رێخستنا په‌كه‌كێ ئیرۆ ناسنامه‌یا 3 چه‌كدارێن خوه ئه‌شكه‌ره كر كو ب ده‌ستێ عه‌سكه‌رێ ترك ل سه‌ر خاكا باشوورێ وه‌لات هاتنه كوشتن و راگهاندییه: ئه‌و هێژان زارۆك بوون وه‌ختا وان «ته‌ڤگه‌را ئاپۆیی» ناس كری.
ناڤه‌ندا چاپه‌مه‌نی و راگهاندنێ یا هه‌په‌گێ بالێ له‌شكری یێ په‌كه‌كێ، ئیرۆ رۆژا چارشه‌مبی 16/6/2021ێ، ناسنامه‌یا 3 چه‌كدارێن رێخستنێ ئه‌شكه‌ره كر كو ب ده‌ستێ ئارتێشا تركیێ ل ناڤچه‌یا زاپێ یا باشوورێ وه‌لات هاتنه كوشتن.
ل گۆری داخویانییا هه‌په‌گێ، هه‌ر یێك ژ «محه‌مه‌د كادر، رۆسته‌م گارزان و مه‌دیا عه‌لی» ل رۆژا 31/5/2021ان كه‌تنه به‌ر ئێریشه‌كا ده‌وله‌تا تركیێ و جان دانه.
رێخستنا په‌كه‌كێ 2 ژ وان 3 چه‌كداران ژ رۆژئاڤا كوردستانێ كێشی باشوور كرنه، ئه‌و ژی مینا دۆزا رۆژئاڤا بێ رومه‌ت كرن و د تاكه په‌رچه‌یا ئازاد یا كوردستانێ ده، ژ بۆ ده‌مۆكراتیك كرنا تركیێ ب كوشتن دان، د داخویانیێ ژی ده پر ب روو قایمی گۆتییه كو ڤان هه‌ڤالان هێژ د زارۆكتییا خوه ده فكر و فه‌لسه‌فا ئاپۆ ناس كرییه و فێم كرییه.
رێخستنا په‌كه‌كێ ژ بۆ چێكرنا شه‌رڤانان، پشت به‌ستنێ ل سه‌ر خاپاندن و ره‌ڤاندنا زارۆكێن كوردان ژ هه‌ر چار په‌رچه‌یێن كوردستانێ دكه، ئه‌ڤ یێك ژی ژ هێلا رێخستنێن ناڤنه‌ته‌وی و یێن پاراستنا مافێن زارۆكان هاتییه ته‌سبیت كرن، په‌كه‌كه كو زارۆكێن كوردان وه‌كه فیشه‌كا ل به‌ر تڤه‌نگا خوه دبینه، وان ژ بۆی ده‌مۆكراتیك كرنا تركیێ و براتییا ساخته یا گه‌لان ب كوشتن دده و پشتره تێ و دبێژه فه‌دایێ ئاپۆ به.
