پەکەکێ دو ئەفسەرێن ھێزا پێشمەرگە رەڤاندن

چەکدارێن پەکەکێ دو ئەفسەرێن ھێزا پێشمەرگەیێن کوردستانێ ل سنۆرێ شنگالێ رەڤاندن.

ل گۆر زانیاریێن گەهشتیە K24ێ، ئەو دو ئەفسەر ژ کۆمەلگەھا خانەسۆرێ بەر ب گوندێ بارێ چوون و کەتن کەمینا چەکدارێن پککێ و بەر ب جھەکی نە دیار ڤە ھاتن رەڤاندن.

د وێ دەربارێ دا بەرپرسێ کاریگەر یێ ھێزا پێشمەرگەیێن شنگالێ عەقید لوقمان گولێ راگھاند، “دو ئەفسەرێن ھێزا مەیێن ب ناڤێ فێرۆ میرزا ئۆسمان و بەدەل ئەمین ئۆسمان) کو پسمانێن ھەڤدو نە و د مۆلەتێ دا بوون، ل خالەکە کۆنترۆلێ یا پەکەکێ د ناڤبەرا خانەسۆر و گوندێ بارێ ھاتنە رەڤاندن.”

ئەمین عۆسمان کو بابێ ئەفسەرەکێ و مامێ یێ دی یە گۆت: “ھەر ژ دەما بھیستنا دەنگۆیا گرتنا وان ھەر دو ئەفسەران، ئەم چووینە جەم بەرپرسێن پەکەکێ و مە داخواز ژ وان کر تا کو ئازاد بکەن، لێ پەکەکێ رەد کر کو ئەو ھەر دو ئەفسەر ل جەم وان بن.”

ئەمین عۆسمان ھەروەھا گۆت: ” مە شاھد ھەنە کو چەکدارێن پەکەکێ ئەو ھەر دو ئەفسەرێن ھێزا پێشمەرگەیێن شنگالێ رەڤاندینە. مە مۆلەت دایە پەکەکێ، ئەگەر وان ئازاد نەکەن، ئەم دێ رێکارێن دی گرینە بەر خوە.”