سەرۆکێ ھەرێما کوردستانێ نێچیرڤان بارزانی ئیرۆ د مەراسما دەرچوونا قۆتابیێن زانینگەھا ئامەریکی یا کوردستانێ ل دوھۆکێ دا راگھاند، دڤێت لایەنێن سیاسی یێن باشوورێ کوردستانێ ب ئاوایەکێ یەکدەنگ و ب ھەلوەستەکێ ھەڤبەش پەیامەکێ بدەنە پەکەکێ کو “ئەو شەرێ نھا چ سوودەک نینە و دڤێت پەکەکە وی شەری ژ گەلێ کوردستانێ دوور بکەت.”
ئیرۆ مەراسما دەرچوونا قۆتابیێن زانینگەھا ئامەریکی یا کوردستانێ ل دوھۆکێ ھاتە لدارخستن و سەرۆکێ ھەرێما کوردستانێ، نێچیرڤان بارزانی، سەرۆکوەزیرێ ھەرێما کوردستانێ مەسروور بارزانی و ھەژمارەک رایەدارێن دی یێن حکوومەتا ھەرێما کوردستانێ د مەراسمێ دا ئامادە بوونە.
سەرۆکێ ھەرێما کوردستانێ نێچیرڤان بارزانی د مەراسمێ دا گۆتارەک پێشکێش کر و د پەیاما خوە دا ئاماژە ب شەرێ ناڤبەرا ئارتێشا ترکیێ و پەکەکێ د ناڤ ئاخا ھەرێما کوردستانێ کر و داخواز کر، ئەو شەر ژ ئاخ و گەلێ کوردستانێ بهێتە دوورخستن.
نێچیرڤان بارزانی گۆت: “دڤێت ئەم ب یەک دەنگی و یەک ھەلوەستی بێژینە پەکەکێ، ئەڤ شەرە بێ سوودە و ڤی شەری ژ گەلێ کوردستانێ دوور بکە.”
نێچیرڤان بارزانی ھەروھا گۆت، “دڤێت ئەم ب یەک دەنگی و یەک ھەلوەستی بێژینە پەکەکێ ب بێرێزی ل ئیرادەیا خەلکێ ھەرێما کوردستانێ و دەزگەھێن وێ یێن رەوا نەنێریت.”
سەرۆکێ ھەرێما کوردستانێ ھەروھا دایر کر، “دڤێت د ناڤخوەیێ کوردستانێ دا ئەم یەکرێزیا خوە خورت بکەین، کو ئەڤ یەک گارانتیا پاراستنا مافێن مەیێن دەستووری یە.”
