پارتیا سۆسیالیستا کوردستانێ (پەسەکە) دەربارێ ئێرشا دژی ئاڤاھیا پارتیا دەمۆکاتیکا گەلان (ھەدەپێ)یا ل ئیزمیرێ راگھاند “حکومەتا ئاک پارتیێ ل ھەمبەر ئێرشێن ل دژی ئۆپۆزسیۆنێ بێدەنگە، پشتا ئێرشکاران دگریت.”
ئیرۆ رۆژا پێنجشەمێ 17/6/2021ێ پەسەکێ دەربارێ ئێرشا دژی ئاڤاھیا ھەدەپێ ل ئیزمیرێ داخویانیەک بەلاڤ کر و د وێ داخویانیێ دا ئێریشا ل سەر ھەدەپێ و کوشتنا ئەنداما ھەدەپێ ب توندی شەرمەزار کر.
د داخویانیا خوە دا پەسەکە دبێژیت: “ل گۆری نووچەیێن مەدیایێ، کەسەکێ کو ئێریشی ئاڤاھیا ھەدەپێ ل ئیزمیرێ کریە، د ھەمان دەمێ دا ئەندامەکا ژن یا ھەدەپێ ژی د ناڤا ئاڤاھی دا کوشتیە.”
پەسەکە کریارێن حکوومەتێ یێن دژی ئۆپۆزسیۆنێ ببیر خستن و راگھاند: “پێشتر ژی خواستن سەرۆکێ جەهەپێ کەمال کلچدارۆغلوو ب کەسەکێ دەرڤەی یاسایێ بدەنە نیشاندان و سەرۆکێن پارتیێن سیاسی راستی ئێرشێ ھاتنە. ل کوردستانێ، زەخت و ئاستەنگیێن ل پێشیا چالاکیێن سیاسی ھەر کو دچیت زێدەتر دبن. ھەر رۆژ، ب سەدان سیاسەتمەدارێن کورد تێنە دارزاندن، گرتن و داڤێژن زندانان. دۆزا گرتنێ یا ل دژی چار پارتیێن کو پەیڤا کوردستانێ بکار ئانیە بەردەوامە. پارتیا مرۆڤ و ئازادیێ (پا) ھەر چەند ھەموو بەلگە و پرۆسەیا پێویستێن ژ بۆ دامەزراندنا فەرمی تەمام کریە ژی، لێ وەزارەتا ناڤخوە بەلگەیێن وێ وەرناگریت.”
پەسەکە تەکەز دکەت کو حکوومەتا ئاک پارتی ل ھەمبەر ئێرشێن ل دژی موخالەفەتێ بێدەنگە و دبێژیت: “دەستھلاتداریا ئاکەپێ، پشتا ئێرشکاران دگریت. دادگەها کو د بن فەرمانا دەستھلاتداریێ دایە، ئەرکێن خوە بجھ ناینیت.”
ھەروھا پەسەکێ راگھاندیە: “ئێرشا ل دژی ئاڤاھیا ھەدەپێ یا ئیزمیرێ یەکەم ئێرشا دژی ئالیێن ئۆپۆزسیۆنا رەژیما یەک زلامیا داگیرکەر نینە. ئەگەر وھا بەردەوام بیت، نابیتە ئێرشا داویێ ژی. ئەم ئێرشا ل دژی رێخستنا ھەدەپێ یا ئیزمیر کو ل پێش چاڤێن ھێزێن ئەولەھیێ ھاتە ئەنجامدان پرۆتەستۆ دکەین. ئەم سەرساخیێ ژ مالباتا کەسا د ئێریشێ دا ژیانا خوە ژ دەست دایە و ژ ھەدەپێ دخوازەن.
ئاڤاھیا پارتیا دەمۆکراتیکا گەلان (ھەدەپێ)یا ل ئیزمیرێ راستی ئێرشا کەسەکی ھات و ھەولا شەوتاندنا ئاڤاھیێ ھات دایین و د ئەنجاما وێ ئێریشێ دا ئەندامەکا ھەدەپێ یا ب ناڤێ دەنیز پۆیراز ھاتە کوشتن.
