د پەکەکێ دا کادر بوون و ئۆزگۆر ژییاندا

کادرێ پەکەکێ و فەرماندارێ ھەپەگێ ئۆزگۆر ژییاندا ژی د 9ێ خزیرانێ ل ھەرێما مەتینا ھاتە گەل پێشمەرگە. پەکەکە-ھەپەگە ھێژ 24 دەمژمێر دەرباس نەبووی، داخویانییەک بەلاڤ کر و تێدا ئۆزگۆر ژییاندا وەکو کەسەکی بێقیمەت، کەتی و بێنەفس دەست نیشان کر. د داخویانیێ دا وەھا ھاتە گۆتن: “دەما کو ئەڤ شەخسە د ناڤ رێزێن مە دا بوو، ژ بەر تاوانێن درەوان، سجیلا خوە خەلەت دایینێ و بێەخلاقیێ ھاتە لێپرسین کرن. ئەو ژ بەر ڤێ یەکێ ھاتە بنچاڤ کرن و د پێڤاژۆیا لێپرسینێ دا رەڤیا. “

لێبەلێ، ئەم دبینن کو ھەمی دەزگەھێن راگھاندنێ یێن پەکەکێ ئۆزگۆر ژییاندا د 28-5-2021 ئانکو بەرییا 40 رۆژا، د تەلەڤیزیۆنێن خوە دا وەکی فەرماندارێ ھەپەگێ ھەڤپەیڤینەک د گەل ویدا دکر. ئۆزگۆر ژیاندا کو 40 رۆژ بەرێ مێرخاس بوو و 12 سالان ل ناڤا پەکەکێ دا مابوو، ژ نشکێ ڤە وەکی خایین، بێ ئەخلاق و بێ قیمەت ھاتە راگەهاندن. مە وەکو دارکا مازی بەرییا کو پەکەکە-ھەپەگە ڤان تشتێن نەباش بێژیتە وی گۆتبوو کو دێ پەکەکە ڤان تشتا بێژیتە وی. پەکەکە هندە درەوێن مەزن کرن کو  ل وێ ڤیدیۆیا ژ لایێ ئاسایشا گشتی یا ھەرێما کوردستانێ ڤە ھاتیە بەلاڤکرن دا دەمژمێرا دەستێ وی ژی کرە ئامیرەکێ یاریێ. ل سەر مەدیایا جڤاکی دەمژمێرا وی نیشانکرن، ھاتە گۆتن، ” ئەو بوو ڤێ دەمژمێرێ خایین بوو ؟” لێبەلێ، ئەو دەمژمێر ل دەستێ وی بوو دەما کو چاپەمەنیا پەکەکێ راگھاندی و دگۆت ئۆزگۆر ژییاندا قەهرەمانە. ئەو دەمژمێرەک ژ مارکەیا ساکۆیە کو بھایێ وێ نێزیکی ١٠ دۆلارانە. ئانکو، ئۆزگۆر ژییاندا دەما کو ل جەم پەکەکێ بوو قەھرەمان بوو گاڤا کو ژ ناڤا وان دەرکەت ژ نیشکاڤە بوو خایین.

ب راستی، ئەڤ نە تەنێ چارەنووسا ئۆزگۆر ژییاندایە، قەدەرا ئەندامێن پەکەکێ دو بژاردەیان دییار دکەن. یان ھوونێ ببنە شەھید یان ژی ھوونێ ببنە خایین. بەلێ، ئەڤە قەدەرا کادرێن پەکەکێ یە. مخابن، ئەڤە ژی قەدەرەک گەلەک خەمگینە. و چ کەس نکاریت ڤێ قەدەرێ بگوھریت. گەلۆ بۆچی؟

