ئۆفیسا K24 ل رۆژئاڤایێ کوردستانێ ژ ئالیێ ئاسایشا پەیەدێ ڤە ھاتە گرتن

ئۆفیسا K24 ل رۆژئاڤایێ کوردستانێ ژ ئالیێ ئاسایشا پەیەدێ ڤە ھاتە گرتن

 ئۆفیسا تەلەڤیزیۆنا کوردستان24 یا ل رۆژئاڤایێ کوردستانێ ژ ئالیێ ئاسایشا پەیەدێ ڤە ھاتە گرتن. رێڤەبەریا تەلەڤیزیۆنێ ل سەر ڤێ یەکێ داخویانی دا.

رێڤەبەریا تەلەڤیزیۆنا کوردستان24، کو ناڤەندا وێ یا سەرەکی ل باژارێ ھەولێرێ یە، د داخویانیەکێ دا راگھاندیە، ئاسایشا پەیەدێ دیسا ئۆفیسا وان یا ل رۆژئاڤایێ کوردستانێ (قامشلۆ) گرت و نەھیشت ئەو دەزگەھێ مەدیایی خەباتێن خوە ل وێ پارچا کوردستانێ بکەت.

رێڤەبەریا K24 بانگ ل سازیێن پەیوەندیداریێن ناڤدەولەتی ب تایبەت ھێزێن ھەڤپەیمان دکەت کو زەختێ ل رێڤەبەریا رۆژئاڤا بکەن بۆ بەتالکرنا وێ بریارێ. داخویانیا K24 وھایە:

مخابن ئیرۆ 20ێ خزیرانا 2021ێ جارەکا دی نڤیسینگەھێن K24 ل رۆژئاڤایێ کوردستانێ ب بریارا ئاسایشا پەیەدێ ھاتنە گرتن. د دەمەکێ دا کو K24 ب ریا نڤیسینگەھ، پەیامنێر و تیمێن خوە ب بەردەوامی دەنگێ خەلکێ وێ بەشا کوردستانێ گھاندیە جیھانێ و بێ ئالی و پیشەیانە سەرەدەری لگەل بوویەر و پێشھاتان کریە و چ دەمەکێ یاسایێن پەیرەوەکری بنپێ نەکرنە.

K24 وەک دەزگەھەکێ نیشتیمانی، ب بەرپرسیارانە سەرەدەری لگەل پرسێن نەتەوەیی کریە و ل ھەر بەشەکێ کوردستانێ د ئاستا چاڤەرێ یا خەلکێ دا بوویە، ل ھەمبەر ئێریشێن ل سەر عەفرینێ، سەرێ کانیێ و گرێ سپی بوو دەنگ و رەنگێ رۆژئاڤا و ئاژانسێن نووچەیان یێن جیھانێ و کەنال و تەلەفزیۆنێن ناڤدەولەتی ژی، کوردستان24 کربوو چاڤکانیا خوە یا سەرەکی و ب ریا کامیرایا تیمێن کوردستان24ێ دیمەن ژ بۆ جیھانێ ڤەدگوھاستن.

گرتنا نڤیسینگەھێن کوردستان24ێ بنپێکرنا ل ھەمبەر ئازادیا چاپەمەنیێ، کارێ راگھاندنێ و مافێن مرۆڤانە ژی. بەلگەیەکا دی یا ل سەر بێ باوەریا دەستھلاتدارێن ل رۆژئاڤایێ کوردستانێ ب ئازادیا کارێ چاپەمەنیێ و سەرکوتکرنا دەنگێن جودایە.

بەرپرسێن رۆژئاڤایێ کوردستانێ گەلەک باش، راستیا خەباتا کوردستان24ێ و بەرپرسیارتیێن وێ یێن نەتەوەیی و نیشتیمانی دزانن و باش ژی دزانن کو کوردستان24 ھەر دەم د ئەنیا یەکیتی و ئاشتیا جڤاکی دا بوویە، لێ خویایە کو ئەو بریار ب فەرمانا ل جیھەکێ دی ل سەر وان ھاتیە سەپاندن.

ئەم داخواز ژ رێخستنێن مافێن مرۆڤان، کارێ چاپەمەنیێ، پارێزڤانێن ئازادیا رۆژنامەڤانان، فەدەراسیۆنا رۆژنامەڤانێن ناڤدەولەتی و نەتەوەیێن یەکگرتی و جڤاکا ناڤدەولەتی و ب تایبەتی ھەڤپەیمانیا ناڤدەولەتییا ل دژی داعشێ دکەین کو ل بەر ڤێ بریارا نەرەوا راوەستن و فشارێ ل رێڤەبەریا باکور و رۆژھلاتێ سووریەیێ بکەن، ژ بۆ ڤێ بریارا نەرەوا یا ل دژی دەزگەھا کوردستان24ێ ھەلوەشینن و ئێدی رێگریێ ل ئازادیا کارێ رۆژنامەگەریێ نەکەن.

پوستێن ھەمان بەش