مەدیایێن کو گرنگیێ ب نووچە و رەوشا رۆژهلاتێ کوردستانێ ددەن راگهاند کو هندەک کەسێن سەر ب سوپایێ پاسدارێن ئیرانێ ب هەڤکاریا ئیدارەیا بەلگەکرنا زانیاریان و هەڤکاریا ئیتیلاعاتا سوپایێ پاسداران ل باژارێ “نەغەدە” یێ سەر ب پارێزگەها ئۆرمیێ ل رۆژهلاتێ کوردستانێ، ب مەرەما ب تورککرنا نەغەدە گڤاشێ ل سەر مالباتێن کورد یێن ل هن تاخێن کوردان دکەن و ژێرا دبێژن دڤێت هوون مالێن خوە چوول بکەن و هەر وەسا دەست دانیە سەر هندەک زەڤیێن چاندنیێ و مولکێن کوردان ل ڤێ ناڤچەیێ.
چاڤکانیێن مەدیایی هەر وەها ئەشکەرە کر، رەژێما ئیرانێ ب مەرەما چوولکرنا تاخێن کوردان و نیشتەجیکرنا تورکا کار دکە و پێش نها ژی ئەڤ کارانە ل نەغەدە ئەنجام دایینە.
ل گۆر زانیاریان هندەک کەس ب هەڤکاریا ئیدارەیا تۆمارکرنا بەلگەنامەیان و ئیتیلاعاتا سوپایێ پاسداران، بەلگەیێن ساختە ژ بۆی مالان ل تاخێن “بالخچی، حاجی خدر، قادری و تاخێ مەیدانا کاویان” و هندەک تاخێن دن چێکرنە و گەفان ل خەلکێ دکەن کو دڤێت وان مالان چوول بکەن.
چاڤکانی باس ل ڤێ یەکێ دکەن کو ئەو کەسێن دەست دانایە سەر زەڤیێن دێهم یێن د ناڤبەرا “حەوت کانی و سولتان یەعقووب”دا دخوازن وان زەڤیان داگیر بکەن.
هەڤدەم ب مەرەما ب تورککرنا ناڤچەیا نەغەدێ، باژارۆکەک د ناڤبەرا گوندێن “گۆزەگیران و دزە” چێکریە و هەژمارەک زێدە ژ خەلکێ ژ باژارێن وەکە “عەجەب شێر و ئازەرشەهر” ئانینە و ب هێنجەتا ڤێ یەکێ کو د پرۆژەیا چێکرنا توونەلان دا کار دکەن، ل وڕ نیشتەجی کرنە و هەموو خزمەتگۆزاری و ئاسانکاری ژ بۆی وان ئەنجام دایینە.
هەڤدەم ناڤێن کوردی یێن تاخ، جاددە و مەیدانێن ناڤا باژارێ نەغەدە و چیایێن ڤی باژاری گوهەرینە و ناڤێن ترکی ل سەر وان دانینە.
هێژایی گۆتنێ یە رەژێما ئیرانێ ژ بلی باژارێ نەغەدێ ل باژارێن “بیجار” و “قووروە” یێن سەر ب پارێزگەها سنە یا رۆژهلاتێ کوردستانێ ژی هەول ددەت پیلانا ب تورککرنێ جێبەجێ بکەت.