ژ سەدی 95 کادرێن پەکەکێ تەمەنێ وان بن 18 سالیێ دا نە. پرانیا مەزنا مرۆڤێن کو دچنە ناڤ پەکەکێ بێ ھشمەندیا سیاسی و ئیدەۆلۆژیکن. ئەو ژ بەر گرێدانا عاتفی ب کوردستانێ ڤە، پرسگرێکێن ژییانی و زەختا دەولەتێ تەڤلی ناڤ پەکەکێ دبن. ئانکو، ئەو نە ژ بۆ ئیدەۆلۆژییەکێ دچن، ئەو ژبەر کوردستانێ تەڤلی پەکەکێ دبن. ژ بەر کو تەمەنێ وان بچوکە گەلەک ساناھی تێنە رێڤەبرن، بادان و پەروەردە کرن. پەکەکە ژ نەرمبوونا وێ تەمەنێ سوود وەردگریت و د وان دا ڤان هزرا ئاڤادکەت: “یێ کو دەردکەڤیت خایینە، ئەم دەیندارێ شەھیدانین، یێ خیانەتێ دکەت مافێ ژیانێ نینە، گەر ئەم بمرین، ئەم دبینە شەھید”. بەریا ھەر تشتی، پرانیا وان زارۆکن و ووسا شەخسییەت بۆ دهێتە چێکرن. وەھا، ئەڤ زارۆک وەکی مرۆڤێن کو ب زەمیر، رەخنەکەر و شیرۆڤە کار، نایێن مەزن کرن؛ ئەو وەکی عەبد وەکی مرید و بێباسک تێنە فێرکرن. ئەو ب راستی وەکو رۆبۆتان لێ دهێن، تەنێ دبنە مرۆڤێن کو پەیورا پارتیێ جێبەجێ دکەن.

ئەڤ تشتێ مەگۆتی بۆ هەوە یا بیانی یە؟ نەە

بۆچی ؟ ژ بەر کو ئەڤە رۆژھلاتا ناڤینە و ئەم ل گەلەک جھان ب ڤان رێبازان روو ب روو دبین.

ل رۆژھلاتا ناڤین سەدەما پاشڤەرووتیێ ئەڤەنە؛ ئاوایێ مەزنکرنا مرۆڤان، بداویکرنا تاکەکەسی، خوە فەداکرن ژ بۆ رێخستنێ. ئانکو، پەکەکە ئیدیحایێ دکەت کو ھەموو مرۆڤاھییێ ئازاد بکەت، لێ تشتێ دکەت مرۆڤان دکەتە خولامێ پارتییێ و کەسایەتییا ھەیی پووچ دکەت. دبینە مریدێن رێخستنێ، بێ شک و بێ نیقاش.

داعش ژی ب ھەمان رەنگی ئینسانا پەروەردە دکەت. وان ژی فیدایی ھەنە کو خوە بپەقینن. ژ داعشێ ڤەقەتین سەدەمێ کوشتنا مرۆڤییە. میناک، ئەم دزانین کو ل کامپا ھۆلێ، ژنێن داعشێ کەسێن کو ل گۆری بنەمایێن وان تەڤنەگەرن، یێن دخواستن ژ داعشێ جودا ببن دکوشتن و لاشێن وان دڤەشارتن. ب ڤی رەنگی، ئەم دبینین کو رێبازێن کارمەندێن پەکەکێ و داعشێ یەکن. پەکەکە وەکو ڤێرژنا داعشێ یا چەپ تەڤدگەریت و کادران پەروەردە دکەت.

تاپۆیا کادران د دەستێ پەکەکێ دایە. و ئەڤ کادرە تەنێ دەما کو بکارن ژ بۆ پەکەکێ خزمەتێ بکەن ھێژانە. یێن کو نکارن خزمەتێ بکەن، وەکو بارێ پارتیێ تێنە دیتن. جوانەک فیزیکی باش، یێن پرسان نەکەن، تشتێن تێنە گۆتن بکاریت زوو دوبارە بکەت، گوھ بدەتە فەرمانان، وی دەمی ئەو کەس بیناھییا چاڤێ پەکەکێ یە. کەسێ کو پرسا ژ پەکەکێ دکەت، رەخنە دکەت و نیقاشان دکەت پەکەکە وان کەسا وەکو گۆلولکا پرسگرێکان دبینیت. ب تایبەت ژی ژ بۆ پەکەکێ کەسێ کو نەشێت خوە ب فیزیکی بگونجینیت، ئەو کەسە کو دڤێت “یان زوو بمریت یان ژی برەڤیت”

