پارێزگارێ دوھۆکێ دکتۆر عەلی تەتەر د داخویانیەکێ دا ئێرشا پەکەکێ یا ل سەر ھێزا پێشمەرگە ل سنۆرێ قەزایا ئامێدیێ ب توندی شەرمەزار کر و ژ چەکدارێن پەکەکێ خواست کو ژ خاکا ھەرێما کوردستانێ دەرکەڤن و بچنە مەیدانا خەباتا خوە.
پارێزگارێ دوھۆکێ د داخویانیا خوە دا راگھاند، “ئێریشا ئیرۆ 5ێ خزیرانا 2021ێ یا پەکەکێ ل سەر ھێزا پێشمەرگە د ئەرکێ فەرمی دا و ل ناڤا خاکا ھەرێما کوردستانێ ل سنۆرێ پارێزگەھا دوھۆکێ دا، ب توندی شەرمەزار دکەین و ئەم ھەڤخەمیا خوە ژ بۆ مالباتێن شەھیدان رادگەھینین و ھێڤیا باشبوونێ ژ بۆی برینداران دخوازین.”
عەلی تەتەر گۆت ژی: “د ھەمان دەمێ دا ئەم داخوازێ ژ چەکدارێن پەکەکێ دکەین، بچنە وان دەڤەرێن کو ب مەیدانا خوە دزانن. دڤێت دوماهی ب ھەموو ئێش و ئازارێن خەلکێ ھەرێما کوردستانێ بهێت. دڤێت پەکەکە نەبیتە ئەگەرا وێرانکرنا ھەرێما کوردستانێ.”
ئیرۆ دانێ سپێدێ ھێزەکا پێشمەرگە دەما د ئەرکێ خوەیێ فەرمی دا بوو، ل چیایێ مەتینا ل پارێزگەھا دھۆکێ کەتە کەمینەکا پەکەکێ و د ئەنجام دا 5 پێشمەرگە شەھید بوون و 4 کەسێن دی ژی بریندار بوون.
