سەرکردەیێن ھەڤپەیمانیا یەکیتیا نەتەوی ئێریشا پەکەکێ بۆ سەر ھێزێن پێشمەرگە ب توندی شەرمەزار کرن و داخواز ژ جڤاکا ناڤدەولەتی و نەتەوەیێن یەکگرتی کرن رۆلا خوە ئاکتیڤ بکەن و ئالۆزیا کو پەکەکێ ل ھەرێما کوردستانێ دروست کریە، چارەسەر بکەن.
ھەڤپەیمانیا یەکیتیا نەتەوی کو ژ 5 پارتی، سازی و رێخستنێن ئاشووری، سریانی و کلدانی پێک دهێت، دوھی سەرکردەیێن وێ ل ناحیا عەینکاوا یا سەر ب ھەولێرێ ڤە جڤیان و د جڤینێ دا ئێریشا چەکدارێن پەکەکێ ل سەر ھێزا پێشمەرگەیا ل چیایێ مەتینا ل دەڤەرا ئامێدیێ یاکو تێدا 5 پێشمەرگە شەھید بوون، ب توندی شەرمەزار کرن و ب پێویستی زانین کو دڤێت پەکەکە و ئارتێشا ترکیێ شەرێ خوە ژ سەر خاکا ھەرێما کوردستانێ و ئیراقێ دوور بکەن.
سەرکردەیێن ھەڤپەیمانیا یەکیتیا نەتەوی تەکەز کرن، شەر و توندووتووژی نە چارەسەرییە و دڤێت ھەر دو ئالی ل چارەسەریێن ئاشتیانە بگەرن. ھەروھا داخواز ژ جڤاکا ناڤدەولەتی، نەتەوێن یەکگرتی و ئەنجوومەنا ئاسایشا ناڤدەولەتی کرن، رۆلا خوە ئەکتیڤ بکەن و وی شەری کو بوویە سەدەما ڤالابوونا پێتری 29 گوندێن کریستیانان ل دەڤەرێن دوھۆک و زاخۆ و ب سەدان مالبات کۆچبەر بوونە راوەستینن.
