تەڤدا پرێس کو یەک ژ رووپەلێن پەکەکێ یە، رۆژ ناچیت کو دەرەوان بەلاڤ نەکەت، سەرەرای کو پەکەکە د هەموو چاپەمەنیا خوە دا مژوولی بەلاڤکرنا پرۆپاگاندا و دەرەوێن ب شاخە، لێ بەلێ دبیت کو هندەک جاران هندەک راستیان ژی باس بکەت، لێ د تەڤدا پرێس دا هیچ راستیەک ناهێتە بەلاڤکرن، هەموو نووچەیێن کو د تەڤدا پرێس دا تێن بەلاڤرن درەون، گەر مرۆڤ بخوازیت بەرسڤا نووچەیێن تەڤدا پرێس بدەت و درەوێن وان ئاشکەرا بکەت دڤێت مرۆڤ کارێ خوە بکەتە بەرسڤدانا وان، لێ یا کو گەلەک بالکێش درەوا وان یا بەری دو رۆژان بوو.
بەری دو رۆژان، ئانکو ل 20/6/2021ێ، ل زانینگەها ئەمەریکی یا دوهۆکێ ئاهەنگەک ب ئامادەبوونا بەرپرسێن حکوومی و حیزبی یێن هەرێما کوردستانێ و ئیراقێ و مالباتێن قۆتابیێن دەرچوویی و…..هتد هاتە ئەنجامدان، د ئاهەنگێ دا کو ب دەنگ و رەنگ د مەدیایا باشوورێ کوردستانێ دا هاتە بەلاڤکرن، تەڤدا پرێسێ دیسا وەکو کارێ خوە یێ هەردەم دەست ب بەلاڤکرنا درەوان کر و نڤیساند، «ئەندامەکێ سەرکردایەتیا پەدەکێ ل بەرامبەر سروودا ئەی رەقیب ل سەر پیێن خوە نە راوەستیا»، وان نڤیساند، «د مەراسیما زانینگەها ئەمەریکی ل دوهۆکێ، قادر قاچاخ، ئەندامێ سەرکرداتیا پەدەکێ ژ بۆی سروودا ئەی رەقیب ل سەر پیێن خوە نە راوەستیا»، ئەڤ نووچە ب ئاوایەکێ هاتە سەرڤیس کرن کو کەسەکێ هایا وی ژێ نەبیت دێ باوەر کەت، لێ گەلۆ راستیا ڤێ یەکێ چییە؟!
ل دەستپێکا ئاهەنگێ دا پێشکێشکارا ئاهەنگێ گۆت، «ئەم ژ ئامادەبوویان داخواز دکەین وەکو رێزگرتن ژ بۆی خوینا شەهیدان و سروودا نیشتیمانی دەمەکێ ئەم هەموو ب هەڤ را ل سەر پێیان راوەستین»، هەر کەس ل سەر پێیان راوەستیا، لێ یەکەمجار سروودا نیشتیمانی یا ئیراقێ هاتە پەخشکرن، ئەڤە بوو سەدەم کو قادر قاچاخ ب تەنێ روونیت و حازر نەبیت ژ بۆی سروودا نیشتیمانی یا ئیراقێ ل سەر پیێن خوە راوەستیت، ژبەرکو قادر قاچاخ کەسەک نشتمانپەروەر و کورد دۆستە، ئەو ب چ رەنگا رازی نابیت ژ بۆی سروودا ئیراقێ ل سەر پیێن خوە راوەستیت، بێ گومان ئەڤ یەک ژ بۆی بەرپرسێن دی یێن کورد ژی ووسایە لێ بەلێ ژ بەر بەرپرساتیا حکوومی و ئەتەکێتێن دبلۆماسی ئەو نکارن ڤێ یەکێ بکەن، لێ پاش کو سروودا نشتمانی یا کوردستانێ هاتیە پەخشکرن قادر قاچاخ ل سەر لنگان سەکنی، ئەڤ یەک ب زەلالی د ڤیدیۆیان دا خوەیا دبیت.
