به‌شا چاپه‌مه‌نیێ یا ده‌زگه‌ها رۆشه‌نبیری و راگه‌هاندنا پارتییا ده‌مۆكرات یا كوردستانێ، به‌رسڤا دوران كالكان دده‌ت و دبێژیت: «په‌كه‌كه ژ بۆ ئازادی و هاریكاریێ نه‌هاتییه هه‌رێما كوردستانێ، لێ به‌لێ ره‌ڤیایه».
پارتی د به‌رسڤا دوران كالكانێ ئه‌ندامێ كونسه‌یا رێڤه‌به‌ر یا كه‌جه‌كێ كو ل رۆژا 21 ڤێ مه‌هێ ژ بۆ ئاژانسا ANFێ ئاخڤییه، ئه‌ڤرۆ داخویانی دا و ته‌ڤ دره‌وێن كالكان ئیفشا كرن.
په‌كه‌كه ژ بۆ ئازادی و هاریكاریێ نه‌هاتییه هه‌رێما كوردستانێ، ره‌ڤیایه
پارتی د به‌رسڤا كالكان دا كو گۆتبوو: «ئه‌م ژ بۆ ئازادییا كوردستانێ هاتنه ڤر» دبێژیت: «هوون ب چ لۆژیكی دبێژن ئه‌م ژ بۆ رزگارییا كوردستانێ هاتینه، گه‌ل باش دزانیت رێبه‌رێن په‌كه‌كێ ژ تركیێ ره‌ڤیانه و ل ڤێرێ ژی ده‌ستێ خوه ئێخستینه ناڤ ده‌ستێ حكوومه‌تا ئیراقێ و ژ بۆ خه‌لكی بووینه به‌لا و سه‌رئێش».
پارتی دبێژیت: «دوران كالكان د هه‌ڤدیتنا خوه یا ژ بۆ ئاژانسا ئانفێ دا وه‌ها ئاخڤییه هه‌ر وه‌ك وی ئاگاهیێن خه‌ته‌ر و نهێنی ئیفشا كرینه ژ بۆ كو پارتی پێ ئیحراج بكه‌ت، لێ به‌لێ د راستی دا، كالكان چ زانیاری و ئاگاهی ئیفشا نه‌كرینه و گۆتنێن وی وه‌ك راپۆرته‌‌كێ نه».
خه‌لك باش دزانیت په‌یڤا كورد و كوردستان د فه‌رهه‌نگا په‌كه‌كێ دا نینه
پارتی د به‌رسڤا كالكان دا دبێژیت: «هه‌ر كه‌س دزانیت كو ناڤێ كورد و كوردستانێ د فه‌رهه‌نگ و ئه‌ده‌بیاتا په‌كه‌كێ دا نینه، په‌یوه‌ندییا په‌كه‌كێ و رێبه‌رێن وێ ب كورد و كوردستانێ ته‌نێ خوه فه‌رز كرن و ئیستغلال كرنه، هه‌روه‌ها په‌كه‌كه ناڤێ كورد و كوردستانێ، ئالا كوردستانێ و دیرۆكا رزگاریخوازییا نه‌ته‌وی یا كوردستانێ ره‌د دكه‌ت».
د به‌شه‌كا داخویانییا پارتی دا هاتییه: پێویسته په‌كه‌كه به‌رسڤا هه‌زاران دایك و بابێن كوردان بده‌ت و ژێرا ببێژیت كانێ ب چ ئاوایی رێخستنێ زارۆكێن وان كرینه سۆته‌مه‌نییا شه‌ری و ل پێناڤێ چ سلۆگانه‌كی ئه‌و ب كوشتن داینه.
پارتی دپرسیت: ئه‌رێ كچ و كۆرێن مه ل گاره‌ی، مه‌تینا، باتووفێ و شنگالێ، هه‌روه‌ها ماوه‌ت و شارباژێر و پێنجوینێ چ دكه‌ن؟، بۆچی ئه‌و ل ڤان ده‌ران روو ب رووی پێشمه‌رگه‌هان دبن؟
دوران كالكان د هه‌ڤدیتنا خوه یا ژ بۆ ANFێ دا به‌حسا هاریكارییا باشوورێ كوردستانێ دكه‌ت، د ڤێ ده‌ربارێ دا، پارتی دبێژیت: «په‌كه‌كه ژ جۆگرافیایا خوه یا راستین ره‌ڤیایه، ژ رۆژا كو ئه‌و هاتینه د باشوور دا و هه‌تا رۆژا مه یا ئه‌ڤرۆ، ئه‌و ته‌نێ بووینه باره‌كێ گران و سه‌رئێش ژ بۆ گه‌لێ باشوور».
