سەرۆکێ فراکسیۆنا پارتیا چەپا ل پارلەمانێ ھەرێما ھامبوورگا ئەلمانیایێ جانسو ئۆزدەمیر و شاندا لگەل، ل بالافرخانەیا دوسسەلدۆرفێ ژ ئالیێ پۆلیسان ڤە رێ ل بەر ھاتنا وان بۆ ھەولێرێ ھاتە گرتن. شاندا کو دخواست بهێتە ھەرێما کوردستانێ ژ 20 کەسان پێک دھات کو د ناڤ دا نوونەرێن سەندیکایان، چالاکڤان و شارەدارێ بەرێ یێ سوورا ئامەدێ عەبدوللا دەمیرباش ھەبوو.
ئەندامێن شاندێ کو ب گۆتنا وان دخوازن دیالۆگێ د ناڤبەرا لایەنێن کوردی دا ئاڤا بکەن، خواستن ژ ئەلمانیایێ بێنە ھەرێما کوردستانێ، لێ پۆلیسێن ئالمانیایێ رێگری ل وان کر.
سەرۆکێ فراکسیۆنا پارتیا چەپا ل پارلەمەنا ھەرێما ھامبوورگا ئالمانیایێ جانسو ئۆزدەمیر دیار کر کو ئەو چەند دەمژمێران د ناڤا ژوورەکا بێ پەنجەرە دا هاتینە راگرتن و گۆت: “ئەڤە ژی ئیسپاتەکا بەرچاڤە کو حکومەتا ئەلمانیایێ ناخوازیت ل کوردستانێ ئاشتی پێک بهێت. دخوازیت شەر گرانتر ببیت و زەرەر نەگرھیتە بازرگانیا وان یا چەکان د گەل ترکیا دا.”
ژ ئالیەکێ دی ھاتە راگھاندن کو ھەڤسەرۆکا کۆما پارتیا چەپ سابنی بۆیدنگاوس لگەل پۆلیسێن فەدەرالێن ئەلمانیایێ پەیوەندی دانایە و پۆلیسان گۆتیە وێ: “ئارمانجا راوەستاندنا وان، رێگریکرن ل بکارئانینا مەرتالێن مرۆڤییێن پەکەکێ یە و دا کو باندۆرێ ل پەیوەندیێن ناڤبەرا ئەلمانیا و ترکیا دا نەکەن.”
پۆلیسێ ئالمانیایێ ژی راگھاند کو دەربارێ هندەک کەسێن د ناڤ کۆما ناڤبۆری دا لێپرسین دانە دەستپێکرن و دیار کر: “ل گۆری پاراگرافا 46 مادەیا 2یا یاسایا نیشتەجبوونێ رێگری ل بەر کۆما کو دخواست بچیتە ئیراقێ ھاتە گرتن. قەدەغەیا گەشتێ حەتا 12ێ تیرمەھا 2021ێ ل سەر وان ھەبیت.
پۆلیسێ ئالمانیایێ ھەروھا د داخویانیا خوە دا ئاماژە ب وێ یەکێ کریە کو “ل گۆر زانیاریێن مە کۆمێن کوردێن نێزیکی پەکەکێ دخوازن ل ھەمبەری ھێزێن ئەولەکاریێ یێن ترکیا وەکو مەرتالێن زندی دەست ب چالاکیان بکەن.
دهێتە زانین کو وەزارەتا ناڤخوەیا حکوومەتا هەرێما کوردستانێ ژی ل رۆ پێنجشەمبا رابووری دا داخویانیەک بەلاڤ کر و تێدا راگهاند، پەکەکە ب رێیا هندەک گرووپ و ئالیگرێن خوە یێن ژ دەرڤەی هەرێما کوردستانێ دخوازیت رەوشا هەرێما کوردستانێ و ب تایبەتی رەوشا هەولێرێ تێکد بدەت کو ئەڤە ژی ژ بۆی مە هێلا سۆرە و ئەم رێ ب کارێن ب ڤی رەنگی نادەین.
