202 گوندێن ئامێدیێ ژ بەر شەرێ په‌كه‌كێ و ترکیێ ڤالا بوونە
202 گوند ل دەڤەرا ئامێدیێ ژ بەر شەرێ د ناڤبەرا په‌كه‌كێ و ئارتێشا ترکیێ دا ڤالا بوونە. وەلاتیێن وێ دەڤەرێ داخوازا چارەسەریێ دکن و دبێژن: زێدەتر ژ 6 ملیار دینار زیان گھیشتییە وان. پارلامەنتەرەک ژی داخوازێ ژ حکوومەتا ئیراقێ دکەت، رۆلا خوە د ڤێ پرسگرێکێ دا ببینیت.
ژ بەر شەرێ په‌كه‌كێ و ئارتێشا ترکیێ ڤە، رۆژانە گوندێن ل دەڤەرا ئامێدیێ د بن خه‌ته‌ریێ دا نە و زیان ژی ب ئاوایەکی بەردەوام ل وان دبیت. وەلاتیێن وێ دەڤەرێ دبنه قوربانیێن وی شەری و گوندێن خوە ڤالا دکه‌ن و ژێ دەرکەتینە.
ماجد یووسف وەلاتییەکی وێ دەڤەرێیە، داخوازێ ژ ھەر دو ئالیێن شەر دکەت کو شەرێ خوە راوەستینن، ژ بۆ كو خەلکێ وێ دەڤەرێ ڤەگەریت سەر مال و ملکێن خوە و ب ئارامی بژین.
ژ کۆما 250 گوندێن دەڤەرا ئامێدیێ، 202 گوند ڤالا ماینه و خەلک نه‌شێت ل جھێ باب و باپیرێن خوە بژین و ھەتا نھا ژی 34 وەلاتیێن وێ دەڤەرێ د ئەنجاما شەر په‌كه‌كێ و ترکیێ دا شەھید بووینە و ب دەھان ژی کەس بریندار بوونە.
قایمەقامێ قەزایا ئامێدیێ ئیسماعیل مستەفا ژ K24ێ را راگه‌ھاند، دەڤەرا وان بوویە قوربانییا ھەردوو ئالیێن شەر و داخواز کر کو دڤێت د زووترین دەم دا ئەڤ پرسگرێک بهێته چارەسەر کرن.
پارلامەنتەرا پارلامەنتۆیا کوردستانێ کلارا عودیشۆ ژی رادگه‌ھینیت، ھەموو پێکھاتەیێن ڤێ دەڤەرێ بووینە قوربانی و ھن تۆپ ل کەنیسەیان ژی کەتینە. حکوومەتا ئیراقێ ھەتا نھا چ ھەلوەستەکێ زەلال نیشان نەدایە ژ بۆ كو چارەسەریەک ژ ڤێ پرسگرێکێ را بهێته دیتن.
زیانێن سەکتۆرا گەشتیاری و چاندنیێ گەلەک زێدە بوونە و خودانێن پەزی ژی نزانن بەر ب کووڤە بچن، ژ بەر شەرێ په‌كه‌كێ و ترکیێ ژی، ب قاسی 6 ملیار دیناران زیان گه‌ھشتییە وێ دەڤەرێ.