یەکەم جار تەڤدا پرێسی ب وێنەیەکی و پاشان ب ڤیدیۆیەکی کو دەنگێ وێ بڕیبوو داکو خەلک پێ بهێتە خاپاندن و ووسا فام بکەن کو ب راستی قادر قاچاخ ژ بۆی سروودا نشتمانی یا کوردستانێ ل سەر پێیان رانەوەستایە و بێ رێزی ب سروودا نشتمانی یا کوردستانێ کریە، لێ پشتی دەمەکێ کورت ئەڤ درەوا وان ژ لایێ جوانێن کورد ڤە هاتە ئاشکەرا کرن و ب بەلاڤکرنا ڤیدیۆیا دروست فەساد و بێ بەختێن تەڤدا پرێسێ ناچار کرن ڤێ نووچەیا خوە راستڤەکەن، ژ بۆ ڤێ یەکێ پشتی بوورینا دەمەکێ کورت ئەو ناچار مان نڤیسینا خوە راستڤە بکەن وان نڤیساند، «د ئاهەنگا زانینگەها ئەمەریکی ل دوهۆکێ، قادر قاچاخ، ئەندامێ سەرکرداتیا پەدەکێ ژ بۆی سروودا نشتیمانی ل سەر لنگان نە سەکنی»، ئانکو وان خواست ووسا خەلکی بخاپینن و ووسا نیشان بدەن کو وان درەو نەکریە، لێ ئەڤ درەوە د دەستێن وان دا روون بوو و هەر کەس دکاریت ڤێ یەکێ د رووپەلا وان یا فەیسبۆکێ دا ببینیت کا وان بەرێ چ نڤیساندبوو و پاشان چاوا راستڤەکریە. ژ بەر ڤێ یەکێ فەرە مرۆڤ ناڤێ تەڤدا پرێسێ بکەتە تەڤدا درەو، بۆچی؟! ژبەرکو د رووپەلا وان دا هیچ راستیەک ناهێتە بەلاڤکرن، ب تەنێ درە و وێنەیێن فۆتۆشۆپ کری هەنە، نڤیسەرێن قەلەم فرۆش و جاشێن بەرێ هەنە، ئەو خزمەتا هەر کەس و ئالیەکی دکەن، ب تەنێ خزمەتا کورد و کوردستانێ ناکەن، ژ 100 نووچەیێن وان یێن داویێ 98 نووچەیێن درو ژ بۆی خراب و کرێت نیشاندانا حکوومەتا هەرێما کوردستانێ هاتنە سەرڤیسکرن. رێڤەبەرێن ڤێ رووپەلێ ووسا فام دکەن کو گەلێ کورد وەکو گەریلایێن ل سەرێ چیا و د شکەفتان دانە و ب تەنێ ل مەدیایا پەکەکێ دنێرن، گەر نە ب راستی بالکێشە کو ب ڤی ئاوا درەوێن ئاشکەرا پارڤە دکەن و ووسا باوەر دکەن دێ خەلک باوەر کەت، ئەم ل ڤێرە دبێژینە وان، گەلێ کورد هشیارە و هەر تشی فام دکەت، هوون ب درەوێن خوە نەشێن گەلێ کورد ژ بۆی بەرژەوەندیێن خوە و دەولەتێن داگیرکارێن کوردستانێ بخاپینن، چاڤێ مە ل سەر درەوێن وەیە، لێ ئەم ناخوازین دەمێ خوە یێ زێرین ژ بۆی درەوێن وە تەرخان بکەین.
فەرموون ب بەلگە ڤێ درەوا تەڤدا پرێسێ ب چاڤێ سەرێ خوە ببینن:
ڤیدیۆیا کو تەڤدا پرێسێ دەنگێ وێ بڕی و بەلاڤکری:
https://www.facebook.com/TevdaPress21/videos/315409413399948
