ل باژارۆکێ پێنجوین یێ سەر ب پارێزگەها سلێمانیێ ل باشوورێ کوردستانێ، دو ژ کادرێن چەکدار یێن پەکەکێ کو رۆژانە د ناڤا ڤی باژارۆکی دا دهێن و دچن، ل بەر چاڤێن خەلکی گولـلە بەردان وەلاتیەکێ، ئەو بریندار کر و حەتا نها سازیێن ئەولەهیێ ل پێنجوینێ چ لێپرسین د گەل وان دا نەکریە و ئەو دەستەسەر نەکرینە.
چاڤکانیێن پێگەها دارکا مازی ل باشوورێ کوردستانێ ئەشکەرە کر، دو چەکدارێن پەکەکێ یێن ب ناڤێ «جەمال مەحموود کوردە» کو د ئەساس دا خەلکێ باژارۆکێ پێنجوینە و «تارق لەتیف مەحموود»، رۆژانە ل سینۆرێ بارەگەهێ «نزارە» یێ پەکەکێ ل باژارۆکێ پێنجوین کار دکەن.
جەمال و تارق ل دەمژمێر 8:30ێ ئێڤارا رۆژا 18/5/2021ێ، ب بەهانەیا ڤێ یەکێ کو وەلاتیەکێ ب ناڤێ «کاروان کەریم گۆخلانی» کو ژ پەکەکێ ڤەقەتیایە، پەیوەندیێن نە شەرعی د گەل ژنەکا ب ناڤێ «خەندە»، کو هەڤژینا «جەمال مەحموود کوردە»یە و مامۆستەیە ل یەک ژ باخچەیێن زارۆکا ل پێنجوینێ هەنە، گولـلە بەردانە وی و ئەو بریندار کریە.
ڤان دو کادرێن پەکەکێ پێکڤە و ب چەکێ ئەلمانی یێ کو ب «16 خۆر» دهێتە ناڤکرن، ل باژارۆکێ پێنجوین گولـلە بەردانە کاروان گۆخلانی و ئەو بریندار کریە، ژبەرکو یەک ژ فیشەکان ب زکێ کاروان دکەڤیت، ئەو ب گرانی بریندار دبیت و ژ ئالیێ خەلکی ڤە رەوانەی نەخوەشخانەیەکا سلێمانیێ دهێتە کرن.
چاڤکانیێن پێگەها دارکا مازی هەر وەها ئەشکەرە کر، یا راست ئەڤ ئێریشا کادرێن پەکەکێ ب سەدەما ڤێ یەکێ بوویە کو هەر یەک ژ کاروان و مامۆستا خەندە بەری وێ یەکێ ئەندامێن پەکەکێ بووبوون، لێ ژ پەکەکێ ڤەقەتیابوون و هیچ پەیوەندیەک د گەل پەکەکێ دا نەمابوو، ئەڤە ژ ئالیەکێ، ژ ئالیەک دی ژبەرکو کاروان پشتی ژ پەکەکێ ڤەقەتیای، تەڤلی رێزێن پەدەکێ بوویە و وەکو کادرێ پەدەکێ ل رێکخراوا پێنجوین یا پەدەکێ دەست ب کار بوویە، ژ بەر ڤێ یەکێ کادرۆیێن پەکەکێ ئێریشی وی کرنە و ئەو بریندار کریە.
یا بالکێش د ڤێ یەکێ دا ئەڤەیە نە جەمال و نەژی تارق ژ ئالیێ سازیێن ئەولەهیا پێنجوین نەهاتنە دەستەسەرکرن و د نها دا هەر دو ڤەگەریانە بارەگەهێ نزارە یێ چەکدارێن پەکەکێ ل سنۆرێ باژارۆکێ پێنجوین.
پشتی مرنا «مام جەلال» و ب تایبەتی پشتی دەستبکاربوونا لاهۆر شێخ جەنگی وەکو هەڤسەرۆکێ یەکیتیێ، چەکدار و کادرۆیێن پەکەکێ ل سینۆرێ سلێمانیێ ب ئاوایەک ئازاد تەڤ دگەرن و هیچ هزرەکێ ژ بۆ یەنەکێ و سازیێن ئەولەهیا ڤێ پارێزگەهێ ناکەن، رەوش هندە ئالۆز و مەترسیدار بوویە کو هندەک جاران چەکدارێن پەکەکێ گەفان ل کادرێن یەکیتیێ ب خوە ژی دکەن.
