پارتی ب ڤێ قووشێ ناگەھیتە مووشێ!
دەولەتێن مەزن پلان و پرۆژەیێن 50-100 سالی ئامادە دکەن و پاشەرۆژا دەولەتا خوە ل گۆر وان پلان و پرۆژەیان ساز دکەن. پشتی سالا 1965ێ، ب دامەزراندنا PDK-T و پارتییێن دی و ب باندۆرا شۆرەشا مەلا مستەفا بارزانی، ھەست و رامانێن نەتەوی و کوردستانی ل باکورێ کوردستانێ خورت بوون، کوردێن باکور ژ خەوا گران هشیار بوون. هشیاربوون و پێشکەتنا ھەستێن نەتەوی ترس و خۆف خستە دلێ بەرپرسێن دەولەتا ترک. ژ ئالییێ دی، ژ تێکچوونا پەیمانا لۆزانێ رە ژی 50-60 سالەک مابوون. ئەڤ ژی دھاتە واتەیا گوھارتنا نەخشەیا رۆژھەلاتا ناڤین و دامەزراندنا کوردستانەکا سەربخوە. ئەڤان ھەردو بوویەران دەولەتا ترک مەجبووری پلان و پرۆژەیێن نوو کر و پەکەکە د ئەنجاما ڤان پلان و پرۆژەیان دا ھات ئاڤاکرن. ئۆجالان بێی سەبەب نابێژیت “من پەکەکە ب پارە و چەکێن میتێ ئاڤا کر “.
پەکەکێ ب کوشتنا کوردان دەست ب شۆرەشا خوە کر و د ناڤا 40 سالان دا زێدەتری 100 ھەزار کورد دانە کوژتن. پەکەکێ گوند و باژارێن کوردستانێ ژ کوردان خالی و ڤالا کرن، مللەتێ کورد مەجبووری کۆچ و پەنابەرییێ کر، ھەستێن نەتەوی د گیانێ کوردان دا نەھێلان و بوو سەبەبێ بشافتنا زمانێ کوردی. پووچکرنا ھەستێن نەتەوی، ڤالاکرنا کوردستانێ و تێکبرنا کوردێن باکور ئارمانجا سەرەکی بوو. پەکەکە ل سەر ڤێ بنگەھێ ھاتە دامەزراندن و د شۆرەشا خوەیا باکور دا ب سەر کەت و گھشتە ئارمانجا خوە (!). پەکەکە دخوازیت ھەمان شۆرەشا وێرانکرن و ژناڤبرنا کورد و کوردستانێ ل باشوور، رۆژئاڤا و رۆژھلات ژی پێک بینیت. ژ خوە سەدەما کو ل باشوور، رۆژئاڤا و رۆژھلات ب جیھ بوویە ژی ئەڤەیە.
پەکەکە ئاشکەرا شەرێ کورد و کوردستانێ دکەت. د ڤێ ھەلوەستا خوە دا دروست و ڤەکرییە. حیزبا کو دژمناتییا کوردستانەک سەربخوە بکەت و پاراستنا سنۆرێن دەولەتێن داگیرکەر بکەتە ئارمانجا خوە، بێگومان دێ ئێریشی پێشمەرگەیان ژی کەت، دێ وان رەڤینیت و وان کوژیت ژی. ما پەکەکە نە ژ بۆ ڤێ ئارمانجێ دەرکەتیە ھۆلێ؟ بەلێ.
د بنیات دا ل ڤێرە حیزبا کو دڤێت بهێتە رەخنەکرن و حەتتا رەخنەیێن گەلەک توند لێ بێنە گرتن، پارتی و بارزانی نە. پارتیا کو د 1983یێ دا دگەل پەکەکێ دا پرۆتۆکۆل چێکر، ب ھەر شێوەیی هاریکاریا وان کر، ئەو ل باشوور ب جیھ کر و کرە بەلایا سەرێ ھەموو کوردان، بۆچی نەشێت ل دژی پەکەکێ ھەلوەستەکێ ئاشکەرا، وێرەک و توند دیار بکەت؟
چەند پرسیار و پێشنیاز
وەک میناک؛
١- پەکەکە یا کو د قادا ناڤنەتەوی دا د لیستەیا تەرۆرێ دایە و وەک رێخستنەک تەرۆریست دهێتە ناسکرن، بۆچی ژ ئالیێ پارتی ڤە ب قوربان و حەیران دهێتە پاراستن؟
٢- هندی کو پارتی هاریکاریا پەکەکێ کری و ئەو پاراستی، هاریکاریا دۆست و ھەڤالبەندێن خوە نەکریە. ھەکە ل شوونا پەکەکێ هاریکاریا دۆست و ھەڤالبەندێن خوەیێن ل باکور و رۆژئاڤا کربا یان ژی ئەو ب خوە ل باکور و رۆژئاڤا با، نھا دا رەوشا باکور، باشوور و رۆژئاڤا گەلەک باشتر بیت. وی دەمی پەکەکە نەدشیا وەکو ئیرۆ زەرەرێ ل ھەموو کوردان بدەت.
٣- ھوون دخوازن 24 دەمژمێران پەکەکێ وەک پارتییەک کورد بناسن، وێ وەک تەرۆریست نەبینن و بێژن “ئەم شەرێ براکوژی ناخوازن”، پەکەکە چ جاران نەبوویە و نابیتە پارتییەکا کوردستانی و ھوون بخوازن یان نەخوازن دێ پەکەکە شەرێ هەوە کەت. یان دڤێت ھوون نەتەو-دەولەت و کوردستانەک سەربخوە نەخوازن و وەک پەکەکێ یەکرێزییا سنۆرێن داگیرکەران بپارێزن، یان ژی دێ پەکەکە شەرێ وە کەت و ھەر رۆژ پێشمەرگەیان رەڤینیت و کوژیت.
٤- پەکەکە چ جاران ژ لێگەرن و قوربان و حەیرانێ تێناگەهیت. یان دڤێت ھوون دەست ژ چیرۆکا “شەرێ براکوژی” بەردەن و ب زمان و ھەلوەستا پەکەکێ بەرسڤا پەکەکێ بدن، یان ژی د چاڤێ کوردان و ئاورا ب گشتی دا ھوون دێ پچووک بن و چ رێز و پایە ژ بۆی هەوە نامینیت. ھەگەر ھوون دخوازن براستی ژ گەف و غەزەبا پەکەکێ خلاس ببن، دڤێت ھوون دوورشما “زۆر گیزەرێ رادکەت ” بۆ خوە بکەنە رێباز.
٥- ھەگەر براستی ھوون دخوازن ژ گەف و غەزەبا پەکەکێ و دەولەتێن داگیرکەر خلاس ببن، دڤێت ھوون خوە ژ سیاسەتا “تەنگ و ھندک و رندک” ئازاد بکەن، ژ بۆ چار پارچەیێن کوردستانێ سیاسەتەکا نەتەوی بمەشینن، ب ھەر ئاوا و دەرفەتێ هاریکاریا پارتییێن دۆست بکەن و ھەڤالبەندێن خوە خورتتر بکەن.
و ب دەھان پرس و پێشنیارێن دی….
ب کورد و کورمانجی؛ پەکەکە ب رەڤاندن، کوشتن، تێکلدان و دەستتوەردانان ئەرک و کار و خزمەتا خوە دکەت.
باشە، ل ھەمبەر کریارێن پەکەکێ، پارتی چ کریە، چ دکەت و دێ چ کەت؟
مخابن راستی تەعلە کاکە!