یێن کو ب ھەزاران جارا خزمەتا پەکەکێ کری، جانێ خوە فیدا کری، چالاکیێن گەلەک سەرکەفتی پێک ئانین و جانێ مرۆڤان خلاس کری ژی پشتی کو ژ پەکەکێ ڤەدقەتن ئێدی ئەو خایین تێن بناڤکرن.ھندەک بریندارێن بێ لنگ و چاڤ ل ئەورۆپا ھەنە پەکەکە پشتی دەمەکێ وانا وەکو خایین بناڤ دکەت و دچت سەردا دگریت. کەسەکێ کو ھەر دو چاڤێن خوە ژ دەست دانە، پێشنییار دکەت کو تەڤلی ژییانا جڤاکی ببیت لێ ئەو وەکی خایین تێنە راگەهاندن بێ ویژدانییا پەکەکێ د ڤی ئاستێ دایە. ل گۆری ئەقلییەتا پەکەکێ کی گەلەک زێدە ناڤا پەکەکێ دا مابیت و خزمەت کربیت، دەما کو ئەو ڤەقەتی ئەو ژ ھەموویان خایینتر و دژمنتر دهێتە نیشاندان. چەند کەڤن بی هندە خایینەک مەزنی.

واتە، پر نۆرمالە کو پەکەکە ئۆزگۆر ژییاندا خایین رابگەهینیت و وی بێەخلاق ب ناڤ بکەت. ما پەکەکێ کیژ ڤەقەتییان خایین ب ناڤ ناکەت؟ گاڤا کەسەک ناڤا پەکەکێ دەردکەڤیت، پەکەکە یەکەم جار بەعسا کەسایەتیا وی مرۆڤی دکەت و وی ناڤا مالبات و جڤاکا وی دا بێ قەدر دکەت. دووڤ را ئاگاھداریێ بەلاڤ دکەت و دبێژیت “ئەڤ کەسە تەسلیمی ترکان بوو، سیخوورێ ترکایە زانیاری ددانە ترکان، ئەو بوو سەدەما شەھادەتا ھەڤالێن مە و ھتد “. گەر وی د 40 سالان دا خزمەتا پەکەکێ کربیت ئەو خایینێ ھەری مەترسیدار دهێتە دیارکرن. ژ بەر کو ئەگەر ئەو مرۆڤان قانع نەکەت یێ کو چوویی خایینە، ئەو نکاریت یێن مایی ژ بۆ کو ژ پەکەکێ جودا نەبن، بپارێزیت. ئەگەر بکاریت دکوژیت داکو ژ بۆ یێن مایی سەھمەکێ چێبکەت. یێن چوویە باشوورێ کوردستانێ، وان رادەستی ترکیا دکەن و ئەو دبنە قۆنترا. بەردەوام، پەکەکە ھەول ددەت کو یێن مایی مۆتیڤە بکەت و ببێژیت ژنێن ژ پەکەکێ دەرکەتین ل باشوورێ کوردستانێ ژ لایێ ھێزێن ئاساییشا گشتی ڤە دەستدرێژیا سێکسی ل سەر دهێتە کرن و دکەڤند رێکا خەراب. ئانکو ھەر کەسەک کو  ژ ناڤا پەکەکێ دەردکەڤیت، پەکەکە پیچەک دی کەمبەرێ تەنگ کەت.

