ئێریشا پەکەکێ ل سەر پێشمەرگەیان بەرتەکێن هەری توند د سۆسیال مەدیایێ دە ل پەی خوە ئانین.
پاش ئێریشا تەرۆریستی یا ئیرۆ پەکەکێ ل سەر پێشمەرگەیێن کوردستانێ ئەنجام دایی، کوردستانیان د سۆسیال مەدیایێ دە بەرتەکێن هەری توند نیشان دان و ئەڤ کارێ پەکەکێ ب کارەک تەرۆریستی ب ناڤ کر و پەکەکە وەکە کرێگرتیێن سازیێن ئیستخباراتی یێن دەولەتێن داگیرکارێن کوردستانێ دان نیشاندان.
تەڤی کو ئیرۆ مەدیایا پەکەکێ و مەدیایا یەنەکێ یا سەر ب لاهۆرێ شێخ جەنگی ڤە دخوەست ئێریشا چەکدارێن پەکەکێ ل سەر پێشمەرگەیێن کوردستانێ ب ئێریشا دەولەتا ترک بۆ سەر پێشمەرگەیان دیار بکن، لێ بەلێ ئەو نکارین ئارمانجا خوە بجی بینن و رایا گشتی و کوردستانیان هەم ئێریش و هەم ژی دەرەوێن ڤان مەدیایان شەرمەزار کرن.
هەرچەند کو پەکەکە بەردەوام جوانێن باشوورێ کوردستانێ تەهدید دکە کو پەکەکێ رەخنە نەکن، و هەر کەس پەکەکێ رەخنە بکە ب مرن و رەڤاندن و ئیشکەنجەدانێ تێ دەهدید کرن، لێ ئیرۆ ت تشتەک نەبوو ئاستەنگ کو جوانێن باشوور ب گشتی پەکەکێ وەکە تەرۆریست و کرێگرتیێن دەولەتێ داگیرکەر بناڤ بکن.
ئەڤ یەکەم جارە د سۆسیال مەدیایا باشوورێ کوردستانێ ب ڤی ئاوا و ب جدی پەکەکە تێ رەخنەکرن، جوانێن باشوور یێن کو هنەکێ عاتیفە ل سەر پەکەکێ ژی هەی ئیرۆ رێخستن رەخنەکر، جوانان گۆت پەکەکە وەکە داعشێ تەڤدگەرە و دخوازە ستاتۆیا باشوور ژناڤ ببە، وان گۆت ئەڤ ئێریش و ئێریشێن دن یێن ب ڤی ئاوا کو پەکەکێ ل سەر پێشمەرگە کرین گرۆڤەیێن هەری بهێزن کو ئێدی ئەڤ رێخستن ب تەمامی کەتیە بن دەستێ سازیێن ئیستیخباراتی یێن دەولەتێن داگیرکار.
جوانان داخواز ژ پەکەکێ کر، شەرێ خوە ل باشوورێ کوردستانێ دوور بکن و ڤەگەرن مەیدانا خەباتا خوە یا سەرەکە کو باکورێ کوردستانێ یە، هەر وەها جوانان ژ پەکەکێ رە گۆت کو ئێدی بەسە و ئەم ناخوازین ببین سۆتەمەنیا ئاگرێ شەرێ وە یێ سەختە.