د داخویانییا پارتی دا، هه‌موو ده‌ره‌وێن دوران كالكان ل ده‌ربارا كادرۆیێن پارتی «زه‌عیم عه‌لی و ئازاد به‌رواری» هاتینه ئیفشا كرن و ژ كالكان پرسی یه؟ ئه‌رێ هوون ب چ لۆژیكی دبێژن كو ئه‌م ژ بۆ رزگارییا كوردستانێ هاتینه؟ رێبه‌رێن په‌كه‌كێ ژ تركیێ ره‌ڤیانه و ل ڤێرێ هه‌تا رۆژا مه یا ئه‌ڤرۆ وان ده‌ستێ خوه ئێخستنه ناڤ ده‌ستێ حكوومه‌تا ئیراقێ.
داخویانییا پارتی ته‌سلیم كرنا 6 كادرۆیێن لقا یه‌كا خوه ل سالێن هه‌شتێیان ل بیرا كالكان دئینیت و دبێژیت: «په‌كه‌كه ئه‌ڤرۆ ژی بوویه هه‌ڤرێیا دژمن و دژبه‌رێن كوردستانێ».
ل ده‌ربارا سه‌رۆك مه‌سعوود بارزانی ژی كو دوران كالكان د هه‌ڤدیتنێ دا، گۆتییه كو په‌كه‌كێ دخوه‌ست جه‌نابێ سه‌رۆكی بكه‌نه سه‌رۆكه‌ك نه‌ته‌وه‌یی، پارتی گۆت: «هه‌ر كه‌س دزانیت په‌كه‌كه نه د ئاسته‌كێ وه‌ها دا یه و مافێ وێ نینه كه‌سه‌كی بكه‌ته سه‌رۆكێ نه‌ته‌وه‌یی، لێ به‌لێ ته‌نێ گه‌لێ كوردستانێ ئه‌ڤ مافه هه‌یه.
په‌كه‌كه شه‌ری ناكه‌ت، د ره‌ڤێ دا یه و ته‌نێ پێشمه‌رگه‌هان شه‌هید دكه‌ت
ل ده‌ربارا سووچبار كرنا پارتی ب لهه‌ڤهاتنێن ژێر ب ژێر ل گه‌ل تركیێ، پارتی دبێژیت: «ب ئه‌گه‌را په‌كه‌كێ د وان سالێن كو كالكان باس لێ كری، پرسگرێكێن هه‌ری مه‌زن ژ بۆ پارتی چێبووینه».
داخویانییا پارتی باس ل ده‌ستدرێژییا په‌كه‌كێ ل سه‌ر پێشمه‌رگه‌هان دكه‌ت و دبێژیت: «كالكان ب چ ئاوایی د بێژیت پێشمه‌رگه ل مه‌تینایێ چ دكه‌ن، ئاخر پێشمه‌رگه خودانێن شه‌رعی یێن ڤێ خاكێ نه، له‌وما كالكان ب چ ئاوای ڤی مافی ب خوه دده‌ت كو ژ پێشمه‌رگه‌هان دخوازیت خاكا خوه یا ره‌سه‌ن چوول بكه‌ن».
پارتی دبێژیت: «په‌كه‌كه شه‌ری ناكه‌ت و ل وان جهێن كو ئه‌و لێ نه، د ره‌ڤێ دا یه و ته‌نێ پێشمه‌رگه‌هان شه‌هید دكه‌ت».
سلۆگانێن ئێكسپایه‌ر گه‌لێ كورد ناخپینن
ل ده‌مه‌كێ نێزیك گه‌نجێن كو هه‌وه ب ناڤێ كوردستانێ خاپاندین دێ روو ب رووی هه‌وه بن
ل داوییا داخویانییا پارتی ئه‌ڤ یه‌ك هاتییه گۆتن:
زێده‌باری كو هه‌موو ئاخفتنێن دوران كالكان، چه‌واشه‌كاری و ئیدیعایێن ب مه‌به‌ستن، واقعه‌كێ پر ته‌حله كو رێڤه‌به‌رێن په‌كه‌كێ ل سه‌ر دژاتییا باشوورێ كوردستانێ و حكوومه‌ت و ده‌زگه‌هێن وێ یێن شه‌رعی موكرن، ژ بۆ ڤێ یه‌كێ ژی ئاماده‌نه چه‌واشه‌كاری و لهه‌ڤهاتنێن ژێر ب ژێر بكه‌ن، له‌وما ل ڤێرێ پێویسته دوو راستی ل به‌ر چاڤ بهێن گرتن:
یا ئێكێ:
گه‌لێ هه‌رێما كوردستانێ ب گشتی ب درووشمێن ئایدۆلۆژی یێن ئێكسپایه‌ر بووی یێن په‌كه‌كێ ناهێن خاپاندن، هه‌روه‌ها ب باوه‌رییه‌ك تام داكۆكیێ ل سه‌ر ستاتۆ و ده‌ستكه‌فت و خاكا باشوور دكه‌ن.
یا دووێ:
روو ب رووبوونا رێڤه‌به‌رێن په‌كه‌كێ د گه‌ل وان گه‌نجان دا یێن ب ناڤێ كورد و كوردستانێ ل دووڤ وان كه‌تین، لێ رێخستن شه‌رێ كورد و كوردستانییان پێ دكه‌ت، گه‌له‌ك نێزیكه.
