حکوومەتا ئیراقێ و نەتەوەیێن یەکبوویی داکو چارەسەریەکێ ژ بۆ رەوشا کامپا پەنابەرێن مەخموورێ ببینن کو ب سەدەما ھەبوونا پەکەکێ ترکیا ئیریشی سەر وێ کامپێ دکەت، د ناڤ دانووستاندنێ دا نە.
بەغدایێ ژ بۆ چارەنڤیسا کامپا مەخموورێ بریار دا د جڤینەکا تایبەت دا رەوشا کامپێ ل گەل نەتەوەیێن یەکبوویی گۆتووبێژ بکەت.
شێورمەندێ ئاسایشا نیشتیمانی یا ئیراقێ قاسم عەرەجی د گەل وەزارەتا ناڤخوە و لژنەیا کارووبارێن پەنابەران یا پارلەمانێ ئیراقێ دا ل سەر مژارێ جڤیا کو بابەتێ سەرەکی رەوشا کامپا پەنابەران یا مەخموورێ بوو.
د جڤینێ دا بریار ھاتە دان جڤینەکا بلەز دەربارێ کامپا مەخموورێ لگەل لایەنێن پەیوەندیدار و نوونەرا سکێرتەرێ گشتی یێ نەتەوێن یەکبوویی بهێتە سازکرن.
ھاتە دیارکرن کو دێ د جڤینێ دا ژ بۆ دیتنا چارەسەریەکا گونجایی ژ بۆ چاوانیا سەرەدەریا لگەل دۆسیەیا مرۆڤی یا کامپا مەخموورێ و رەوشا ئەمنی و خزمەتگوزاریێن روونشتڤانێن کامپێ گۆتووبێژ بهێتە کرن.
