ئەنجوومەنا نیشتیمانی یا کورد ل سووریێ (ئەنەکەسێ) داخواز کر کو لێکۆلین دەربارێ ئێریشا ل دژی ناڤەندا عەفرینێ یا رۆژئاڤایێ کوردستانێ دا بهێتە کرن.
ئەنکسێ داخویانیەک دەربارێ تۆپبارانکرنا باژارێ عەفرینێ بەلاڤ کر و داخواز کر کو لێکۆلین دەربارێ ڤێ ئێریشێ بهێتە کرن.
د داخویانیێ دا، ئەمینداریا گشتی یا ئەنەکەسێ تۆپبارانکرنا باژارێ عەفرینێ یا رۆژا شەمبیێ، وەکی ئێریشەکا تەرۆریستی یا ترسۆنەک وەسف دکەت و داخوازا لێکۆلینێ دەربارێ وێ دکەت.
ئەمینداریا گشتی یا ئەنەکەسێ داخوازێ ل دەولەتێن پێوەندیدار دکەت کو لێکۆلینێ دەربارێ ڤێ ئێریشێ بکەن دا کو ئەنجامدەرێن وێ بێنە ناسکرن.
ئەنەکەسە ھەر وەھا ژ وەلاتێن پێوەندیدار و جڤاکا ناڤدەولەتی داخواز دکەت کو چارەسەریەکا سیاسییا بلەز ببینن دا کو ئێش و ئازارێن سووریان ب داوی بێن و سنۆرەک ژ بۆ ڤان کریاراران بهێتە دانین.
ل ناڤەندا عەفرینێ دوھی رۆژا شەمبیێ 12ێ خزیرانا 2021ێ ھەژمارەکا رۆکەتا کەتبوون و د ئەنجامێ دا 18 کەسان جانێ خوە ژ دەست دابوون و 42 کەسێن دی ژی بریندار ببوون.
ھێزێن سووریا دەمۆکراتیک (ھەسەدێ) دەربارێ ئێرشا ل دژی ناڤەندا عەفرینێ دا راگھاند کو نووچەیێن دبێژن، ھەسەدێ ئەو باژار مووشەکباران کریە، دوور ژ راستیێ نە و چ ھێزێن ھەسەدێ ل وان ناڤچەیان نینە.
دهێتە زانین کو پشتی ئێریشا ل دژی ناڤەندا عەفرینێ، هندەک سازیێن چاپەمەنیێ هێزێن هەسەدێ ب ڤێ ئێرێشێ تومەتبار کربوون.
