ھێزه‌ك ب ناڤێ پاراستنا شەنگالێ ھات دامەزراندن و دۆسیا ئەولەکارییا ناڤەندا شەنگالێ دێ د دەستێ ھێزێن پۆلیسان دا بیت و ئارتێشا ئیراقێ ژی دێ دەردۆرا ناڤچەیێ پارێزیت.
وەزیرێ ناڤخوە یێ ئیراقێ ئۆسمان غانمی، دوهی دوشەمبیێ /6/2021ێ ل گه‌ل جێگرێ فەرماندارێ ئۆپەراسیۆنێن ھەڤبەش یێن ئراقێ عەبدولەمیر شەمەری سەره‌دانا پارێزگەھا نەینەوایێ کر و د دەما ھەڤدیتنا ل گەل فەرماندارێن ئاساییشا نەینەوایێ دا دیار کر، کۆمیتەیەک ئەمنی ھەیە، دێ راستەراست چاڤدێرییا ھەموو رەوشێن دۆسیایێن گرێدای ئەولەکارییا ناڤچەیا شەنگالێ كه‌ت.
ھەروھا ئۆسمان غانمی دا زانین، ئەو کۆمیته دێ ب مەبەستا گۆتوبێژکرنا رەوشا ئەولەکاریێ، سەره‌دانا ھەردوو ناڤچەیێن مەخموور و شەنگالێ كه‌ت.
غانمی د بەردەوامیێ دا دەست نیشان کر، دۆسیایا ئەولەھیێ ل ناڤەندا شەنگالێ د دەستێ پۆلیسان دایە و ئارتێشا ئراقێ ژی دێ دەردۆرا ناڤەندا ناڤچەیێ پارێزیت.
هێژای گۆتنێ یه، د ل 9 ئۆكتۆبه‌را 2020ێ، بەغدا و ھەولێر ل سەر ئاساییکرنا رەوشا قەزایا شەنگالێ و برێڤەبرنا قەزایێ ژ ئالیێ ئیداری، ئەمنی و خزمەتگوزاری ڤە گه‌ھشتن رێکكەفتنێ، رێکەفتن ژ سێ تەوەرێن ئیداری، ئەمنی و ئاڤەدانکرنێ پێک دهێت و پاشکۆیە 9 خالی کو تێدا خشتەیا چاڤدێرییا ژ بۆ جیبجیکرنا رێکكەفتنێ و ئاساییکرنا رەوشا شەنگالێ ھاتیبە دیار کرن.
ل گۆر رێکەڤتنا ھەولێر و بەغدایێ یا ژ بۆ ئاساییکرنا رەوشا شەنگالێ، نابیت چ ھێزەکا چەکدار ژ بلی پۆلیسان ل وێ ناڤچەیا باشوورێ کوردستانێ بمین، لێ به‌لێ رێخستنا په‌كه‌كێ رێككه‌فتن ئاسته‌نگ كرییه و د شه‌نگالێ دا جی گرتییه.
