پارتیا ماف و ئازادیان ھاک-پارێ د دەربارێ ئێریشا چەکدارێن پەکەکێ ل دژی پێشمەرگەیان داخویانیەک راگھاند.
ھاک-پار دبێژیت:
پەکەکە کەتیە بن کۆنترۆلا ھەرێمی یا دژی کوردان، ھەولدانێن خوە یێن ژ بۆ ژناڤبرنا تێکۆشینا ئازادی و سەرخوەبوونا کوردان یا ل رۆژئاڤا و باشوور بەردەوام دکەت.
ھەری داوی د 5ێ خزیرانا 2021ێ دا ل مەتینا کو ب ناڤێ سەرێ ئامێدیێ دهێتە ناسکرن ل ناڤچەیا ئامێدیێ یا دوھۆکێ پەکەکێ ب رۆکەتاڤێژێ ئێریشی کاروانەکێ پێشمەرگەیان کو ژ بۆ مینان دچوو ل دەردۆرا بارەگەھێن کو ھێزێن پێشمەرگە لێ ب جیھ ببوون کر. مخابن د ڤێ ئێریشا خاپینۆک دا رۆکەتەک ل ترۆمبێلا زرخی یا کو تیمێن بێ باندۆرکرنا مینان یێن ھێزێن پێشمەرگەیێن زێرەڤانی (ھێزێن تایبەت) تێدا بوون کەت. 5 پێشمەرگە شەھید کەتن، 6 پێشمەرگە ژی بریندار بوون.
پەکەکە د بن فەرمان و خزمەتا ھەرێمی یا دژی کوردانە، ب ئێریشێن وەھا ل ھەرێمێ رێکێ ژ بۆی ئارتێشا ترک ڤەدکەت و خزمەتا ترکیا دکەت کو ڤان دەران داگیر بکەت و قەرەقۆلان ئاڤا بکەت. نھا ب ئاوایەکێ ئاشکەرا دهێتە دیتن کو پەکەکە دخوازیت ئارتێشا ترک ل ھەرێمێن ستراتەژیک یێن د ناڤا ھەرێما کوردستانێ دا ب جیھ بکەت. ئەڤ ئێریشا پەکەکێ نەیا یەکەمینە، لێ بەریا ڤێ ل ئاکرێ، سیدەکان، دوھۆک و زاخۆ گەلەک ئێریشێن ب ڤی رەنگی ھەبوون. پەکەکە ژ بۆ ستاتویا رەوایا باشوورێ کوردستانێ خراب بکەت ھەر تشتی دکەت، گەلەک جاران ئێریشێن ب ھەمان رەنگی ل ھەمبەری ھێزێن پێشمەرگە دکەت.
ھاک-پار بانگ ل رایا گشتی یا وەلاتپارێز، دەمۆکرات، کورد و ھەموو وەلاتپارێزان، سازی و رێخستنێن وەلاتپارێز و ھەر وەھا ژ بۆ بەشێن ئاشتیخواز و ھومانیست دکەت؛
– دەم ھاتیە کو ل دژی پەکەکێ، کورد و کوردستان ببنە یەک و ببنە یەک دەنگ و یەک دل. دڤێت وەلاتپارێز ل ھەمبەری ھەموو ھەولدانێن دژمنانەیێن پەکەکێ حەساس بن. پەکەکە کەتیە دەستێ دژمنێن کوردان، دڤێت ب توندی بهێتە شەرمەزارکرن، دڤێت ھێزێن وەلاتپارێزێن ل ھەموو پارچەیان ژ ڤان ئێریشێن دژمنانەیێن پەکەکێ نەرازیبوونا خوە نیشان بدەن و ژ بۆ پاراستنا دەستکەفتیێن ل رۆژئاڤا و باشوور ببنە یەک.
وەکە ھاک-پارێ ئەم جارەکا دی دبێژین کو دڤێت ھەولدانێن پەکەکێ یێن ژ بۆ ژناڤبرنا مافێن ھاتینە بدەستخستن یێن ل رۆژئاڤا و باشوور بێنە تەسفیەکرن و ئەڤ رێخستنبوونا ئەنتی کورد بهێتە ئاشکەراکرن.
– دڤێت پەکەکە ب تەمامی ژ کوردستانێ بهێتە دەرخستن.
ئەم رەحمەتێ ژ بۆی پێشمەرگەیێن کو د ئەنجاما ئێریشا پەکەکێ دا شەھید بووی دخوازین و سەرساخیێ ل مالباتێن وان دکەین و شفایا خێرێ ژ بۆی پێشمەرگەیێن بریندار دخوازین.
نڤسینگەھا راگەیاندن و چاپەمەنیا ھاک-پارێ