گەر کەسێ کو ژ پەکەکێ جودا دبیت پیچەکێ بهێتە ناس کرن، کەسایەتەک سیاسی بیت، دێ پەکەکە ھێژ زێدەتر درەوان سەر وی دروست کەت. دەسپێکێ، گەفێن مرنێ ژ بۆ وی تێنە شاندن، دهێتە گۆتن کو ئەگەر ھوون دەڤێ خوە ڤەکەن، ھوون دێ هێنە کوشتن. کانی یلماز، سیپان رۆژھلات و گەلەک کەسێن دی ژ بەر کو دخواستن بچنە ناڤ سیاسەتا کوردایەتی دا، ھاتنە کوشتن. مرۆڤێن کو هێژ خوەدان پۆستەکی سیاسینە و پچەک دچنە قادا سیاسەتێ دا ب بەردەوامی ب کوشتنێ گەف لێ تێنە کرن.

ژ بۆ پەکەکێ قەهرەمان تەنێ ئەون یێن مری. عەتا کو پەکەکە بژیت، ئەو ھەر دەم کادرۆیێن خوە وەکی گومانکار دبینیت و ب شک نێزیکی وان دبیت و بن جاڤدێرییێ دا دگریت. د سیستەما پەکەکێ دا، عەبدللا ئۆجەلان خوەدێ یە و نابیت نیقاش ل سەر وی بهێتە کرن. کەسێن وەکی دامەزرێنەرێن پەکەکێ جەمیل بایک و مستافا قاراسو پێغەمبەرن، و نیقاش د گەل وان دا نینە. یێن مایی تەنێ دکارن ژ بۆ وان عیبادەتێ بکەن و بەیحەتێ بدەنە وان. واتە، سیستەمێ پەکەکێ ل سەر بنگەھا عەبداتیا مرۆڤان ئاڤا بوویە. یێ کو ڤێ خولامەتیێ رەخنە دکەن، ئازاد دفکرن ئەو منافقن. ب کوورتاسی پەکەکە ئایینەکێ بێی خوەدایێ ئاسیمانی یە.

پەکەکێ دڤێت د ڤێ چارچۆڤێ دا ئۆزگور ژیاندا خایین ئێعلان کر. گەر ئۆزگۆر ژیاندا قەد بەعسا شەھادەتا 5 پێشمەرگان و کوشتنا غازی سالع ئالیخان نەکربا ژی، ئەو دا دیسا خایین هێتە ئێعلان کرن. نھا ئەو تەنێ بوویە خایینەک ھێژتا مەزنتر. لێبەلێ، خاینێ ھەرێ مەزن ئەون یێن کو ئەڤینا زارۆکێن کوردا ژ بۆ کوردستانێ ل پێناڤی بەرژەوەندیێن خوە یێن حیزبی و کەسۆکی ئیستیسمار دکەن.

خایین ئەون یێن ب کۆمپلۆ و درەوان، زارۆکێن کوردان ب ھەڤوورا بەرددەن. خایین ئەون یێن جوانێن ب ئەشقا کوردستانێ تەڤلی پەکەکێ بوویی و پکەکە وان ژ بۆ “کۆمارا دیمۆکراتیکا ترکیا” ددەتە کوشتن.

کوردان گەلەک مری یێن هەی. ئێدی پێدڤیا مە ب قەهرەمانێن زندی ھەیە. کوردان پێدڤی ب جوانێن کو دکارن بژین و نەمرن ھەیە. پەکەکە بەروڤاژی ڤێ راستییێ، مرنێ پیرۆز دکەت ژییانێ وەکو خایینتی بناڤ دکەت. لێ مرن چ ب کوردان نادەتە قازانج کرن. گەر ب تەنێ مرنێ ئازادی ئینابا نها قەبرستانێن مە ژ باژارێن مە مەزنتر نەدبوون. کەسایەتا ئۆزگۆر ژییاندا  ژ بۆ کوردان د خالەک کریتیک دا دەرکەت پێش و ژ بۆ ڤی دەمی ھەلوەستەکا وەلاتپارێزی نیشان دا.

پوستێن ھەمان بەش