پەکەکە و بێبەختی

پەکەکە و بێبەختی

دژمنی چ جاران ب ھێزا خوە پشتا کوردان نەشکاندیە. کورد ھەر وەختەکێ ب خیانەت و بێبەختییێن ناڤخوەیی شکەستینە. د سەرھلدانا شێخ سەعید دا قاسمێ کۆرێ (ھەڤلنگێ شێخ سەعید)، د سەرھلدانا سەیید رزا دا برازیێ وی رێبەر (رایبەر)، د سەرھلدانا بارزانییان دا ئیبراھیم ئەحمەد و تالابانییان بێبەختی ل کوردان کرنە و بوونە سەدەمێ شکەستن و تێکچوونا سەرھلدانێ. ئیرۆ ژی پەکەکە دایە دوو وێ شۆپێ و پشتا کوردان دشکێنیت.

پەکەکە و ئارمانجا پەکەکێ ھەم ژ ئالیێ ئۆجالان و ھەم ژ ئالیێ ھندەک رایەدارێن ئارتێش و میتێ ڤە پر ب زەلالی ھاتیە دەستنیشان کرن. کەسێن وەک ئۆرگەنەرال تونجەر کلچ، ئاژانێ میتێ ماھیر کایناک، یالچن کوچوک، دوران کالکان، جەمیل بایک، موراد کارایلان، موستافا کاراسو،عەلی حەیدەر کایتان، رزا ئالتون و بەسێ ھۆزات ئارمانجا پەکەکێ ب زەلالی ئانینە و تینن زمان. ئەو ژی دژبەرییا پەدەکێ، بارزانی و کوردستانەکا سەربخوەیە.

پەکەکە و ھەموو پرۆپاگاندا و دژبەرییا پەکەکێ ل سەر دژمناتییا بارزانییان و ئاڤاکرنا دەولەتا کوردستانێ ھاتیە سازکرن. تێکلییێن وێ یێن د گەل ھەر چار دەولەتێن داگیرکەر و یەنەکە دا دیسا ل سەر بێ بنگەھیێ ھاتنە دانین. کوشتنا پێشمەرگەیان و ئالۆزکرنا ئارامییا ھەرێما کوردستانێ ل سەر ڤی بنگەھی یە. رووخاندن و وێرانکرنا باکورێ کوردستانێ و ئالۆزکرنا رۆژئاڤایێ کوردستانێ ل سەر ڤی بنگەھی یە. ژ بۆ پەدەکێ و بارزانییان د چاڤێ کوردان و دیتنا گشتی دا رەش بکەت، پەکەکە ھەر تشتی دکەت، ھەر ڤڕ و درەوان دکەت و خیانەتێن کو بەشەک ژ یەنەکێ ل وان دکەت ژی تێخیتە ستویێ پارتی و بارزانییان.

 پەکەکا کو دگۆت “مە ل مەتینا پێشمەرگە نەکوشتنە” دیسا درەو کر و درەوا وان ب داخویانی یێن فەرماندارێ پایەبلندێ پەکەکێ ئۆزگور ژیاندا ئاشکەرا بوو. یا بالکێشتر؛ ئەندام و رێڤەبرێن پەکەکێ یێن کو ل سلێمانی و دەردۆرا وێ ژ لایێ ھندەک رێڤەبرێن یەنەکێ ڤە تێنە ئیخبار کرن و ب بالافرێن ترکان تێنە کوشتن، دیسا تێخنە ستویێ پارتی و بارزانییان. لێ ئەڤ ڤر و دەرەوا وان ژی ب وان دا تەقییا و ژ لایێ فایق گولپێ ڤە ھاتە ئاشکەرا کرن.

د دەربارێ ئیخباری و بۆمبەباراندنا ئەندام و رێڤەبرێن پەکەکێ دا سەرۆکێ بەرێ یێ پارتییا چارەسەرییا دەمۆکراتیکا کوردستانێ (پەچەدەکە) فایق گولپێ، ژ بۆ باس نیوزێ ئاشکەرا کر و گۆت: „ رێڤەبرێن پەکەکێ زێدەتر ل سنۆرێ سلێمانییێ بوونە ئارمانجا ئێریشێن دەولەتا ترک و ھاتنە کوشتن. دبیت کو پەکەکە ژی دزانیت یەنەکە ئیخبارییێ دکەت لێ بەحس ناکەت، ھەگەر پەیوەندییێن لەشکەری د ناڤبەرا پەدەکێ و ترکیا دا ھەبن، ھەروەھا پەیوەندی یێن ئیستیخباراتی ژی د ناڤبەرا یەنەکێ و ترکیایێ دا ھەنە و دبیت ژ بەر وێ سەدەمێ ئەندامێن پەکەکێ زێدەتر ل سلێمانییێ دبنە ئارمانجا ئێریشان”.

خویایە بەشەک ژ رێڤەبرێن یەنەکێ بوونە ھەڤکارێن دەولەتا ترک و ل دەردۆرا سلێمانییێ ئیخبارییا ئەندام و رێڤەبرێن پەکەکێ دکەن. ھەر چقاسی یەنەکە و پەکەکە نەخوازن ڤێ ئاشکەرا بکەن ژی، راستی د بن مژێ دا نامینیت و دەردکەڤیتە ھۆلێ. ھەر چقاسی پەکەکە ب ڤر و دەرەوان ئیخبارییا ئەندامێن خوە تێخیتە ستویێ پارتی و بارزانییان تۆھمەتبار بکەت ژی، پەڤچوون و شەرێ ھندەک رێڤەبرێن یەنەکێ راستییێ ئاشکەرا دکەت و ڤر و دەرەوێن پەکەکێ ل روویێ وان ددەت.

ل گۆر ئاگاھییێن کو ژ باژارێ سلێمانییێ تێن و د چاپەمەنییێ دا ژی ھاتینە بەحسکرن، ژ بەر سەدەما سیخورییا ئاساییشا یەنەکێ و ئیخبارییا پەکەکێ، ناکۆکی د ناڤبەرا ئالیگر و دژبەرێن پەکەکێ دا دەرکەتیە. یەنەکەی یێن کو ئالیگر و دژبەرێن پەکەکێ نە ب ھەڤ کەتنە و د ئەنجامێ دا شەرەکی دژوار د ناڤبەرا وان دا دەرکەتیە. ھەروەھا دهێتە گۆتن کو د 15ێ ڤێ مەھێ دا سیخورێن ناڤا ئاساییشا یەنەکێ بەرپرسەکێ پەکەکێ رادەستی ترکان کریە. ئەڤ یەک ژی نیشان ددەت کو د رادەستکرنا ئەندام و رێڤەبرێن پەکەکێ دا نە تلییا پەدەکێ بەلکو دەستێ یەنەکێ ھەیە. ب ڤی ئاوایی جارەکا دی ئاشکەرا بوو کو پەکەکە ب زانستی و ب قەستی پارتی و بارزانییان گونەھبار دکەت و بێ بەختییێن خوە ڤەدشێریت.

ب کورت و کورمانجی ھەگەر ئەم بێژین؛ پەکەکە و دیرۆکا پەکەکێ ل سەر بنیات و بنگەھێ درەو و بێبەختییان ھاتیە ئاڤاکرن. چ کەس ب دەرەو و بێبەختییان نە گھایە ئارمانجا خوە. رۆژ دهێن ئەو درەو و بێبەختی ل خوەدییێ خوە ڤەدگەرن و وەک بۆمبەیەکێ ب وان دا دتەقن.

رۆژەڤاکورد

پوستێن ھەمان بەش