکا ھەڤبەش داخواز ژ ترکیێ كرن، بڕینا دار و دارستانێن سنۆر یێن دەڤەرا به‌هدینان راوەستینیت.

وەزارەتێن چاندنێ یێن ھەرێما کوردستانێ و ئیراقێ د داخویانیەکێ دا، داخواز ژ ترکیێ دكه‌ن بڕینا دار و دارستانێن سنۆر یێن دەڤەرا به‌هدینان راوەستینیت و دیار دکه‌ن، ئەڤ کارەکی دژمنانەیه‌ و ل دژی مرۆڤاتی و ژینگەھێ یە.

ھەروه‌ھا ھەردوو وەزارەتێن چاندنێ داخواز ژ نەتەوێن یەکگرتی و رێخستنێن ناڤدەولەتی دکه‌ن، دا کو د چارەسەرکرنا ڤێ پرسگرێکێ دا ھەڤکار بن.

بەریا نھا، بەردەڤکێ حکوومەتا ھەرێما کوردستانێ جۆتیار عادل ب داخویانیەکێ نەرازیبوون و نیگەرانییا حکوومەتا ھەرێما کوردستانێ ل ھەمبەر بڕینا دارستانێن دەڤەرێن چیایی یێن ھەرێما کوردستانێ نیشان دا.

ھەروه‌ھا وەزارەتا چاندنێ و چاڤکانیێن ئاڤێ یا ھەرێما کوردستانێ، کۆمیتەیەک ژ بۆ لێکۆلینکرنا د پرسا بڕینا دارستانان ژ ئالیێ ترکیێ ڤە پێک ئینایه‌.